ရခိုင်ပြည်နယ် ကျောက်ဖြူမြို့နယ် စနဲမြို့ရှိ တိုက်နယ်ပြည်သူ့ဆေးရုံကို ယနေ့၂၀၂၅ ခုနှစ် မတ်လ (၁၀)ရက်နေ့ နံနက်ပိုင်းတွင် စစ်ကောင်စီက အသေခံဒရုန်း အသုံးပြုတိုက်ခိုက်သွားသည်ဟု ဒေသခံများထံမှ သိရသည်။
ယနေ့ နံနက်အစောပိုင်း (၂)နာရီခွဲကျော်တွင် ကျောက်ဖြူ အခြေစိုက် စစ်ကောင်စီ၏ အမှတ်(၁၈) တောင်မော်ကြီးရေတပ်စခန်းမှ အသေခံဒရုန်း(၂)စီးဖြင့် တိုက်ခိုက်သွားခြင်းဖြစ်သည်ဟု ဆိုသည်။
"ဗုံးသီးတစ်လုံးက ဆေးရုံကြီး ခွဲစိတ်ခန်းအလယ်တည့်တည့်ကိုကျကွဲတယ်။ ခွဲစိတ်ခန်းကတော့ လုံးဝပြိုသွားတယ်။ တစ်လုံးကတော့ ခွဲခန်းအပြင်ဘက်ကို ကျတယ်။"ဟု ဒေသခံတစ်ဦးက Tachileik News Agency ကိုပြောသည်။
အဆိုပါဆေးရုံကို အသုံးပြုခြင်းမရှိဘဲ ပိတ်ထားသည်မှာ ကြာပြီဖြစ်ပြီး လူနေထိုင်ခြင်းနှင့် ဆေးကုသခြင်းများလည်းမရှိသည့်အတွက် ထိခိုက်ဒဏ်ရာရသူ မရှိကြောင်း ၄င်းကဆိုသည်။
ထို့အပြင် မတ်လ (၇)ရက်နေ့ကလည်း ကျောက်ဖြူမြို့နယ် ကြတ္တိန်အောက်ရွာကို စစ်ကောင်စီလေတပ်က ဗုံးကြဲတိုက်ခိုက်ခဲ့သဖြင့် နေအိမ် (၃၅)လုံးထက်မနည်း မီးလောင်းပျက်စီးခဲ့ရသည်။
ကြတ္တိန်ကျေးရွာအနီးတွင် စစ်ကောင်စီတပ်နှင့် အာရက္ခတပ်တော်(AA)တို့ ၂၀၂၅ခုနှစ် ဖေဖော်ဝါရီလကုန်ပိုင်းကတည်းက တိုက်ပွဲဖြစ်နေခြင်းဖြစ်သည်။
စစ်ကောင်စီတပ်သည် မတ်လ(၆)ရက်နေ့တွင်လည်း စစ်တွေမြို့နယ်မှ ဝါဘိုရွာနှင့် ကျောက်ဖြူမြို့နယ်မှ ဦးကင်းရွာတို့ကို ဒရုန်းဖြင့် ဗုံးသီးချ တိုက်ခိုက်ခဲ့သည်။
စစ်တွေမြို့နယ် ကံ့ကော်ကျွန်းရွာတွင် အထိုင်ချထားသည့် စစ်ကောင်စီတပ်က မတ်လ(၆)ရက်နေ့ နံနက်ပိုင်းတွင်လည်း ဝါဘိုရွာကို ဒရုန်း(၁၀)စီးဖြင့် ဗုံးသီးချ တိုက်ခိုက်ခဲ့ခြင်းကြောင့် နေအိမ်(၂၅)လုံးထက်မနည်း မီးလောင်ပျက်စီးခဲ့သည်။
ထို့အပြင် ကျောက်ဖြူမြို့နယ်ရှိ ဓညဝတီရေတပ်စခန်းဌာနချုပ်(ဓရခ)နှင့် (၃)မိုင်ဝန်းကျင်သာဝေးသော အိမ်ခြေ (၁၇၀)ဝန်းကျင်ရှိသည့် ဦးကင်းရွာကိုလည်း စစ်ကောင်စီတပ်က ဒရုန်းဖြင့်ဗုံးသီးချ တိုက်ခိုက်ခဲ့သဖြင့် တစ်ရွာလုံး မီးလောင်ပျက်စီးခဲ့ရသည်။
အာရက္ခတပ်တော်သည် ရခိုင်ပြည်နယ်ရှိ မြို့နယ်ပေါင်း (၁၇)မြို့နယ်အနက် စစ်တွေ၊ ကျောက်ဖြူနှင့် မာန်အောင်မြို့ နယ်တို့ကိုသာ သိမ်းပိုက်ရန် ကျန်ရှိတော့ခြင်းဖြစ်သည်။
#TachileikNewsAgency
Photo:APM
