မြန်မာ - ထိုင်းနယ်စပ်ဒေသ တာချီလိတ်မြို့ လွယ်စတုံဘက်ရှိ ကုန်ဆုံဆိုင်တစ်ဆိုင်တွင် သေနတ်ပါသည့် လူ(၃)ဦးမှ လာရောက်ပြီး ဓါးပြတိုက်ကာ ဆိုင်ရှင်အား ကြိုးဖြင့်တုတ်ပြီး ငွေကြေးနှင့်ကား လုယက်သွားကြောင်း သိရသည်။
အဆိုပါ ဓါးပြတိုက်မှုသည် ၂၀၂၅ခုနှစ် မတ်လ(၃)ရက်နေ့ ည(၈)နာရီဝန်းကျင်အချိန်က တာချီလိတ်မြို့ ဝမ်လုံးကျေးရွာအုပ်စု၊ လွယ်စတုံ(အောက်)ရွာ ယန်းခေါင်းဘက်သို့ သွားသည့် လမ်းမကြီးဘေးတွင်ရှိသော "ကျေးသီး"ကုန်စုံဆိုင်တွင် ဖြစ်ပွားခြင်း ဖြစ်ကြောင်း သိရသည်။
ပုံအညွှန်း - ဓါးပြတိုက်ခံရသည့် ကုန်စုံဆိုင်သို့ ကျေးရွာအုပ်ချုပ်ရေးအဖွဲ့ နှင့် ပြည်သူ့စစ်သို့ ရောက်ရှိ စစ်ဆေးနေစဉ်
သေနတ်များပါသည့် လူ(၃)ဦး၏ ကား အနက်ရောင်ဖြင့် အဆိုပါ "ကျေးသီး"ကုန်စုံဆိုင်သို့ ရောက်ရှိလာပြီး ဆိုင်ရှင်အမျိုးသားအား ကြိုးဖြင့် တုတ်နှောင်ကာ သေနတ်ဖြင့် ထောက်ပြီး ဆိုင်၏ အံဆွဲထဲမှာ ထိုင်းဘတ်ငွေ (၇၀၀၀)ဘတ်ကို ယူဆောင်သွားသည့်အပြင် ကားကိုလည်း ယူဆောင်သွားကြောင်း သိရသည်။
"ဆိုင်ရှင်ကို ကြိုးနဲ့တုတ်ပြီးတော့ သေနတ်နဲ့တေ့ပြီး အော်ရင် သတ်ပြစ်မယ် ဘာညာပြောဆို ခြိမ်းခြောက်ပြီးတော့ အံဆွဲထဲက ရှိသမျှ ငွေတွေ ယူသွားတယ်။ ကားလည်းယူသွားတယ်။ ဒါက လုယက်မှုမျိုးမဟုတ်ဘဲ ဓါးပြမှုဖြစ်နေတယ်။ ဒီဓါးပြအဖွဲ့က ကားနဲ့လာကြတာ"ဟု အခင်းဖြစ်ရာသို့ သွားရောက်စစ်ဆေးခဲ့သည့် ကျေးရွာအုပ်ချုပ်ရေးအဖွဲ့မှ တစ်ဦးက Tachileik News Agency သို့ ပြောသည်။
တာချီလိတ်မြို့တွင် လမ်းပေါ် ဆိုင်ကယ်မောင်းနှင်သွားလာသူများကို လုယက်မှုများ နှင့် နေအိမ်နှင့်ဈေးဆိုင်များသို့ လာရောက်ပြီး ဓါးပြတိုက်မှုများ အပြင် နေ့ရောညပါ ခိုးမှုများမှာ ဖြစ်ပွားနေလျှက်ရှိသော်လည်း သက်ဆိုင်ရာများက အရေးယူဆောင်ရွက်နိုင်ခြင်း မရှိကြောင်း သိရသည်။
Photo: SaYa Swan Htet
