စစ်ကိုင်းတိုင်း ချောင်းဦးမြို့နယ် ချောင်းမရွာနှင့် နွယ်ခွေရွာတို့ကို စစ်ကောင်စီတပ်က လေကြောင်းတိုက်ခိုက်သဖြင့် ကလေးများအပါအဝင် အရပ်သား (၉)ဦးနှင့် ရဲဘော်(၂)ဦး သေဆုံးသည်ဟု ဒေသခံများထံမှ သိရသည်။
၂၀၂၅ခုနှစ် ဖေဖော်ဝါရီလ (၂၅)ရက်နေ့ နံနက်ပိုင်းတွင် ချောင်းမရွာကို တိုက်ပွဲဖြစ်ပွားခြင်းမရှိဘဲ တိုက်လေယာဉ်နှင့် Paramotor များဖြင့် ပေါင်(၅၀၀)ဗုံး ကြဲတိုက်ခိုက်သွားရာ အရပ်သား(၈)ဦးသေဆုံးသည်ဟု ဆိုသည်။
“မနေ့က မနက် (၁၁) နာရီဝန်ကျင်းလောက်မှာစပြီး ဖိုက်တာနှစ်စီးနဲ့ကြဲတာ။ ပြီးတော့ Y-12 ၊ Paramotor တွေကနေလဲ ဗုံးအလုံးရေကတော့ (၆) လုံးထက်မနည်းဘူး ကြဲသွားတယ်။ ပြည်သူက (၇)ဦး သေဆုံးတယ်။”ဟု ဒေသခံတစ်ဦးက Tachileik News Agency ကိုပြောသည်။
စစ်ကောင်စီသည် ချောင်းမရွာအတွင်းသို့ ဗုံးကြဲချိန်တွင် ဒေသခံများသည် တဲဆောက်နေချိန်နှင့် ပဲခြွေနေချိန်တို့ဖြစ်ပြီး ပေါင်(၅၀၀)ဗုံးအပါအဝင် ဗုံးနှစ်လုံးကြဲချသွားခြင်းဖြစ်သည်ဟု ဆိုသည်။
“တဲဆောက်နေချိန်နဲ့ ပဲနွှာနေတဲ့အချိန်ကို ကြဲတာ။ ပဲနွှာနေတဲ့နေရာကို တည့်တည့်ကျသွားတာ။ နှစ်အိမ်ပေါ့၊ လူစုလူဝေးများနေချိန်ကြဲသွားတာ။ ဂျက်ဖိုက်တာနဲ့ ကြဲသွားတာ။ Paramotor နဲ့ ထပ်ကြဲတော့ အနောက်ဘက်တစ်အိမ်ပေါ်ကို ကျတယ်။ အဲဒါတော့ ထိခိုက်ဒဏ်ရာမရဘူး။ အိမ်လေးတွေတော့ နည်းနည်းပျက်စီးသွားတယ်။”ဟု ချောင်းမရွာမှ ဒေသခံတစ်ဦးက Tachileik News Agency ကိုပြောသည်။
စစ်ကောင်စီတပ်၏ ဗုံးကြဲတိုက်ခိုက်မှုကြောင့် ချောင်းမရွာနေ ဦးအေးကို (၇၀)နှစ်ဝန်းကျင်နှင့် ဇနီးဖြစ်သူ ဒေါ်စီ (၇၀)နှစ်ဝန်းကျင် သမီးဖြစ်သူ တင်မိုးလင်း (၃၀)နှစ် ဝန်းကျင်၊ ဒေါ်ထွေးကြည် (၅၀)နှစ် ဝန်းကျင်၊ ချောစင်နိုင် (၂၀)နှစ်ကျော်၊ မပေါက်တူး (၁၀)နှစ်ကျော်နှင့် အမည်မသိ မိန်းကလေး (၁၀)နှစ်ကျော်တစ်ဦးတို့ သေဆုံးသည်ဟု သိရသည်။
“အလောင်းတွေ့တာကတော့ (၆)လောင်းပေါ့၊ သင်္ဂြုလ်ပြီးပါပြီ။ တစ်ဦးကတော့ ဆေးရုံမှာပဲ ဆုံးတယ်။ အားလုံးပေါင်း (၇)လောင်းပေါ့။ သေဆုံးသူကတော့ နောက်ထပ် (၂) ယောက်တော့ ပျောက်နေသေးတယ်။ အတည်ပြုလို့မရသေးဘူး။ ရုပ်အလောင်းတွေက မတွေ့ရဘူးဖြစ်နေလို့။ ဒဏ်ရာရတာကလည်း (၇)ဦး လောက်ရှိတယ်။”ဟု ချောင်းမရွာမှ ဒေသခံတစ်ဦးက ဆက်ပြောသည်။
ဗုံးကြဲခံရပြီးနောက် ဒေသခံများ ထွက်ပြေးတိမ်းရှောင်လိုက်ရပြီးနောက် ချောင်းမရွာနှင့် တစ်မိုင်ခန့်ဝေးသည့် နွယ်ခွေရွာကို စစ်ကောင်စီတပ်က ညနေ(၃)နာရီကျော်တွင် လက်နက်ကြီးနှင့်ပစ်ကာ တိုက်လေယာဉ်ဖြင့် ဗုံးထပ်ကြဲချ၍ PDF ရဲဘော်နှစ်ဦး သေဆုံးသည်ဟု သိရသည်။
“နွယ်ခွေရွာအနောက်ဘက် တစ်မိုင်ကျော်လောက်မှာ တပ်စွဲထားတဲ့ ခွေးခြံရှိတယ်။ အဲဒီကနေလည်း လက်နက်ကြီးနဲ့ လှမ်းပစ်တယ်။ ပြီးတော့ ဗုံးကြဲချတယ်။ ပြီးတော့ စစ်ကြောင်းထိုးလာတာ။”ဟု ဒေသခံတစ်ဦးက ပြောသည်။
စစ်ကောင်စီဘက်က ဖော်ပြချက်တွင် ချောင်းဦးမြိုနယ် နွယ်ခွေကျေးရွာအနီး နယ်မြေရှင်းလင်းနေသည့် စစ်ကောင်စီတပ်နှင့် PDF ရဲဘော်များ တိုက်ပွဲဖြစ်ရာက PDF ရဲဘော်နှစ်ဦးသေဆုံးပြီး မောင်းပြန်သေနတ်တစ်လက်၊ ကျည်(၁၀၀)တောင့်၊ ကျည်အိမ်(၂)ခု၊ အီနာဂါဗုံးသီးတစ်လုံး၊ ပိုကျည်(၉)တောင့်၊ ကျည်ကာဦးထုပ်တစ်လုံး၊ ကျည်ကာအင်္ကျီတစ်ထည်တို့ကို သိမ်းဆည်းရရှိသည်ဟု ဖော်ပြသည်။
လက်ရှိတွင် အဆိုပါစစ်ကြောင်းသည် ချောင်းဦးမြို့အတွင်းသို့ ပြန်ဝင်သွားပြီဟုလည်း သိရသည်။
#TachileikNewsAgency
