မန္တလေးတိုင်း ပုသိမ်ကြီးမြို့နယ်တွင် ရွှေဆိုင်ပိုင်ရှင်မိသားစု စီးလာသည့်ကားကို ဓားပြတိုက်မှုဖြင့် စစ်ကောင်စီ လက်အောက်ခံ ပြည်သူ့စစ် ဒုခေါင်းဆောင် မှန်ကြီး(ခ)ကောင်းမြတ်စံကို ဖမ်းဆီးစစ်ဆေးနေသည်ဟု ဒေသခံများထံမှ သိရသည်။
၂၀၂၅ခုနှစ် ဖေဖော်ဝါရီလ (၂၁)ရက်နေ့က ပုသိမ်ကြီးမြို့နယ်တွင် ရွှေဆိုင်ပိုင်ရှင်မိသားစု စီးလာသောကားကို လူတစ်စုက သေနတ်ဖြင့်တားကာ ရွှေ(၁၈)ကျပ်သားနှင့် ငွေကျပ် သိန်း(၃၀)ကျော်အား ဓားပြတိုက်ယူသွားသည့် အမှုဖြင့် ယင်းနေ့တွင်ပင် ပြည်သူ့စစ်ဒုခေါင်းဆောင်မှန်ကြီး (ခ)ကောင်းမြတ်စံကို မဲကင်းကုန်းကျေးရွာအုပ်ချုပ်ရေးရုံး၌ ဝင်ရောက်ဖမ်းဆီးသွားခြင်းဖြစ်သည်ဟု သိရသည်။
"ဓားပြတိုက်မှုဖြစ်တဲ့နေ့ကတည်းက ပြည်သူ့စစ်အဖွဲ့က ဒုခေါင်းဆောင်ကို ဖမ်းသွားတာ။ ကျန်တာတော့ မသိရသေးဘူး။”ဟု ဒေသခံတစ်ဦးက Tachileik News Agency ကိုပြောသည်။
ဖေဖော်ဝါရီလ (၂၁)ရက်နေ့ ည(၇)နာရီခွဲကျော်က ၆၀(ဘီ)လမ်း × ၁၉ လမ်းရှိ ပြည့်လျံအောင် ရွှေဆိုင်ပိုင်ရှင် ကိုဇေယျာအောင်မောင်း၍ မိသားစုဝင်(၃)ဦး လိုက်ပါလာသောကားကို လူ(၅)ဦးဝန်းကျင်က သေနတ်ဖြင့်ချိန်၍ တားဆီးခဲ့သည်ဟု ဆိုသည်။
ထို့နောက် ကားအားမောင်းနှင်၍ ရွှေထည်များအားယူသွားပြီးနောက် ရန်ကင်းတောင်အနီးရှိ ဧက(၁၀၀)ကွင်း အရှေ့ဘက် မန်းကျည်းပင်အောက်တွင် မျက်လုံးကိုအဝတ်စီး၍ ထားခဲ့သည်ဟု သိရသည်။
ယခုနှစ်အတွင်း မန္တလေးတွင် သုံးကြိမ်မြောက်ဓားပြတိုက်ခံထားရပြီး ပြီးခဲ့သည့်နှစ်ကလည်း ရွှေဆိုင်နှင့် ငွေလဲဆိုင်များ ဓါးပြတိုက်ခံခဲ့ရသည်။
#TachileikNewsAgency
