ရှမ်းပြည်နယ်အရှေ့ပိုင်း၊ တာချီလိတ်မြို့နယ် လွယ်တော်ခမ်းကျေးရွာအုပ်စုအတွင်း ရေပူစမ်းကျေးရွာအတွင်း စစ်တပ်နှင့်ပြည်သူ့စစ်တို့ ဝင်ရောက်စီးနင်းပြီး အသစ်ဖွဲ့စည်းထားသည့် ပြည်သူ့စစ်အဖွဲ့၏ လက်နက်ခဲယမ်းများကို သိမ်းဆည်းသွားသည့်အပြင် မီးဖွားရန် စုထားသည့် စုဗူးကိုပါ ရိုက်ခွဲပြီး ငွေများယူဆောင်သွားကြောင်း သိရသည်။
ယနေ့ ၂၀၂၅ခုနှစ် ဖေဖော်ဝါရီလ(၂၅)ရက်နေ့ နေ့လည်ပိုင်းက ရေပူစမ်းကျေးရွာသို့ စစ်တပ်၊ ရဲ နှင့် ကြိုးတံတားပြည်သူ့စစ်၊ ဝမ်ကောင်းပြည်သူ့စစ်နှင့် ပူးပေါင်းအဖွဲ့များက ကား(၁၈)စီးဖြင့် သွားရောက်ပြီး စီးနင်းရှာဖွေမှုများ လုပ်ဆောင်ခြင်း ဖြစ်ကြောင်း သိရသည်။
၎င်းတို့သည် ယခင် ရေပူစမ်းပြည်သူ့စစ်အဖွဲ့၏ ဒုတိယခေါင်းဆောင် ဦးဂျင်မီ၏ နေအိမ်တံခါးများကို ဖျက်ဆီး ဝင်ရောက်ရှာဖွေပြီးနောက် ၂၀၁၄ခုနှစ်က အသစ်ဖွဲ့စည်းထားသည့် နာသာလိ ပြည်သူ့စစ်အဖွဲ့ပိုင် လက်နက်ခဲယမ်းများကို သိမ်းဆည်းသွားခြင်း ဖြစ်ကြောင်း သိရသည်။
ရေပူစမ်းပြည်သူ့စစ်အဖွဲ့ကို ၂၀၁၉ခုနှစ်အတွင်းက ဖျက်သိမ်းခဲ့ပြီးနောက် ၂၀၂၄ခုနှစ်တွင် အသစ်ဖွဲ့စည်းထားသော နာသာလိပြည်သူ့စစ်အဖွဲ့၏ လက်နက်ခဲယမ်းများကို အကြောင်းမဲ့ သိမ်းသွားခြင်း ဖြစ်သည်ဟု သိရသည်။
ယင်းအပြင် ကျေးရွာနေ ဓမ္မဆရာ ဦးကျမူး၏ နေအိမ်ကိုလည်း ဝင်ရောက်ရှာဖွေပြီး မီးဖွားရန်အတွက် စုထားသည့် စုဗူးကိုလည်း ရိုက်ခွဲကာ အတွင်းမှာ ငွေသား ဘတ်(၅၀,၀၀၀)ကျော်ကိုလည်း ယူဆောင်သွားသည်ဟု သိရသည်။
တာချီလိတ်မြို့နယ်အတွင်း စစ်တပ်နှင့်ပြည်သူ့စစ်တို့ ပူးပေါင်းပြီး ဖေဖော်ဝါရီလအတွင်း၌ ရှာဖွေဖမ်းဆီးမှုများကို နေရာအနှံ့တွင် ပြုလုပ်နေလျှက်ရှိပြီး ဖေဖော်ဝါရီလ(၂၄)ရက်နေ့ ညပိုင်းကလည်း ဆန်ဆိုင်း(ခ)ရပ်ကွက်အတွင်း ပြည်သူ့စစ်တစ်ဦး လုပ်ကိုင်နေသည့် အွန်လိုင်းလောင်းကစားနေရာကိုလည်း ဝင်ရောက်ရှာဖွေမှုများ လုပ်ဆောင်ရာ ကြိုတင်သတင်းပေးထားမှုကြောင့် ဖမ်းဆီးသိမ်းဆည်းရရှိခြင်း မရှိဟုလည်း သိရသည်။
တာချီလိတ်မြို့တွင် ဖေဖော်ဝါရီလအတွင်း စီမံချက်ဖြင့် ရှာဖွေဖမ်းဆီးမှုများတွင် စစ်တပ်က ၎င်းတို့၏ လက်အောက်ခံ ပြည်သူ့စစ်များကို ခေါ်ယူအသုံးပြုရာတွင် ကျေးရွာများမှ ပြည်သူ့စစ်အဖွဲ့များကိုပါ ခေါ်ယူအသုံးပြုလာသည်ကိုလည်း တွေ့ရသည်။
