စစ်ကိုင်းတိုင်း ဝက်လက်မြို့နယ် မှတ်ထိရွာနှင့် မင်းကုန်းရွာကြား၌ ဖြစ်ပွာသော တိုက်ပွဲမှ စစ်ကောင်စီတပ်၏ လက်နက်(၄၅)လက်ကို သိမ်းဆည်းရရှိသည်ဟု NUG ကာကွယ်ရေးဝန်ကြီးဌာနက ယနေ့ ၂၀၂၅ခုနှစ် ဇန်နဝါရီလ (၇)ရက်နေ့တွင် ထုတ်ပြန်သည်။

လယ်ကိုင်းရွာမှ ထွက်လာသော ဗိုလ်ကြီး မျိုးမင်းသူ ဦးစီး စခတ-၈ အင်အား (၇၇)ဦးပါ စစ်ကြောင်းအား အမှတ် (၁)စစ်ဒေသ၊ အမှတ် (၂)ရွှေဘိုခရိုင် ကွပ်ကဲရေးမှူး၏ ညွှန်ကြားချက်ဖြင့် ရွှေဘိုခရိုင် တပ်ရင်း (၁၊ ၂၊ ၄၊ ၅၊ ၁၅၊ ၂၃)၊ ခရိုင် ဒရုန်းတပ်ဖွဲ့၊ ဝက်လက်မြို့နယ် ပကဖ တို့က ဇန်နဝါရီလ (၅)ရက်နေ့တွင် တိုက်ခိုက်ရာက လက်နက်မျိုးစုံ (၄၅)လက်နှင့် ဆက်စပ်ပစ္စည်းများ သိမ်းဆည်းရရှိသည်ဟု ဆိုသည်။ 

သိမ်းဆည်းရရှိသည့် လက်နက်ခဲယမ်းများမှာ ၆၀ မမ ပြောင်းတို (၁)လက်၊ RPG-7 (၁)လက်၊ MA-15 (၁)လက်၊ MA-4 (၂)လက်၊ MA-3 (၅) လက်၊ MA-1 (၁၀)လက်၊ G-3 (၁၇)လက်၊ M-79 (၁)လက်၊ MA-13 (၅)လက်၊ MA-11 (၁)လက်၊ BA-93 (၁)လက်၊ 5.56 ကျည် (၁၁၆၄) တောင့်၊ G-3 ကျည် (၁၆၇၈)တောင့်၊ ၉မမ ကျည် (၃၆၅)တောင့်၊ ကာဘိုင်ကျည် (၃၉၇)တောင့်၊ အီနာဂါပို့ကျည် (၁၄)တောင့်၊ ငါးကြင်းမြီး ကျည်ကပ် (၁)ခု၊ နာနတ်သီးဗုံး (၃)လုံး၊ သံပုရာသီး ဗုံး (၁)လုံး၊ အီနာဂါ ဗုံးသီး (၁၀)လုံး၊ ၆၀ မမ ဗုံးသီး (၆)လုံး၊ RPG-7 ဒုံးသီး (၇)လုံး၊ RPG ပို့ကျည် (၇)ခု၊ နင်းမိုင်း (၅)လုံး၊ MA ကျည်အိမ် (၄၂)ခု၊ G-3 ကျည်အိမ် (၃၈)ခု၊ MA-13 ကျည်အိမ် (၁၁)ခု၊ Jammer အကြီး (၁)ခု၊ ကျည်ကာဦးထုပ် (၁၀)လုံး တို့ကို သိမ်းဆည်းရရှိသည်ဟု သိရသည်။

စစ်ကောင်စီဘက်မှ နေ့လယ် (၁၂)နာရီခွဲခန့်တွင် ဝက်လက်မြို့နယ်၊ ပေါက်ကန်ရွာသို့ တံတားဦးမှ တက်လာသော Yak-130 (၁) စီးဖြင့် နှစ်ကြိမ် လေကြောင်းတိုက်ခိုက်ခဲ့ပြီး ညနေ (၃)နာရီခွဲခန့်တွင် မိတ္ထီလာ(ရှမ်းတဲ)မှ တက်လာသော MiG-29 (၁)စီးဖြင့် နှစ်ကြိမ် လေကြောင်း တိုက်ခိုက်သည်ဟု ဆိုသည်။ 

အဆိုပါ စစ်ကြောင်းသည် ဇန်နဝါရီလ (၃)ရက်နေ့တွင် ရွှေဘိုမြို့နယ်ရှိ စခတ(၈)အတွင်းမှ စစ်ကြောင်း စတင် ထွက်လာသဖြင့် ရွှေဘိုမြို့နယ်ရှိ ချောင်းဆုံရွာ၊ ပေါက်တုံရွာအနီး ပြွန်ကြီးသံလမ်းဆုံနှင့် ဝက်လက်မြို့နယ်ရှိ လယ်ကိုင်းရွာတို့၌ ဒရုန်းဖြင့် တိုက်ခိုက်ခြင်း၊ ပစ်ခတ်တိုက်ခိုက်ခြင်းများ ပြုလုပ်ခဲ့ခြင်းဖြစ်သည်ဟု သိရသည်။

ဇန်နဝါရီလ (၅) ရက်တွင်ပင် ဝက်လက်မြို့နယ် အုန္နဲဘုတ်ရွာ၌ စစ်ကိုင်းမြို့နယ် ဆားတောင်ရွာမှ ထွက်လာသော ဗိုလ်ကြီး အေးမျိုးထွန်း ဦးစီး တပ်မ(၃၃) လက်အောက်ခံ စကစ (တပ်စိစစ်ဆဲ) အင်အား (၈၃)ဦးပါ စစ်ကြောင်းအား ရွှေဘိုခရိုင် တပ်ရင်း (၁၊ ၂၊ ၁၈)၊ ဒေါင်းနီ (LPDF) ပူးပေါင်းအဖွဲ့တို့က တိုက်ခိုက်ခဲ့ကြသည်ဟု သိရသည်။

#TachileikNewsAgency

#TNA_MAT

Photo: MOD NUG