ရခိုင်ပြည်နယ် အမ်းမြို့နယ်ရှိ တစ်မိုင်ကုန်းစခန်းမှ ဆုတ်ခွာလာသည့် စစ်ကောင်စီတပ်သား (၁၄)ဦးကို ဖမ်းဆီးရမိကြောင်း ကျောင်းသား လက်ရုံးတပ်တော်က ယနေ့ ၂၀၂၄ခုနှစ် နိုဝင်ဘာလ (၂၈)ရက်နေ့တွင် သတင်းထုတ်ပြန်သည်။ 

အာရက္ခတပ်တော်(AA)၏ ထိုးစစ်ဆင်မှုကို ခံနေရသည့် အနောက်ပိုင်းတိုင်းစစ်ဌာနချုပ်ကွပ်ကဲမှု လက်အောက်ရှိ တစ်မိုင်ကုန်းစခန်းမှ ဆုတ်ခွာလာသော ဗိုလ်မှူးဇော်ထက်နောင် ဦးစီးစစ်ကြောင်းကို ကျောင်းသားလက်ရုံးတပ်တော်နှင့် မဟာမိတ်ပူးပေါင်းစစ်ကြောင်းတို့က ၂၀၂၄ ခုနှစ် နိုဝင်ဘာလ (၂၃)ရက်နေ့တွင် အမ်း-ပဒါန်း လမ်းတစ်နေရာတွင် ပိတ်ဆို့တိုက်ခိုက်ခဲ့ခြင်းဖြစ်သည်ဟု သိရသည်။

တိုက်ပွဲအတွင်း စစ်ကောင်စီတပ်သား (၂)ဦးသေဆုံးကာ သုံ့ပန်း (၁၄)ဦး၊ လက်နက်ငယ် (၂)လက်နှင့် ခဲယမ်းတို့အား သိမ်းဆည်းရရှိပြီး ဖမ်းဆီးရမိထားသည့် စစ်သုံ့ပန်းများအား လိုအပ်သော ဆေးဝါးကုသမှုများ ဆောင်ရွက်ပေး၍ စစ်သုံ့ပန်းမူဝါဒနှင့်အညီ ထိန်းသိမ်းစောင့်ရှောက်ထား သည်ဟု ကျောင်းသားလက်ရုံးတပ်တော်က ဆိုသည်။ 

ထို့အပြင် စစ်ကောင်စီစစ်ကြောင်းသည် တိုက်ပွဲအတွင်း၌ ဖွဲ့စည်းပုံပျက်ကာ တကွဲတပြားစီ ထွက်ပြေး​နေခြင်းကြောင့် နယ်မြေရှင်းလင်းနေသည်ဟု ဆိုသည်။

တိုက်ပွဲတွင် ကျောင်းသားလက်ရုံးတပ်တော် (SAF) နှင့်အတူ အရှိုချင်းကာကွယ်​ရေးတပ်ဖွဲ့ (ACDF)၊ မင်းဘူးခရိုင် အမှတ် (၂)တပ်ရင်းတို့က ပူးပေါင်းတိုက်ခိုက်ခဲ့ခြင်းဖြစ်သည်ဟု သိရသည်။ 

#TachileikNewsAgency

Photo:SAF