တနင်္သာရီတိုင်း ပုလောမြို့နယ်၊ (၅)မိုင်ကျေးရွာအနီးတွင် စစ်ကောင်စီတပ်နှင့် တော်လှန်ရေးတပ်များတိုက်ပွဲဖြစ်ပြီးနောက် စစ်ကောင်စီတပ်မှ ဗိုလ်မှူး(၁)ဦးအပါအဝင် (၅)ဦးသေပြီး (၂)ဦးအား ဖမ်းဆီးရမိကြောင်း မြိတ်ခရိုင် တပ်ရင်း(၁)ထံမှ သိရသည်။
အင်အား(၅၀)ဝန်းကျင်ဖြင့် စစ်ကြောင်းထိုးလာသော စစ်ကောင်စီ၏ လက်အောက်ခံ ခလရ(၂၈၅)စစ်ကြောင်းအား ပြည်သူ့ကာကွယ်ရေးတပ်မတော်(ပုလော)၊ မြိတ်ခရိုင် အမှတ်(၁)တပ်ရင်း၊ ကရင်အမျိုးသားကာကွယ်ရေးတပ် (KNDO)၊ တပ်ရင်း(၇) တပ်ခွဲ(၅)၊ ပုလောဒေသကာကွယ်ရေးတပ်(PRDF)မဟာမိတ်ပူးပေါင်းတပ်များမှ တိုက်ခိုက်ခဲ့ခြင်းဖြစ်ကြောင်း သိရသည်။
တိုက်ပွဲအတွင်း မြိတ်ခရိုင်အမှတ်(၁)တပ်ရင်းမှ ရဲဘော်(၁)ဦး (မစိုးရိမ်ရ)ဒဏ်ရာရခဲ့ပြီး ပုလောဒေသကာကွယ်ရေးတပ်(PRDF)မှ ရဲဘော်(၁)ဦး ကျဆုံးသည်ဟု သိရသည်။
စစ်ကောင်စီတပ်ထံမှ MA-7 ၆၀ မမ စိန်ပြောင်း (၁)လက်၊ ၆၀ မမ ကျည် (၃)ခု၊ MA-1 ရိုင်ဖယ် (၁)လက်၊ MA-2 အပေါ့စားစက်သေနတ် (၂)လက်၊ MA-3 ရိုင်ဖယ် (၃)လက်၊ MA-5 ပစ္စတို (၁)လက်၊ အီနာဂါ (၁)ခု၊ လက်ပစ်ဗုံး (၈)လုံး၊ MA-14 နင်းမိုင်း (၃)ခု၊ MA ကျည်ဘောက် (၂၇)ခု၊ MA-2 ကျည်ဘောက်အဝိုင်း (၂)ခု၊ ၅.၅၆(ကပစ) ကျည် (၂၄၁၂)တောင့်၊ စစ်ဦးထုပ် (၆)လုံး၊ စကားပြောစက်(အသေး) (၁)လုံး၊ လက်ကိုင်ဖုန်း (၄)လုံး၊ ကျည်ကာအင်္ကျီ (၅)စုံ၊ အီကွေးမင်း (၅)ခု၊ ကျောပိုးအိတ် (၁)လုံးတို့ကို သိမ်းဆည်းရရှိသည်ဟု သိရသည်။
စစ်ကောင်စီတပ်မှ ကြည်း-၅၀၀၇၉ ဗိုလ်မှူး သက်ထွန်းအောင်၊ တ-၇၃၁၆၉၁ တပ်ကြပ်ကြီး ခင်မောင်သိန်း၊ တ-၇၇၃၉၈ တပ်ကြပ် ခိုင်လင်းအောင်၊ တ-၉၆၀၃၅၉ တပ်ကြပ် တင်စိုးနှင့် တ-၄၂၄၀၈၆ ဒု-တပ်ကြပ် သန်းဦးမြင့်တို့ သေဆုံးပြီး တ-၂၄၀၃၈၈ တပ်ကြပ် မောင်ဖြူ၊ တ-၈၈၈၀၄၆ တပ်ကြပ် မြမောင် တို့ကို အရှင်ဖမ်းမိသည်ဟု သိရသည်။
#TachileikNewsAgency
Photo: PDF Myeik District Battalion 1 - P23401
