မြန်မာနှစ်ဆန်းတစ်ရက်နေ့တွင် စစ်ကောင်စီမှ အကျဥ်းသား ၃၀၀၀ကျော် လွတ်ငြိမ်းခွင့်ပေး
မြန်မာ့နှစ်ဆန်းတစ်ရက်နေ့အဖြစ် နိုင်ငံအတွင်း အကျဥ်းထောင်၊ အချုပ်ထောင်၊ အကျဥ်းစခန်းအသီးသီးမှ အကျဥ်းသား စုစုပေါင်း (၃၃၀၃)ဦးကို
ယနေ့ ၂၀၂၄ခုနှစ် ဧပြီလ (၁၇)ရက်နေ့တွင် လွတ်ငြိမ်းသက်သာခွင့်ပေးလိုက်သည်ဟု စစ်ကောင်စီက ထုတ်ပြန်သည်။
စစ်ကောင်စီ လွတ်ငြိမ်းခွင့်ပေးသည့် အကျဥ်းသားများထဲတွင် နိုင်ငံရေးပုဒ်မများဖြင့် တရားစွဲဆို ပြစ်ဒဏ်ချခံထားရသည့် နိုင်ငံရေးအကျဥ်းသား မည်မျှပါဝင်သည်ကိုမူ ရှင်းလင်းစွာ သိရှိရခြင်းမရှိသေးပါ။
စစ်ကောင်စီ အာဏာသိမ်းပြီးချိန်မှစ၍ ဖမ်းဆီးခံခဲ့ရသူ စုစုပေါင်း (၂၆,၅၂၄)ဦးရှိပြီး ထိုအထဲမှ (၂၀,၃၅၁)ဦးမှာ ထိန်းသိမ်းခံနေရဆဲဖြစ်ကာ ထိန်းသိမ်းခံနေရသူများအနက်မှ (၈၉၄၀)ဦးမှာ ထောင်ဒဏ်ချမှတ်ခံထားရကြောင်း နိုင်ငံရေးအကျဥ်းသားများကူညီစောင့်ရှောက်ရေးအဖွဲ့ AAPP၏ စာရင်းများအရသိရသည် ။
#TachileikNewsAgency
