ကရင်ပြည်နယ် ဖားအံမြို့နယ် တပ်ရင်း(၁)နယ်မြေ ညောင်ကုန်းရွာအတွင်း တပ်စွဲထားသည့် အမှတ် (၁၀၁၄) BGF ညောင်ကုန်းတပ်စခန်းနှင့် စစ်ကောင်စီတပ်စခန်းကုန်းကို ပြီးခဲ့သည့် ၂၀၂၃ခုနှစ် စက်တင်ဘာလ(၂၃)ရက်နေ့မှ အောက်တိုဘာလ(၂)ရက်နေ့အထိ ဒရုန်းစစ်ဆင်ရေးအဖြစ် ဒရုန်းဖြင့် ဗုံးသီးချ တိုက်ခိုက်ခဲ့ကြောင်း အမှတ်-၁ မိတ်ဖက်တော်လှန်ရေးတပ်ပေါင်းစု၊ သထုံခရိုင်ထံမှ သိရသည်။

 

စစ်ကောင်စီတပ်စခန်းများကို အဆိုပါကာလအတွင်း ဒရုန်းစစ်ဆင်ရေး (၇)ကြိမ်ဖြင့် (၆၀)မမဗုံးသီး (၂၆) လုံး၊ (၈၁)မမ ဗုံးသီး(၂)လုံး ချတိုက်ခိုက်ခဲ့ပြီး BGF နှင့် စစ်ကောင်စီတပ်သားများ ထိခိုက်သေဆုံးသူရှိသည်ဟု အမှတ်-၁ မိတ်ဖက်တော်လှန်ရေးတပ်ပေါင်းစု၊ သထုံခရိုင်က ယနေ့ အောက်တိုဘာလ (၅)ရက်နေ့တွင် သတင်းထုတ်ပြန်ထားသည်။

အမှတ်(၁၀၁၄) BGF ညောင်ကုန်းစခန်းသည် ခရီးသွားပြည်သူများအား ခြိမ်းခြောက်၍ ငွေကြေးကောက်ခံခြင်းနှင့် ဘားအံမြို့နယ် ကျေးရွာများအတွင်းသို့ လက်နက်ကြီးများဖြင့် ပစ်ခတ်ခြင်းများ ပြုလုပ်နေသည့်စခန်းဖြစ်ကြောင်း သိရသည်။

တိုက်ခိုက်မှုကို UNITED DEMOCRATIC FORCE - UDFတပ်ဖွဲ့ မှ ဦးဆောင်၍ တပ်မဟာ(၁) Fedreal Wing Droneတပ်ဖွဲ့နှင့် KNLAပူးပေါင်းတပ်ဖွဲ့များက လုပ်ဆောင်ခဲ့ခြင်းဖြစ်ကြောင်း သိရသည်။

အမှတ်(၁၀၁၄) BGF ညောင်ကုန်းစခန်းအတွင်းရှိ လက်နက်နှင့်အတူ အလင်းဝင်လိုသည့် BGFနှင့် စစ်ကောင်စီတပ်ဖွဲ့ဝင်များအား UNITED DEMOCRATIC FORCE - UDF မှ ဆုငွေကျပ် သိန်း(၁၀၀)ချီးမြှင့်သွားမည်ဖြစ်သည်ဟုလည်း သတင်းထုတ်ပြန်ထားသည်။

#TachileikNewsAgency

Photo : အမှတ် - ၁ မိတ်ဖက်တော်လှန်ရေးတပ်ပေါင်းစု၊ သထုံခရိုင်