ဂျပန်အနေဖြင့် ယူကရိန်းကို ကျူးကျော်သည့် ရုရှားနိုင်ငံကို ဒဏ်ခတ်ပိတ်ဆို့သည့်နည်းတူ မြန်မာနိုင်ငံအပေါ်လည်း လုပ်ဆောင်သင့်ကြောင်း ကုလသမဂ္ဂ ကျွမ်းကျင်သူတဦး တိုက်တွန်းလိုက်သည်။

ကုလသမဂ္ဂ၏ မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် သောမတ်စ် အင်ဒရူးစ်ကလည်း ဂျပန်အနေဖြင့် ၎င်းတို့၏စစ်တပ် ဂုဏ်သိက္ခာမထိခိုက်စေရေးအတွက် မြန်မာစစ်တပ်အတွက် လေ့ကျင့်ရေးအစီအစဉ်ကို ချက်ချင်းရပ်ဆိုင်းရန် တိုက်တွန်းထားသည်။

မြန်မာနိုင်ငံတွင် ၂၀၂၁ ခုနှစ် ဖေဖော်ဝါရီလ (၁)ရက်နေ့၌ စစ်တပ်က အရပ်သားခေါင်းဆောင် ဒေါ်အောင်ဆန်းစုကြည်၏ အစိုးရအား ဖြုတ်ချပြီးနောက်ပိုင်း  နိုင်ငံတဝန်းတွင် တိုက်ပွဲများဖြစ်ပွားလာပြီး စီးပွားရေးကြပ်တည်းမှုများ ဖြစ်ပွားနေခြင်းဖြစ်သည်။

စစ်တပ်က ဧပြီလအတွင်း လေကြောင်းတိုက်ခိုက်မှုတစ်ခုအတွင်း အရပ်သား (၁၇၀)ထက်မနည်း အစုလိုက် အပြုံလိုက်သေဆုံးခဲ့ရခြင်းဖြစ်သည်။

မြန်မာနိုင်ငံမှာ လူ့အခွင့်အရေး အခြေအနေတွေက ကြောက်စရာကောင်းပြီး ပိုပိုဆိုးလာပါတယ်

ဟု အန်ဒရူးစ်က ယခုသီတင်းပတ်အတွင်း ဂျပန်အစိုးရအရာရှိများနှင့် စီးပွားရေးလုပ်ငန်းများမှ သက်ဆိုင်သူများနှင့် တွေ့ဆုံပြီးနောက် တိုကျိုမြို့၌ သတင်းထောက်များအား ပြောကြားခဲ့သည်။

ဂျပန်အနေနဲ့ ယူကရိန်းအကျပ်အတည်းမှာ တုန့်ပြန်လုပ်ဆောင်ခဲ့တဲ့အတိုင်းပဲ မြန်မာစစ်တပ်နဲ့ သူ့ရဲ့ အဓိက ၀င်ငွေရင်းမြစ်တွေအပေါ် ပစ်မှတ်ထားတဲ့ စီးပွားရေးပိတ်ဆို့အရေးယူမှုကို တခြား G7 နိုင်ငံတွေနဲ့အတူ ပါဝင်ဖို့ စဉ်းစားပါလို့ ဂျပန်ကို တိုက်တွန်းချင်ပါတယ်

ဟု ၎င်းက ပြောသည်။

 မြန်မာနိုင်ငံတွင် အာဏာသိမ်းပြီးနောက် ဂျပန်က  နောက်ထပ် အကူအညီပေးရေး ပရောဂျက်အသစ်များကို ရပ်ဆိုင်းလိုက်သော်လည်း ယခင်ကရှိထားသည့် အစီအစဉ်များကို ဆက်လက်ပေးထားသဖြင့် ပြည်သူများအား တိုက်ခိုက်နေသည့် မြန်မာစစ်တပ်အား မပံ့ပိုးရန် အရေးယူဒဏ်ခတ်ပိတ်ဆို့ရေးကို တောင်းဆိုနေခြင်းဖြစ်သည်။

ဂျပန်က မြန်မာစစ်တပ်အား လေ့ကျင့်ပေးသည့် အစီအစဉ်တွင် တပ်သားသစ်များ လက်ခံမည်မဟုတ်ကြောင်း ကာကွယ်ရေးဝန်ကြီးဌာနက ပြီးခဲ့သည့် စက်တင်ဘာလတွင် ပြောကြားခဲ့သော်လည်း လက်ရှိလေ့ကျင့်ပေးနေသည့် မြန်မာစစ်သားများအား လေ့ကျင့်မှုဆက်လက်ပြုလုပ်ပေးခြင်းကို အင်ဒရူးစ်က ဝေဖန်လိုက်သည်။

သူတို့ဟာ (မြန်မာစစ်တပ်မှ တပ်သားများ) တိုက်ခိုက်ရေးသင်တန်းတွေသင်ယူပြီးရင် လူသားမျိုးနွယ်အပေါ် ကျူးလွန်တဲ့ ရာဇ၀တ်မှုတွေနဲ့ စစ်ရာဇ၀တ်မှုတွေအတွက် တာဝန်ရှိတဲ့ စစ်တပ်ဆီကို ပြန်သွားမှာပါ

 ဟု အင်ဒရူးစ်က ထောက်ပြလိုက်ပြီး

ကာကွယ်ရေးဝန်ကြီးဌာနက မြန်မာစစ်သားတွေကို ဆက်လက်လေ့ကျင့်နေသရွေ့ ဂျပန်ရဲ့ ကိုယ်ပိုင်ကာကွယ်ရေးတပ်ဖွဲ့တွေဟာ ရက်စက်ကြမ်းကြုတ်တဲ့စစ်အစိုးရနဲ့ ဆက်နွယ်နေမှာပါ

ဟု သတိပေးလိုက်သည်။

ဂျပန်နိုင်ငံသည် မြန်မာနိုင်ငံနှင့် ကာလရှည်ကြာ ဆက်ဆံရေးရှိပြီး အကူအညီများ အဓိက ပံ့ပိုးပေးသည့်အပြင် အာဏာသိမ်းမှု မတိုင်မီက ရင်းနှီးမြှုပ်နှံမှု အရင်းအမြစ်လည်း ဖြစ်ခဲ့သည်။

အိမ်နီးချင်းဘင်္ဂလားဒေ့ရှ်ရှိ ရိုဟင်ဂျာဒုက္ခသည်များအတွက် စားနပ်ရိက္ခာထောက်ပံ့ခြင်းဆိုင်ရာ အကူအညီပေးရေးအစီအစဉ်သစ်များတွင် ပါဝင်မည့် ငွေကြေးများကို လမ်းကြောင်းပြောင်းရန်ကိုလည်း  ဂျပန်အား တိုက်တွန်းခဲ့ကြောင်း Andrews က ပြောကြားခဲ့သည်။

မြန်မာနိုင်ငံတွင် ၂၀၁၇ ခုနှစ်က စစ်တပ်၏ဖြိုခွင်းမှုကြောင့် ဘင်္ဂလားဒေ့ရှ်နိုင်ငံတွင် ရိုဟင်ဂျာတစ်သန်းဝန်းကျင်ရောက်နေကြပြီး အဆိုပါဖြိုခွင်းမှုမှာ လက်ရှိတွင် ကုလသမဂ္ဂ၏ လူမျိုးတုံးသတ်ဖြတ်မှုဆိုင်ရာ စုံစမ်းစစ်ဆေးမှုလုပ်ဆောင်နေပြီဖြစ်သည်။

မြန်မာနိုင်ငံတွင် အာဏာသိမ်းမှုဖြစ်စဉ်ကြောင့် ဂျပန်ကုမ္ပဏီကြီးတစ်ခုဖြစ်သည့် Kirin အပါအဝင် ဂျပန်စီးပွားရေးလုပ်ငန်းအချို့က မြန်မာနိုင်ငံမှ ထွက်ခွာသွားကြသော်လည်း အချို့လုပ်ငန်းများက စစ်အစိုးရကို ဝန်ဆောင်မှုပေးသည့် မိတ်ဖက်များနှင့် ဆက်လက်ပူးပေါင်းဆောင်ရွက်နေခြင်း သို့မဟုတ် စစ်အစိုးရနှင့် ဆက်နွှယ်နေသည့် ကုမ္ပဏီများသို့ လုပ်ငန်းရောင်းချခြင်းများကို လုပ်ဆောင်ခဲ့ကြသည်ဟု အင်ဒရူးက ထောက်ပြထားသည်။

တကယ်တော့  အခြေအနေတွေက မြန်မြန်ဆန်ဆန် ယိုယွင်းလာပြီး ကျွန်တော်တို့ရဲ့ လုပ်ဆောင်ချက်တွေကို ပြန်လည်သုံးသပ်ဖို့ လိုအပ်နေပါပြီ

ဟု အမေရိကန်လွှတ်တော်အမတ်ဟောင်းတစ်ဦးလည်းဖြစ်သည့် အင်ဒရူးစ်က ထောက်ပြသည်။

 နိုင်ငံတကာအသိုက်အဝန်းတစ်ခုလုံးက မြန်မာပြည်သူများအပေါ် ပျက်ကွက်နေကြသည်ဟု ၎င်းကဆိုသည်။

Source: Japan Today