ကရင်ပြည်နယ်၊ မြဝတီမြို့အနီးတွင် အာဏာသိမ်းစစ်ကောင်စီတပ် နှင့် ၂၀၂၃ခုနှစ်၊ ဧပြီလ (၁၁)ရက်က စတင်ကာ ဧပြီလ (၁၃)ရက်နေ့အထိ တိုက်ပွဲများ ဖြစ်ပွားခဲ့ပြီး စစ်ကောင်စီတပ်ဘက်က ထိခိုက်သေဆုံးသူရှိကာ လက်နက်ခဲယမ်းများ သိမ်းဆည်း ရရှိခဲ့ကြောင်း ကော်ဘရာစစ်ကြောင်းက ယနေ့ ၂၀၂၃ခုနှစ် ဧပြီလ(၁၃)ရက်နေ့တွင် သတင်းထုတ်ပြန်သည်။ 

ဧပြီလ (၁၁)ရက်နေ့က စစ်ကောင်စီတပ်သည် လေကြောင်းတိုက်ခိုက်မှု ( ၅ )ကြိမ်ပြုလုပ်ကာ ထိုးစစ်ဆင်လာသဖြင့် နံနက်ပိုင်းက စတင်ကာ တိုက်ပွဲဖြစ်ပွားခဲ့ကြောင်း သိရသည်။

အဆိုပါ တိုက်ပွဲအတွင်း စစ်ကောင်စီဘက်က (၆)ဦးသေပြီး (၁၂)ဦး ဒဏ်ရာရခဲ့ကာ ကော်ဘရာစစ်ကြောင်းမှ ရဲဘော် ( ၄ )ဦးကျဆုံးခဲ့ကြောင်း သိရသည်။ 

ဧပြီလ(၁၂)ရက်နေ့တွင် BGF ၏ သိန်းတန်တပ်စခန်းကုန်းအား တက်ရောက်သိမ်းပိုက်နိုင်ခဲ့ပြီး စစ်ကောင်စီတပ်သားနှင့် BGF (၁၀)ဦး သေပြီး လက်နက် (၁၁) လက်၊ ရှေ့ထွက်မိုင်း ( ၂ )လုံး၊ ကျည်အိမ်၊ နင်းမိုင်း ( ၁ )လုံး၊ ၅.၅၆ ကျည် (၅၈၄)တောင့်၊ ၇.၆၂ ကျည် (၇၅) တောင့်၊ AK ကျည်ဘောက်(၂)ခု၊ HK ကျည်ဘောက် (၅) ခု၊ ကာဘိုင်ကျည်ဘောက်(၂)ခု၊ M ၁၆ ကျည်ဘောက် (၄)ခု သိမ်းဆည်းရရှိခဲ့သည်ဟု သိရသည်။

ဧပြီလ (၁၃)ရက်နေ့တွင် ကျောက်မိုင်း BGF စခန်းကုန်းအား Sniper ဖြင့် ပစ်ခတ်ခဲ့ရာ (၃)ဦး သေပြီး စစ်ကောင်စီဘက်က တနေကုန်  လက်နက်ကြီးဖြင့်ပစ်ခတ်ခဲ့သည်ဟု သိရသည်။