အမေရိကန်တွင် အားကောင်းသည့် ဆောင်းရာသီမုန်တိုင်းတစ်ခု နိုင်ငံအနောက်ပိုင်းနှင့် အလယ်ပိုင်း ပြည်နယ်များကို ဖြတ်သန်းတိုက်ခတ်မှုကြောင့် ဖေဖေါ်ဝါရီလ (၂၁) ရက်နေ့က လေယာဥ်ခရီးစဥ် (၁,၀၀၀) ကျော် ဖျမ်းသိမ်းခဲ့ရသည်။ 

အမေရိကန်သို့ ဝင်ရောက်မည့် သို့မဟုတ် အမေရိကန်မှ ထွက်ခွာမည့် စုစုပေါင်း လေယာဥ်ခရီးစဥ် (၁,၀၃၅) ခုကို ဖျက်သိမ်းခဲ့ကြောင်း လေကြောင်းပျံသန်းမှု စောင့်ကြည့်ဝက်ဘ်ဆိုက် FlightAware က ဖော်ပြခဲ့သည်။

ထိုဝက်ဘ်ဆိုက်၏ အချက်အလက်များအရ လေယာဥ်ခရီးစဥ် (၉၃၂) ခု နှောင့်နှေးခဲ့ကြောင်းလည်း သိရသည်။ 

ရာသီဥတုအခြေအနေ ဆိုးရွားပြင်းထန်မှုကြောင့် ယခုသီတင်းပတ်အတွင်း မင်နီဆိုးတား အပါအဝင် Great Lakes နှင့် တောင်ပိုင်းလွင်ပြင်များရှိ အခြား ပြည်နယ်များတွင် လေယာဥ်ခရီးစဥ် နှောင့်နှေးမှုများ သို့မဟုတ် ဖျက်သိမ်းမှုများရှိနိုင်ကြောင်း အမေရိကန် Federal Aviation Administration (FAA) က ဖေဖေါ်ဝါရီလ (၂၁) ရက်နေ့တွင် Twitter ၌ ပြောထားသည်။

ဆောင်းရာသီမုန်တိုင်းကြောင့် တစ်နာရီလျှင် နှင်းထု (၂) လက်မနှုန်း ကျရောက်ပြီး လေပြင်းတိုက်ခတ်မှုများ ဖြစ်ပေါ်ကာ ခရီးသွားလာရန် စိတ်မချရသည့် အခြေအနေဖြစ်စေပြီး မြောက်ပိုင်းလွင်ပြင်နှင့် အထက်ပိုင်း Midwest ဒေသ၏ နေရာများတွင်မူ ခရီးသွားလာ၍မရသည်အထိ ဖြစ်နိုင်ကြောင်း အမေရိကန်မိုးလေဝသဌာန National Weather Service က ၎င်း၏ မိုးလေဝသခန့်မှန်းချက်တွင် ဖော်ပြထားသည်။ 

ဆောင်းရာသီမုန်တိုင်းကြောင့် စရိတ်နည်းလေကြောင်းလိုင်း Southwest Airlines က လေယာဥ်ခရီးစဥ် (၂၃၅) ခုကို ဖျက်သိမ်းခဲ့ပြီး Delta Air Lines ကလည်း ခရီးစဥ် (၁၉၇) ခုကို ဖျက်သိမ်းခဲ့ကြောင်း သိရသည်။

Source: Reuters