အာဏာသိမ်းစစ်ခေါင်းဆောင် မင်းအောင်လှိုင် ဦးဆောင်သည့် စစ်အုပ်စုမှ အာဏာသိမ်းပြီးနောက် ကရင်ပြည်နယ်အတွင်း ကရင်အမျိုးသားအစည်းအရုံး(KNU)၏ အုပ်ချုပ်နယ်မြေတွင် (၂)နှစ်တာကာလအတွင်း တိုက်ပွဲပေါင်း (၈၀၃၈)ကြိမ်ဖြစ်ပွားရာ အာဏာသိမ်း စစ်အုပ်စုဘက်က (၆၈၇၆)ဦး သေဆုံးကြောင်း ၂၀၂၃ခုနှစ် ဖေဖော်ဝါရီလ(၉)ရက်နေ့တွင် KNU ဗဟိုက သတင်းထုတ်ပြန်လာသည်။ 

၂၀၂၁ ခုနှစ် ဖေဖော်ဝါရီလ (၁)ရက်တွင် စစ်အုပ်စုမှ အာဏာသိမ်းယူပြီးနောက် ၂၀၂၃ ခုနှစ် ဖေဖော်ဝါရီလ (၁)ရက်အထိ (၂)နှစ်အတွင်း ကရင်အမျိုးသားလွတ်ရေးတပ်မတော်( Karen National Liberation Army - KNLA )၊ ကရင် အမျိုးသားကာကွယ်ရေးတပ်ဖွဲ့ (  Karen National Defense Organization - KNDO ) တို့နှင့် နေ့စဥ်တိုက်ပွဲများဖြစ်ပွားခဲ့ကြောင်း သိရသည်။ 

၂၀၂၁ ခုနှစ် ဖေဖော်ဝါရီလ (၁)ရက်မှ ၂၀၂၃ ခုနှစ် ဖေဖော်ဝါရီလ (၁) ရက်နေ့အထိ (၂)နှစ်အတွင်း တပ်မဟာ(၁)နယ်မြေ၌ တိုက်ပွဲပေါင်း (၈၀၁)ကြိမ်ဖြစ်ပွားခဲ့ပြီး စစ်ကောင်စီတပ်သား(၁၅၂၆) ဦးသေကြောင်း သိရသည်။

တပ်မဟာ (၂)နယ်မြေ၌ တိုက်ပွဲပေါင်း  (၂၇၇)ကြိမ် ဖြစ်ပွားခဲ့ပြီး စစ်ကောင်စီတပ်သား(၅၀၅)ဦးသေဆုံးကာ တပ်မဟာ (၃)နယ်မြေ ၌ တိုက်ပွဲပေါင်း (၅၂၅) ကြိမ်ဖြစ်ပွားခဲ့ပြီး စစ်ကောင်စီတပ်သား (၆၀၆) ဦးသေကြောင်း သိရသည်။

တပ်မဟာ (၄)နယ်မြေအတွင်း တိုက်ပွဲပေါင်း (၁၃၁) ကြိမ်ဖြစ်ပွားခဲ့ပြီး စစ်ကောင်စီတပ်သား(၂၅၉)ဦးသေဆုံးကာ တပ်မဟာ (၅) နယ်မြေအတွင်း တိုက်ပွဲပေါင်း (၅၆၃၈) ကြိမ်ဖြစ်ပွားခဲ့ကာ စစ်ကောင်စီတပ်သား(၂၇၆၀)ဦးသေကြောင်း သိရသည်။ 

တပ်မဟာ (၆)နယ်မြေအတွင်း တိုက်ပွဲပေါင်း (၆၆၆)ကြိမ်ဖြစ်ပွားခဲ့ပြီး စစ်ကောင်စီတပ်သား (၁၂၂၀)ဦးသေကြောင်း KNU ၏ ထုတ်ပြန်ထားသည့် စာရင်းများအရ သိရသည်။

KNU ဘက်မှ (၂၁၉)ဦးကျဆုံးခဲ့ရပြီး (၆၀၅)ဦးမှာ ထိခိုက်ဒဏ် ရာရရှိခဲ့ကြောင်း သိရသည်။

(၂)နှစ်တာ ကာလအတွင်း၌  မြေပြင်တွင် အထိနာသည့် အာဏာသိမ်းစစ်အုပ်စုသည် လေကြောင်းအားကိုးဖြင့် ဗုံးကြဲတိုက်ခိုက်သည့် အကြိမ်အရေအတွက်မှာလည်း များပြားကြောင်း သိရသည်။

ပုံအညွှန်း - KNU အုပ်ချုပ်နယ်မြေအတွင်း ဖြစ်ပွားခဲ့သည့် တိုက်ပွဲများထဲက ကော်ဘရာ စစ်ကြောင်း ( Cobra Column )မှ ထုတ်ပြန်ထားသည့် ပုံအချို့ ဖြစ်သည်။

 

Photo: ကော်ဘရာ စစ်ကြောင်း ( Cobra Column )