ကရင်ပြည်နယ်၊ နို့တကောမြို့နယ်တွင် အကြမ်းဖက်စစ်ကောင်စီ၏ တပ်မ(၂၂)နှင့် KNLA တို့ တိုက်ပွဲ (၂)ရက်ဆက်တိုက်ဖြစ်ပြီး စစ်ကောင်စီဘက်က (၄)ဦးသေကာ ဒုတပ်ရင်းမှူးလည်း ဒဏ်ရာရသွားကြောင်း KNU ၏ သတင်းထုတ်ချက်အရ သိရသည်။

နို့တကောမြို့နယ်၊ ရွှေဒိုးရွာသချိုင်းကုန်းအနီးတွင် ယနေ့ မတ်လ (၂၄)ရက်၊ ညနေ (၄)နာရီဝန်းကျင်က အကြမ်းဖက် စစ်ကောင်စီ၏ တပ်မ(၂၂)နှင့် KNLA- တပ်ရင်း (၁၇) လက်အောက်ခံတပ်တို့ တိုက်ပွဲဖြစ်ပြီး စစ်ကောင်စီတပ်သား(၂)ဦး သေကြောင်း KNU က ထုတ်ပြန်သည်။

ယမန်နေ့ မတ်လ (၂၃)ရက်ကလည်း မော်လမြိုင်မှ တက်လာသည့်  စစ်ကောင်စီတပ်မ(၂၂)၏ (၆)ဘီးကား (၅)စီး၊ (၄)ဘီးကား (၁)စီးကို KNLA တပ်ရင်း (၁၇)လက်အောက်ခံတပ်က သံပုရာကျေးရွာအပြင်ဘက်တွင် တိုက်ခိုက်ခဲ့သေးသည်။

ယင်းတိုက်ပွဲတွင် အာဏာသိမ်းစစ်ကောင်စီတပ်မှ (၂)ဦးသေဆုံးကာ၊ ဒုတပ်ရင်းမှူးအပါအဝင် (၂)ဉီး ထိခိုက်ဒဏ်ရာရရှိခဲ့ကြောင်း သိရသည်။