မြန်မာနိုင်ငံရုပ်ရှင်အစည်းအရုံး၏ ဥက္ကဌ တာဝန်ကို ယူထားသည့် အသက်(၆၈)နှစ်ရှိ ဦးညီညီထွန်းလွင်သည် လက်ရှိ ကျန်းမာရေးအခြေအနေကြောင့် ဥက္ကဌအဖြစ် ဆက်လက်တာဝန်ထမ်းဆောင်ရန် မသင့်လျော်တော့သည့်အတွက် တာဝန်မှ နှုတ်ထွက်အနားယူခွင့်ပြုရန် ၂၀၂၁ခုနှစ် မေလ(၈)ရက်နေ့ ရက်စွဲဖြင့် တင်ပြလာသည့် စာကို လက်ခံရရှိကြောင်း မြန်မာနိုင်ငံရုပ်ရှင်အစည်းအရုံးက မေလ(၁၁)ရက်နေ့တွင် အသိပေးထုတ်ပြန်ထားရှိသည်။

ဦးညီညီထွန်းလွင် နှုတ်ထွက်သည့် ကိစ္စနှင့် ပတ်သက်၍ မြန်မာနိုင်ငံရုပ်ရှင်အစည်းအရုံးက

၁၁.၅.၂၀၂၁ နေ့တွင်ပြုလုပ်သော အထူးအစည်းအဝေးအမှတ် ၃/၂၀၂၁ မှ လက်ခံအတည်ပြုပါသည်။

ဟုသာ ၂၀၂၁ခုနှစ် မေလ(၁၁)ရက်နေ့ နေ့လည်(၁း၄၆)နာရီအချိန်က အသိပေးထားခြင်းဖြစ်သည်။

မြန်မာနိုင်ငံရုပ်ရှင်အစည်းအရုံး(Myanmar Motion Picture Organization)တွင် ဥက္ကဌများအဖြစ် ၂၀၀၅ခုနှစ်မှ ၂၀၀၇ခုနှစ်အထိ ဦးကြည်စိုးထွန်း၊ ၂၀၀၇ခုနှစ်မှ ၂၀၁၂ခုနှစ်အထိ ဦးမြင့်သိန်းဖေ၊ ၂၀၁၂ခုနှစ်မှ ၂၀၁၉ခုနှစ်အထိ ဦးဇင်ဝိုင်း၊ ၂၀၁၃ခုနှစ်မှ ၂၀၁၇ခုနှစ်အထိ ဦးလူမင်း၊ ၂၀၁၉ခုနှစ်မှ ၂၀၂၁ခုနှစ်အထိ ဦးညီညီထွန်းလွင်တို့ တာဝန်ထမ်းဆောင်ခဲ့ကြခြင်းဖြစ်သည်။