တာချီလိတ်မြို့ရှိ မယ်ယန်း Covid-19 စစ်ဆေးရေးဂိတ်တွင် ယာဉ်နောက်လိုက် (၁)ဦးထံက ပိုးတွေ့

ရှမ်းပြည်နယ် (အရှေ့ပိုင်း) တာချီလိတ်မြို့အဝင် မယ်ယန်းကျန်းမာရေးစစ်ဆေးရေးစခန်းတွင် ၂၀၂၀ ခုနှစ်၊ ဒီဇင်ဘာလ (၁) ရက်နေ့ နံနက်ပိုင်းက ဝင်လာသည့် ကုန်တင်ယာဉ်မှ ယာဉ်နောက်လိုက်တစ်ဦးထံမှ COVID-19 ရောဂါပိုးတွေ့ရကြောင်း သိရသည်။

ကုန်တင်ယာဉ်မှာ မည်သည့်ဒေသက လာသည်ကို ကျန်းမာရေးနှင့် သက်ဆိုင်ရာက မေးမြန်းနေဆဲဖြစ်ကြောင်း သိရသည်။

တာချီလိတ်မြို့အဝင် မယ်ယန်းဂိတ်၌ တာချီလိတ်မြို့တွင်းဝင်မည့် ကုန်တင်ယာဉ်များမှ ယာဉ်မောင်းနှင့် ယာဉ်နောက်လိုက်များအား တစ်နေ့လျှင် (၂)ကြိမ် စစ်ပေးနေရာ နိုဝင်ဘာလ (၂၉) ရက်နေ့ကလည်း ရန်ကုန် - တာချီလိတ်ပြေးဆွဲနေသည့် မော်တော်ယာဉ်လိုင်းမှ ယာဉ်မောင်း (၁) ဦးတွင်လည်း COVID 19 ပိုးတွေ့သဖြင့် တာချီလိတ်ခရိုင်ပြည်သူ့ဆေးရုံ၌ ကုသပေးနေခြင်းဖြစ်သည်။

တာချီလိတ်မြို့တွင် ဒေသတွင်းကူးစက်မှုအဖြစ် နိုဝင်ဘာလ (၂၅)ရက်နေ့က စတင်တွေ့ရပြီးနောက် ဒီဇင်ဘာလ (၁) ရက်နေ့အထိ ဒေသတွင်းကူးစက်မှုအဖြစ်တွေ့ရသည့် အတည်ပြုလူနာ (၄၅) ဦးရှိနေပြီး အခြားဒေသမှလာ၍ စစ်ဆေးရာမှ တွေ့ရှိသူ (၄)ဦးရှိနေခြင်းဖြစ်၍ စုစုပေါင်း (၄၉)ဦးအထိ ရှိနေသည်။