မဲနှစ်ကြိမ်ပေးသည့် ပညာရေးဝန်ထမ်းနှင့် ဆန္ဒမဲအမှန်ခြစ်တံဆိပ်တုံးအတု အစားထိုးသည့် USDP ၏ မဲရုံကိုယ်စားလှယ်တို့ကို အမှုဖွင့်ထား

၂၀၂၀ ရွေးကောက်ပွဲ ကြိုတင်ဆန္ဒမဲများကို ပယ်မဲဖြစ်စေရန် ရည်ရွယ်ချက်ဖြင့် ပြည်ထောင်စု ရွေးကောက်ပွဲ ကော်မရှင် (UEC)မှ ထုတ်ပေးထားသည့် တံဆိပ်တုံးအား အခြားတံဆိပ်တုံးဖြင့် အစားထိုးလဲလှယ်ခဲ့သည့် USDP ကိုယ်စားလှယ်လောင်း၏ မဲရုံကိုယ်စားလှယ်နှင့် ကြိုတင်မဲ (၂)ကြိမ်ပေးသည့် ပညာရေးဝန်ထမ်း (၁)ဦးတို့အား အမှုဖွင့် အရေးယူထားကြောင်း UEC က ၂၀၂၀ ခုနှစ်၊ နိုဝင်ဘာလ (၃)ရက်နေ့၌ သတင်းထုတ်ပြန်သည်။

ရန်ကုန်တိုင်းဒေသကြီး၊ ရန်ကုန်(မြောက်ပိုင်း)ခရိုင်၊ လှည်းကူးမြို့နယ်ရှိ မြို့မရပ်ကွက် မဲရုံအမှတ် (၂)၌ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၏ လွှတ်တော်ကိုယ်စားလှယ်လောင်း ဦးခင်မောင်စိုး၏ မဲရုံကိုယ်စားလှယ် ဒေါ်အေးမာဝင်း (ခ) မပဲပြားသည် အဆိုပါမဲရုံ၏ ဒုတိယမဲရုံမှူး ဒေါ်တင်တင်ဝင်းအား ပြည်ထောင်စုရွေးကောက်ပွဲကော်မရှင် (UEC)က ထုတ်ပေးထားသည့် အမှတ်ခြစ်တံဆိပ်တုံးအစား UEC တံဆိပ်မပါသည့် အမှတ်ခြစ်တံဆိပ်တုံးဖြင့် အစားထိုးပေးအပ်ခဲ့ပြီး အဆိုပါတံဆိပ်တုံးဖြင့် မဲဆန္ဒရှင် (၃)ဦး ဆန္ဒမဲပေးခဲ့ခြင်းဖြစ်ကြောင်း သိရသည်။

ဧရာဝတီတိုင်းဒေသကြီး၊ မော်လမြိုင်ကျွန်းမြို့နယ်၊ စီးပွားချောင်ကျေးရွာအုပ်စုရှိ ရှော်ချောင်းကျေးရွာမှ အလယ်တန်းပြ ဆရာမ ဒေါ်မိုးမြတ်သူဇာသည် အောက်တိုဘာလ (၃၁)ရက်နေ့က စီးပွားချောင်ကျေးရွာအုပ်စုတွင် ကြိုတင်ဆန္ဒမဲ (၁) ကြိမ်နှင့် ယင်းနေ့မှာပင် မယ်တလိုင်းကျေးရွာအုပ်စု၌ ကြိုတင်ဆန္ဒမဲ (၁)ကြိမ် စုစုပေါင်း မဲ (၂)ကြိမ်ပေးခဲ့ခြင်းဖြစ်ကြောင်း သိရသည်။

အဆိုပါဖြစ်စဉ်များကို စစ်ဆေးတွေ့ရှိရပြီးနောက် ဆန္ဒမဲနှစ်ကြိမ်ပေးခဲ့သည့် အလယ်တန်းပြ ဆရာမနှင့် အမှန်ခြစ်တံတိပ်တုံးအတု ယူဆောင်ပေးအပ်ခဲ့သည့် USDP ကိုယ်စားလှယ်လောင်း၏ မဲရုံကိုယ်စားလှယ်တို့ကို လွှတ်တော်ရွေးကောက်ပွဲဥပဒေပုဒ်မ ၅၉ အရ အမှုဖွင့်အရေးယူထားခြင်းဖြစ်ကြောင်း သိရသည်။