တာချီလိတ်မြို့တွင် ရွေးကောက်ပွဲအတွက် ခန့်ထားသည့် အထူးရဲများကို Covid-19 စစ်မည်

ရှမ်းပြည်နယ် (အရှေ့ပိုင်း) တာချီလိတ်မြို့တွင် ၂၀၂၀ ရွေးကောက်ပွဲကာလ တာဝန်ယူကြမည့် အထူးရဲများကို ၂၀၂၀ ခုနှစ်၊ အောက်တိုဘာလ (၁၂) ရက်နေ့၌ COVID 19 စစ်ဆေးပေးမည်ဖြစ်ကြောင်း သိရသည်။

"ရွေးကောက်ပွဲတာဝန်ကျ အထူးရဲတွေကို စစ်ပေးမယ်။ ကျွန်တော်တို့ကတော့ ဒီမှာ တာချီလိတ်မြို့နယ်အတွက် စစ်ပေးမှာပေါ့။ ခရိုင်အတွင်းက မိုင်းဖြတ်နဲ့ မိုင်းယောင်းကတော့ သူတို့အလုပ်တွေနဲ့ချိန်ပြီး အဆင်ပြေတဲ့နေ့ကို စစ်ကြမှာပါ။ ဒီရက်ပိုင်းအတွင်း စစ်ကြမှာပါ။ နောက် ပညာရေးဝန်ထမ်းတွေကိုလည်း စစ်ပေးဖို့ ပြင်ထားပါတယ်"ဟု တာချီလိတ်ခရိုင်ဆေးရုံအုပ်ကြီး ဒေါက်တာ ခင်ကျော်က တာချီလိတ်သတင်းအေဂျင်စီသို့ ပြောသည်။

ရှမ်းပြည်နယ် (အရှေ့ပိုင်း) တာချီလိတ်ခရိုင်အတွင်း ၂၀၂၀ ခုနှစ်၊ ပါတီစုံဒီမိုကရေစီ အထွေထွေရွေးကောက်ပွဲကာလတွင်မဲရုံ တစ်ရုံလျှင် တစ်ဦးနှုန်းဖြင့် တာဝန်ယူရန်အတွက် တာချီလိတ်မြို့နယ်အတွက် အထူးရဲ (၇၀)ဦး၊ မိုင်းယောင်းမြို့နယ်အတွက် အထူးရဲ (၆၈)ဦးနှင့် မိုင်းဖြတ်မြို့နယ်အတွက် အထူးရဲ (၄၁)ဦး စုစုပေါင်း ရွေးကောက်ပွဲဆိုင်ရာ အထူးရဲတပ်ဖွဲ့ဝင် (၁၇၉) ဦးကို ခန့်အပ်ထားခြင်းဖြစ်သည်။

အဆိုပါ အထူးရဲတပ်ဖွဲ့များသည် ရွေးကောက်ပွဲကာလအတွင်းသာ တာဝန်ထမ်းဆောင်ရန် ခန့်အပ်ထားခြင်းဖြစ်ပြီး မဲရုံတစ်ရုံ တွင် အထူးရဲ(၁)ယောက် မဲရုံ၏ ကိုက်(၅၀၀)အတွင်းထားရှိ၍ ကျန်ရဲတပ်ဖွဲ့များက ကိုက်(၅၀၀)ပြင်ပမှ  လုံခြုံရေးဆောင်ရွက်သွားမည်ဖြစ်ကြောင်း သိရသည်။

ပြီးခဲ့သည့် ၂၀၁၅ ပါတီစုံ အထွေထွေရွေးကောက်ပွဲက တာချီလိတ်ခရိုင်အတွင်း အထူးရဲ စုစုပေါင်း (၁၆၅)ဦးကိုလည်း ခန့်အပ်ထားရှိခဲ့ခြင်းဖြစ်ပြီး  ၂၀၂၀ ခုနှစ် ရွေးကောက်ပွဲတွင် မဲရုံအရေအတွက် တိုးလာ၍ အထူးရဲတပ်ဖွဲ့ဝင် (၁၇၉) ဦးအထိ တိုးမြှင့်ထားခြင်း ဖြစ်သည်။