ရှမ်းပြည်နယ်တွင်း မှန်လုံခရီးသည်တင်ယာဉ်များဖြင့် ကုန်စည်သယ်ယူပို့ဆောင်နိုင်

ရှမ်းပြည်နယ်အတွင်း ကုန်စည်စီးဆင်းမှုအဆင်ပြေစေရန်အတွက် ကုန်ပစ္စည်းတင်ဆောင်ပြေးဆွဲခွင့် ကန့်သတ်ထားခဲ့သည့် ခရီးသည်တင်ယာဉ်များဖြင့် ကုန်ပစ္စည်း သယ်ယူပို့ဆောင်ခွင့်ကို ၂၀၂၀ ခုနှစ်၊ အောက်တိုဘာလ (၁၅) ရက်နေ့မှစ၍ ခွင့်ပြုလိုက်ကြောင်း သိရသည်။ 

“ကားအသေးတွေက ကုန်ပစ္စည်းတင်သွားပြီးရင် အပြန်ကျရင် လူတင်တင်လာတဲ့အတွက် ရောဂါထိန်းချုပ်ရေးအတွက် ကန့်သတ်ထားခဲ့တာ။ အခု စီးပွားရေးအလုပ်အကိုင်ကလည်း သူတို့ ကုန်စိမ်းပို့တဲ့အခါ ကားလေးတွေနဲ့ဆိုရင် (၈)နာရီ၊ (၉)နာရီလောက်ပဲကြာတော့ ခွင့်ပြုပေးဖို့ တောင်းဆိုလာကြတယ်။ ဒီကာလမှာ လုပ်ရကိုင်ရတာ အခက်အခဲလည်း ရှိပါတယ်။ တိုင်းဒေသကြီး၊ ပြည်နယ်တွေကလည်း တစ်ခုနဲ့တစ်ခုကလည်း မတူဘူး။ ရှမ်းပြည်နယ်ကလည်း ကုန်စည်စီးဆင်းမှု အတက်ကား၊ အဆင်းကားကလည်း များတော့ ရောဂါထိန်းချုပ်ဖို့က အရေးကြီးသလို ကုန်စည်စီးဆင်းမှု မပျက်အောင် လိုက်ထိန်းညှိရတော့ ညွှန်ကြားချက်တွေကတော့ ခဏခဏ ပြောင်းလဲရတာလေးတွေတော့ အခက်အခဲရှိတာပေါ့”ဟု ရှမ်းပြည်နယ်အစိုးရအဖွဲ့ဝင် စီမံကိန်းနှင့် ဘဏ္ဍာရေးဝန်ကြီး ဦးစိုးညွန့်လွင်က တာချီလိတ်သတင်းအေဂျင်စီသို့ အောက်တိုဘာလ(၁၅)ရက်နေ့ နေ့လည်ပိုင်းတွင် ပြောသည်။

ရှမ်းပြည်နယ်တွင်း မှန်လုံမော်တော်ယာဉ်များဖြင့် ကုန်စည်ပို့ဆောင်ခြင်းမပြုလုပ်ရန် ညွှန်ကြားထားရာမှ ခရီးသည် (၁၇) ဦးနှင့်အထိ ခရီးသည်တင်ယာဉ်များဖြင့် ကုန်စည်ပို့ဆောင်ခွင့်ပြုကြောင်း အောက်တိုဘာလ (၁၅)ရက်နေ့တွင် ရှမ်းပြည်နယ် COVID 19 ထိန်းချုပ်ရေးနှင့် အရေးပေါ်တုန့်ပြန်ရေးကော်မတီက ညွှန်ကြားလာခြင်းဖြစ်သည်။

ရှမ်းပြည်နယ်တွင်း COVID 19 ထိန်းချုပ်ရေးအတွက် ပြည်နယ်တွင်း ဝင်ထွက်သွားလာသည့် ကုန်တင်ယာဉ်များ၏ ယာဉ်မောင်းနှင့် ယာဉ်နောက်လိုက်များကို COVID 19 စစ်ဆေးခွင့်ပြုပေးနေပြီး ခရီးသည်တင်ယာဉ်ငယ်များဖြင့် ကုန်ပစ္စည်းတင်ဆောင်ပြေးဆွဲခွင့်ကို အောက်တိုဘာလ (၉)ရက်နေ့ ညွှန်ကြားချက်ဖြင့် ကန့်သတ်ထားခဲ့ခြင်းဖြစ်သည်။