တာချီလိတ်တွင် စားသောက်ဆိုင်များကို ည(၁၁)နာရီအထိ ဖွင့်ခွင့်ပေးထားပြီး COVID 19 ကာကွယ် လမ်းညွှန်ချက်လိုက်နာမှု အခြေအနေ  တစ်ရက် (၂)ကြိမ် စစ်မည်

ရှမ်းပြည်နယ် (အရှေ့ပိုင်း) တာချီလိတ်မြို့တွင် စားသောက်ဆိုင်များကို ည (၁၁)နာရီအထိ ဖွင့်ခွင့်ပေးမည်ဖြစ်သော်လည်း COVID 19 ကာကွယ်ရေးဆိုင်ရာလမ်းညွှန်ချက်များအား လိုက်နာမှု အခြေအနေကို နေ့စဉ် (၂)ကြိမ်စစ်ဆေးပြီး လိုက်နာမှုအားနည်းပါက ဆိုင်ပိတ်သိမ်းသည်အထိ အရေးယူမည်ဟု သိရသည်။

“စားသောက်ဆိုင်တွေကို ည (၁၁) နာရီအထိ ဖွင့်လှစ်ရောင်းချခွင့်တော့ပေးမယ်။ ဒါပေမဲ့ ဒီဆိုင်တွေကို နေ့နဲ့ညနဲ့စစ်ဖို့ အဖွဲ့နှစ်ဖွဲ့ခွဲထားတယ်။ COVID 19 ကာကွယ်ရေးညွှန်ကြားချက်နဲ့အညီ ဆောင်ရွက်ခြင်း ရှိ၊ မရှိကိုစစ်မယ်။ ညွှန်ကြားချက်ကို လိုက်နာမှုအားနည်းရင် ဆိုင်ပိတ်သိမ်းသည်အထိ အရေးယူမယ်”ဟု တာချီလိတ်မြို့နယ် Coronavirus Disease 2019 (COVID-19) ကူးစက်ရောဂါထိန်းချုပ်ရေးနှင့် အရေးပေါ်တုန့်ပြန်ရေးကော်မတီ ဥက္ကဌ၊ မြို့နယ်အုပ်ချုပ်ရေးမှူး ဦးချမ်းမြေ့စောက တာချီလိတ်သတင်းအေဂျင်စီသို့ ပြောသည်။

စားသောက်ဆိုင်များအနေဖြင့် COVID-19 ရောဂါမကူးစက်စေရေးအတွက် ဆိုင်အဝင်တွင် လက်ဆေးဘေစင်များထားရှိရန်၊ အပူချိန်တိုင်းကိရိယာများဖြင့် ဆိုင်အဝင်တွင်  အပူချိန်တိုင်းတာစစ်ဆေးရန်၊ စားပွဲဝိုင်းတစ်ခုနှင့်တစ်ခုကြား အကာအရံများထားရှိရန်၊ ကျန်းမာရေးဌာနမှ COVID-19 နှင့်ပတ်သက်သည့် ညွှန်ကြားချက်ဗီနိုင်းများကို အများမြင်သာသည့်နေရာများတွင် ထားရှိရန်၊ ဆိုင်ဝန်ထမ်းများ Mask တပ်ဆင်ရန်၊ စားသောက်ဆိုင်ဖြစ်ပါက စားပွဲထိုးနှင့် ငွေကောက်ခံသူကို သီးသန့်ထားရှိရန် စသည့်အချက်များကို လိုက်နာမှုရှိ၊မရှိ စစ်ဆေးနေခြင်းဖြစ်သည်။

COVID 19 ကာကွယ်ရေးညွှန်ကြားချက်များအတိုင်း လိုက်နာဆောင်ရွက်ထားမှုများကို မြို့နယ်အုပ်ချုပ်ရေးဦးစီးဌာန၊ မြို့နယ်စည်ပင်သာယာရေးဌာနနှင့် ပြည်သူ့ကျန်းမာရေးဦးစီးဌာနတို့ပါဝင်သည့်အဖွဲ့ဖြင့် လိုက်လံစစ်ဆေးမှုများလုပ်ဆောင်နေရာမှ နေ့စဉ် နံနက်၊ ည နှစ်ကြိမ် တိုးမြှင့်စစ်ဆေးမည်ဟု သိရသည်။

ယခင်စစ်ဆေးမှုများအတွင်း လမ်းညွှန်ချက်ကို လိုက်နာခြင်းမရှိသည့်ဆိုင်အချို့ကို သတိပေးထားခြင်းဖြစ်သည်။

စားသောက်ဆိုင်များအပေါ် စစ်ဆေးတွင် သတ်မှတ်ချက်များအတိုင်း လိုက်နာခြင်း မရှိပါက ပထမအကြိမ်အနေဖြင့် သတိပေးခြင်း၊ ဒုတိယအကြိမ်အနေဖြင့် ဆိုင်(၃)ရက်ပိတ်သိမ်းခြင်း၊ တတိယအကြိမ်အနေဖြင့် သဘာဝဘေးအန္တရာယ်ဆိုင်ရာစီမံခန့်ခွဲမှုဥပဒေဖြင့် အရေးယူသွားမည်ဖြစ်ကြောင်း အသိပေးထားရှိသည်။