ရှမ်းပြည်နယ်(အရှေ့ပိုင်း) ကျိုင်းတုံနှင့် တာချီလိတ် ပြည်သူ့ဆေးရုံများတွင် ၂၀၂၀ ခုနှစ်၊ စက်တင်ဘာလအတွင်း COVID 19 ဓာတ်ခွဲစစ်ဆေးနိုင်တော့မည်ဖြစ်ကြောင်း သိရသည်။

“ရက်ပိုင်းအတွင်းမှာ ကျွန်တော်တို့ Test စ Run (ဓာတ်ခွဲစစ်ဆေးမှု စတင်စမ်းသပ်) တော့မယ်။ စက်လည်း ဆင်ပြီးပြီ။ ဓာတ်ခွဲယူတဲ့သူလည်းရှိတယ်။ ဒီတစ်ခါ ဓာတ်ခွဲစပို့တာနဲ့ ဒီဘက်မှာလည်း စစ်မယ်။ ရန်ကုန်မှာလည်း စစ်မယ်။ အနည်းဆုံး (၁၀)ယောက်စစ်မယ်။ အဖြေက ရန်ကုန်နဲ့ ကျွန်တော်တို့ အတူတူဖြစ်ရင် စစ်ဆေးလို့ရပြီ”ဟု တာချီလိတ်ခရိုင်ပြည်သူ့ဆေးရုံအုပ်ကြီး ဒေါက်တာ ခင်ကျော်က တာချီလိတ်သတင်းအေဂျင်စီသို့ ၂၀၂၀ ခုနှစ်၊ စက်တင်ဘာလ (၂)ရက်နေ့တွင် ပြောသည်။

အမျိုးသားတီဘီရောဂါတိုက်ဖျက်ရေးစီမံကိန်းအတွက် ပြည်သူ့ဆေးရုံများတွင် အသုံးပြုလျက်ရှိသော GeneXpert စက်များဖြင့် COVID 19 စစ်ဆေးနိုင်ရန် လိုအပ်သည့်ပစ္စည်းများကို ဆေးသုတေသနဦးစီးဌာနက ပံ့ပိုးပေးပြီး စစ်ဆေးမှုများကို ပြည်သူ့ဆေးရုံအချို့၌ စတင်နေပြီး ရှမ်းပြည်နယ်အရှေ့ပိုင်းတွင်လည်း ကျိုင်းတုံနှင့် တာချီလိတ်တွင် စတင်မည်ဖြစ်ကြောင်း သိရသည်။

“စက်က ကျိုင်းတုံ ကျွန်တော်တို့ ပြည်နယ်ရုံးမှာ ရှိမယ်။  စက်က ရှိတာကြာလှပြီ။ Cartridge ကလည်း သူတို့ ပို့ထားပြီးသား။ သင်တန်းတက်နေတဲ့ ဝန်ထမ်းရောက်ရင် စစစ်လို့ရပြီ” ဟု ရှမ်းပြည်နယ်(အရှေ့ပိုင်း) ပြည်သူ့ကျန်းမာရေးဦးစီးဌာနမှ လက်ထောက်ညွှန်ကြားရေးမှူး ဒေါက်တာဘစိုးသက်က ပြောသည်။

ယခင်က ဓာတ်ခွဲစစ်ဆေးခြင်းအား ရန်ကုန်၊ မန္တလေး၊ မော်လမြိုင်ရှိ ဓာတ်ခွဲဌာနများတွင်သာ စစ်ဆေးနေရာမှ  အမျိုးသားတီဘီတိုက်ဖျက်ရေးစီမံကိန်းအတွက် အသုံးပြုနေသည့် GeneXpert စက်များဖြင့် မြို့နယ်များရှိ ပြည်သူ့ဆေးရုံကြီးများတွင်ပါ စစ်ဆေးလာခြင်းဖြစ်သည်။