ရှမ်းပြည်နယ်(အရှေ့ပိုင်း) တာချီလိတ်မြို့တွင် ၂၀၂၀ ခုနှစ်၊ မေလ (၁၃)ရက်နေ့ ညနေပိုင်းက မိုးသက်လေပြင်းနှင့် မိုးသီးကျမှုကြောင့် လျှပ်စစ်ဓါတ်အားတိုင်များ ပြိုလဲသွားခြင်းကြောင့် မေလ(၁၄)ရက်နေ့ နေလည်ပိုင်းအထိ ဓါတ်တိုင်များ အစားထိုးလဲလှယ် ပြုပြင်နေသဖြင့် လျှပ်စစ်ဓါတ်အား ပြတ်တောက်နေသည့် အချို့အပိုင်းများကို မေလ (၁၄)ရက်နေ့ ညနေပိုင်း၌ ဓါတ်အားပြန်လွှတ်နိုင်ဖွယ်ရှိကြောင်း သိရသည်။
“အခုက ပြင်နေတာက ကျင်းတူး၊ တိုင်စိုက်တွေ လုပ်နေရတာ။ ညနေတော့ မီးပြန်လွှတ်နိုင်ဖို့တော့ ကြိုးစားနေတယ်။ မီးလင်းရေးရုံးရော၊ ရုံးခွဲကရော ပေါင်းပြီး ပြင်နေကြတယ်။ မီးလင်းရေးရုံးကပါ လာကူပေးနေတယ်။ လတ်တလော မီးဖြတ်ထားရတာက လွယ်စတုံ၊ ပန်စလိ၊ ယန်းခေါင်၊ အောင်ပင်လယ်၊ နောက် တော်ကော့အတွင်းပိုင်းက နည်းနည်းပါမှာပေါ့”ဟု တာချီလိတ်မြို့မီးလင်းရေးရုံး(ရုံးခွဲ)မှ ပြင်ပဆက်ဆံရေးတာဝန်ခံ ဦးမျိုးမြင့်ဦးက တာချီလိတ်သတင်းအေဂျင်စီသို့ ပြောသည်။
တာချီလိတ်မြို့တွင် မေလ (၁၃)ရက်နေ့ ညနေပိုင်းက လေပြင်းတိုက်ခတ်မှုကြောင့် သစ်ပင်၊ သစ်ကိုင်းများကြိုးပြီး လျှပ်စစ်မီးတိုင်အချို့ ပြိုလဲကျသွားခဲ့ကာ တစ်မြို့လုံး နာရီအနည်းငယ် လျှပ်စစ်မီးပြတ်တောက်သွားခဲ့ခြင်းဖြစ်သည်။
Tachileik News Agency
ဓါတ်ပုံ - မီးလင်းရေး
