သီပေါမြို့နယ် ကုံးမုံကျေးရွာအနီးတွင် သေနတ်ဒဏ်ရာများဖြင့် သေဆုံးနေသည့်
အမျိုးသားနှစ်ဦး အလောင်းများ တွေ့ရှိ
ရှမ်းပြည်နယ် ( မြောက်ပိုင်း ) သီပေါမြို့နယ်၊ ကုံးမုံကျေးရွာအနီး မန္တလေး - လားရှိုး လမ်းမကြီးဘေးရှိ တောင်ယာတဲတစ်ခုတွင် သေနတ်ဒဏ်ရာများဖြင့် သေဆုံးနေသည့် အမျိုးသားနှစ်ဦးကို ၂၀၂၀ ခုနှစ်၊ ဇန်နဝါရီလ (၁၁) ရက်နေ့ နေ့လယ်ပိုင်းက တွေ့ရသဖြင့် ရဲတပ်ဖွဲ့က စုံစမ်းဖေါ်ထုတ်နေကြောင်း သိရသည်။
သီပေါမြို့နယ်အတွင်း မန္တလေး - လားရှိုးလမ်းမကြီးဘေး ကွန်ခိုက်ကျေးရွာအုပ်စု၊ ကုံးမုံကျေးရွာအနီးရှိ တောင်ကုန်းတစ်ခုပေါ်မှ တောင်ယာတဲတစ်ခုအတွင်း သေနတ်ဒဏ်ရာဖြင့် သေဆုံးနေသည့် အသက် (၃၅)နှစ်အရွယ်အမျိုးသားတစ်ဦးနှင့် တောင်ယာတဲအပြင်ဘက်တွင် သေနတ်ဒဏ်ရာဖြင့် သေဆုံးနေသည့် အသက် (၅၀)ဝန်းကျင် အမျိုးသားတစ်ဦးတို့ကို တွေ့ရခြင်းဖြစ်ကြောင်း သိရသည်။
“တစ်ယောက်က ချိုင်းအောက်မှာ သေနတ်ဒဏ်ရာ၊ နောက်တစ်ယောက်က ဦးခေါင်းမှာရတဲ့ သေနတ်ဒဏ်ရာ တွေ့တယ်။ ကျန်တဲ့နေရာတွေလည်း ဒဏ်ရာတွေ ရှိသေးတယ်”ဟု အလောင်းများကို သယ်ဆောင်ပေးခဲ့သည့် နယ်စည်းမခြား ပရဟိတ အသင်း (သီပေါ) မှ ကိုမျိုးက တာချီလိတ်သတင်းအေဂျင်စီသို့ ပြောသည်။
အဆိုပါ အခင်းဖြစ်ရပ်နှင့်ပတ်သက်၍ သီပေါမြို့နယ်နှင့် မြို့မရဲတပ်ဖွဲ့တို့မှ တာဝန်ရှိသူများက ဖေါ်ထုတ်နေကြဆဲဖြစ်ကြောင်း သိရသည်။
ကုံးမုံကျေးရွာအနီးတွင် ၂၀၁၉ ခုနှစ်၊ ဒီဇင်ဘာလ (၂၈) ရက်နေ့ကလည်း ပြည်ထောင်စုလမ်းမကြီးဘေး ကျွန်းတောတစ်ခုအတွင်း သေနတ်ဒဏ်ရာဖြင့် သေဆုံးနေသည့် အမျိုးသား (၃) ဦးအလောင်းများကို တွေ့ရှိခဲ့မှုကိုလည်း ရဲတပ်ဖွဲ့က ဖေါ်ထုတ်နေဆဲဖြစ်သည်။
Tachileik News Agency
သတင်း နေဖြိုးမြင့်
photo/ ကိုသန့်နေလတ်
