မိုင်းလင်းဆရာတော်၏ ဝိဇာတမွေးနေ့အလှူအဖြစ် ကျိုင်းတုံ နှင့် တာချီလိတ်မှ
ညမီးကျည်(၄)လုံး လွှတ်တင် ပူဇော်
ရှမ်းပြည်နယ် (အရှေ့ပိုင်း)၊ တာချီလိတ်မြို့နယ်၊ မိုင်းလင်း(အနောက်) ကျေးရွာရှိ အဂ္ဂမဟာသဒ္ဓမ္မဇောတိကဓဇ ဘဒ္ဒန္တဝိမလ(မိုင်းလင်းဆရာတော်)၏ ကျောင်းတိုက်တွင် ဆရာတော်၏ ဝိဇာတမွေးနေ့အလှူအဖြစ် ၂၀၂၀ ခုနှစ် ဇန်နဝါရီလ (၈) ရက်နေ့ ညပိုင်းတွင် တာချီလိတ်နှင့်ကျိုင်းတုံမှ မီးပုံးပျံအဖွဲ့(၄)ဖွဲ့က ညမီးကျည် (၄)လုံး လွှတ်တင်ပူဇော်ကြသည်။
မိုင်းလင်းဆရာတော်၏ မွေးနေ့ပူဇော်သည့် အနေဖြင့် ကျိုင်းတုံမြို့မှ နှင်းခဲမီးအဖွဲ့၊ တာချီလိတ်မြို့မှ ညောင်ညိုရိပ်မီးအဖွဲ့၊ ရှယ်ထောမီးအဖွဲ့ နှင့် ဆန်းပြားလူငယ်မီးအဖွဲ့တို့က ညမီးကျည် မီးပုံးပျံ(၄)လုံးကို လွှတ်တင်ခဲ့ကြခြင်းဖြစ်သည်။
သက်တော်(၆၀)နှစ် ဝါတော်(၃၀)ရှိ အဂ္ဂမဟာသဒ္ဓမ္မဇောတိကဓဇ ဘဒ္ဒန္တဝိမလ(မိုင်းလင်းဆရာတော်) အား ထပ်ဆင့် ဂုဏ်ပြုပူဇော်ပွဲနှင့် ဝိဇာတမွေးနေ့ အလှူတော်ပွဲအား ၂၀၂၀ ခုနှစ်၊ ဇန်နဝါရီလ (၄) ရက်နေ့မှစ၍ ဇန်နဝါရီလ (၈) ရက်နေ့အထိ ဆရာတော်၏ ကျောင်းတိုက်၌ ကျင်းပခဲ့ခြင်းဖြစ်ပြီး ဇန်နဝါရီလ(၈)ရက်နေ့ နံနက်(၉)နာရီ အချိန်တွင် သာသနာအေးရိပ်ငြိမ်းမုခ်ဦးအား ထီးတော်တင်ပြီး ညပိုင်းတွင် ညမီးကျည်မီးပုံးပျံများ လွှတ်တင်ခြင်းဖြစ်သည်။
Tachileik News Agency
