၄၅ ကြိမ်မြောက် အာခါတိုင်းရင်းသားစုပေါင်းနှစ်သစ်ကူးပွဲတော် ကော်မယ်လိတ်ကျေးရွာတွင် ကျင်းပမည်
ရှမ်းပြည်နယ် (အရှေ့ပိုင်း) တာချီလိတ်မြို့၊ မိုင်းကိုးကျေးရွာအုပ်စုရှိ ကော်မယ်လိတ်ကျေးရွာတွင် (၄၅)ကြိမ်မြောက် အာခါတိုင်းရင်းသားစုပေါင်းနှစ်သစ်ကူးပွဲတော်ကို ၂၀၁၉ ခုနှစ်၊ ဒီဇင်ဘာလ (၂၈)ရက်နေ့တွင် ကျင်းပသွားမည်ဖြစ်သည်။
“ အာခါယဉ်ကျေးမှု ဗဟိုကော်မတီက အာခါနှစ်သစ်ကူးပွဲတော်ကို ဒီနှစ်ကနေစပြီးတော့ မြို့နယ်တိုင်းမှာ ကျင်းပသွားနိုင်ဖို့ ရည်ရွယ်ထားတယ်။ နှစ်စဉ်နှစ်တိုင်း ကျိုင်းတုံမှာလုပ်နေတဲ့ စုပေါင်းနှစ်သစ်ကူး ပွဲတော်ကိုတော့ ဒီဘက်က အာခါတိုင်းရင်းသားတွေ အကုန်မသွားနိုင်ဘူး။ ကိုယ်စားလှယ်အနေနဲ့ဘဲ အနည်းအကျဉ်းက သွားနိုင်ကြတယ်။ ဒါကြောင့် တာချီလိတ်မြို့နယ်ထဲမှာရှိတဲ့ အာခါတိုင်းရင်းသား ညီအကိုတွေအားလုံး ဒီနှစ်မှာတော့ အာခါတိုင်းရင်းသားစုပေါင်းနှစ်သစ်ကူးပွဲတော်မှာ ပါဝင်နိုင်အောင် ကျင်းပတာဖြစ်ပါတယ်”ဟု ပွဲဖြစ်မြောက်ရေးကော်မတီ အတွင်းရေးမှူး ဦးယာကုပ်က တာချီလိတ်သတင်းအေဂျင်စီသို့ ပြောသည်။
အဆိုပါနှစ်သစ်ကူးပွဲတော်ကို အာခါစာပေနှင့် ယဉ်ကျေးမှုဗဟိုကော်မတီ၏ လမ်းညွှန်မှုဖြင့် ပွဲဖြစ်မြောက်ရေး ကော်မတီတစ်ရပ်ဖွဲ့စည်းကာ စီစဉ်ကျင်းပခြင်းဖြစ်ပြီး ဒီဇင်ဘာလ (၂၈)ရက်နေ့ နံနက် (၁၀) နာရီမှ စတင်ကာ အာခါတိုင်းရင်းသား အဆိုတော်များနှင့် အာခါရိုးရာအကများဖြင့် ဖျော်ဖြေမည်ဖြစ်ကြောင်း သိရသည်။
အာခါနှစ်သစ်ကူးပွဲတော်ကို ၁၉၇၅ ခုနှစ်၊ ဒီဇင်ဘာလ (၂၈) ရက်နေ့တွင် ကျိုင်းတုံမြို့ရှိ စွမ်စပ်ကုန်းတွင် ကတ်သလစ်လူငယ်များမှ စတင်ကျင်းပပြီးနောက် ဒီဇင်ဘာလ(၂၈)ရက်နေ့ကို အာခါနှစ်သစ်ကူးနေ့အဖြစ် စတင်သတ်မှတ်၍ ကျင်းပလာခြင်းဖြစ်ကြောင်း သိရသည်။
မြန်မာနိုင်ငံတွင် ရှမ်းပြည်နယ်အရှေ့ပိုင်းဒေသများ၌ အများဆုံးနေထိုင်ကြသည့် အာခါတိုင်းရင်းသားများ၏ နှစ်သစ်ကူးပွဲတော်များကို ဒေသအလိုက် ကျင်းပနေကြခြင်းဖြစ်သည်။
Tachileik News Agency
သတင်း - ဇွဲမြတ်
ဓါတ်ပုံ - ဆန်းဖြိုးထွန်း
တာချီလိတ်တွင် ကျင်းပပြုလုပ်မည့် အာခါတိုင်းရင်းသားရိုးရာ နှစ်သစ်ကူးပွဲတော်အတွက် ကြိုတင်ပြင်ဆင်နေ
မိုင်းဆတ်မြို့တွင် အာခါတိုင်းရင်းသားရိုးရာ စုပေါင်းနှစ်သစ်ကူး(ခါးထောင်းဖား)ပွဲတော် ကျင်းပ
အာခါတိုင်းရင်းသား စုပေါင်းနှစ်သစ်ကူးပွဲတော် “အမျိုးသားနေ့” ကျိုင်းတုံမြို့တွင် ဒီဇင်ဘာလအတွင်း ကျင်းပမည်
