ရှမ်းပြည်နယ်(မြောက်ပိုင်း) ကျောက်မဲမြို့နယ်အတွင်း ပြည်ထောင်စုလမ်းမကြီးပေါ်တွင် ၂၀၁၉ ခုနှစ်၊ နိုဝင်ဘာလ (၂) ရက်နေ့ နံနက်ပိုင်းက နွားများတင်ဆောင်လာသည့် မော်တော်ယာဉ်တစ်စီးကို လမ်းဘေးမှ ချောင်းမြောင်း ပစ်ခတ်မှုကြောင့် တစ်ဦးသေဆုံး၊ နှစ်ဦးဒဏ်ရာရပြီး ယာဉ်တိမ်းမှောက်ကာ နွား (၃)ကောင်လည်း သေဆုံးသွားသည်။

ကျောက်မဲဘက်မှ သီပေါဘက်သို့ ပြည်ထောင်စုလမ်းမကြီးအတိုင်း မောင်းနှင်လာသည့် နွားတင်ယာဉ်ကို နံနက် (၈) နာရီ (၁၅) မိနစ်ဝန်းကျင်က ချောင်းချောက်ကျေးရွာနှင့် နောင်အန်းကျေးရွာ အကြားရောက်ရှိစဉ် လမ်းဘေးခြုံအတွင်းမှ လက်နက်ငယ်များဖြင့်ပစ်ခတ်၍ ယာဉ်မောင်းမှာ နေရာတွင် သေဆုံးသွားခဲ့ရသည်။

ပစ်ခတ်မှုကြောင့် ယာဉ်ပေါ်ပါအမျိုးသား (၂) ဦးလည်း ဒဏ်ရာများရရှိသွား၍ ကျောက်မဲပြည်သူ့ဆေးရုံတွင် ကုသမှုခံယူနေကာ ၎င်းတို့အနက် တစ်ဦးမှာ ဒဏ်ရာပြင်းထန်ကြောင်း သိရသည်။
အဆိုပါ (၁၂) ဘီးယာဉ်သည် အဆိုပါ နွားတင်ယာဉ်တွင် ပုလဲရွှေဝါကုမ္ပဏီက တရားဝင် တင်ပို့သည့် နွား အကောင် (၂၀) ကို သယ်ဆောင်လာခြင်းဖြစ်ကြောင်း သိရသည်။

ချောင်းမြောင်းပစ်ခတ်မှုကြောင့် (၁၂) ဘီးယာဉ်သည် လမ်း၏ယာဘက်သို့ထိုးကျ တိမ်းစောင်းသွားကာ နွားများပေါ်ဖိမိသွားပြီး ယာဉ်ပေါ်ပါ နွား (၃) ကောင်လည်းသေဆုံးသွားသည်ဟု သိရသည်။

သေဆုံးနှင့် ဒဏ်ရာရသူများကို သီပေါလူငယ် ပရဟိတအဖွဲ့နှင့် နမ့်ခုံးရှမ်းများအသင်း(ကျောက်မဲ)တို့က အခင်းဖြစ်နေရာမှ သယ်ယူကာ ကျောက်မဲပြည်သူ့ဆေးရုံသို့ ပို့ဆောင်ပေးထားခြင်းဖြစ်သည်။

ကျွဲနွားများကို တရုတ်နိုင်ငံသို့ တရားဝင်တင်ပို့ခွင့်ပြုလိုက်ပြီးနောက် ရှမ်းပြည်နယ်မြောက်ပိုင်း ပြည်ထောင်စု လမ်းမကြီးတလျှောက် နောင်ချို - ကျောက်မဲ လမ်းပိုင်းနှင့် ကျောက်မဲ- သီပေါ လမ်းပိုင်းတွင် နွားတင်လာသော မော်တော်ယာဉ်များအား ချောင်းမြောင်းပစ်ခတ်မှုများ မကြာခဏဖြစ်ပွားခြင်းကြောင့် သေဆုံးမှုများရှိသော်လည်း ပစ်ခတ်သူများကို ထုတ်ဖေါ်နိုင်ခြင်းမရှိသေးဘဲဖြစ်နေသည်။

သတင်း #နေဖြိုးမြင့်