ရှမ်းပြည်နယ် (အရှေ့ပိုင်း) မိုင်းဆတ်နှင့် တာချီလိတ် ခရိုင်ချင်းဆက်လမ်း ပြင်ဆင်ရေးအတွက် ၂၀၁၉ - ၂၀၂၀ ဘဏ္ဍာနှစ်တွင် ပြည်ထောင်စုနှင့် ပြည်နယ်ရန်ပုံငွေ စုစုပေါင်း ကျပ်သန်း(၃၄၇၃ ဒဿမ ၅၇) ခွင့်ပြုပေးထားရာ သွားလာရအခက်ခဲဆုံး (၅)မိုင်ခွဲကို ကွန်ကရစ်လမ်းခင်းပြီး ကျန်လမ်းပိုင်းများကို ရာသီမရွေးသွားလာနိုင်ရန် ပြင်မည်ဟု သိရသည်။

“မိုးရာသီမှာ သွားလာခက်ခဲတဲ့လမ်းပိုင်း (၁၂) နေရာ (၈ ဒဿမ ၈၉၃) ကီလိုမီတာ မိုင်အားဖြင့် (၅)မိုင်ခွဲကို ကွန်ကရစ်ခင်းပြီး ကျန်တဲ့လမ်းပိုင်းတွေကို ခရီးသွားပြည်သူတွေ ရာသီမရွေး အဆင်ပြေစွာ သွားလာနိုင်အောင် အထူးပြုပြင် ဆောင်ရွက်ပေးသွားမှာပါ” ဟု မိုင်းဆတ်မြို့နယ် လမ်းဦးစီးဌာနမှ ဦးစီးအရာရှိ ဒေါ်သူဇာခိုင်က ပြောသည်။

၂၀၁၉ -၂၀၂ဝ ဘဏ္ဍာနှစ်တွင် မိုင်းဆတ် - တာချီလိတ်လမ်းအတွက် ပြည်ထောင်စု ရန်ပုံငွေ ကျပ်သန်း(၁၆၄၈) နှင့် ပြည်နယ်ရန်ပုံငွေ ကျပ်သန်း (၁၈၂၅ ဒဿမ ၅၇) စုစုပေါင်း ကျပ်သန်း (၃၄၇၃ ဒဿမ ၅၇) ကို ခွင့်ပြုပေးထားခြင်းဖြစ်သည်။

“မိုင်းဆတ်-တာချီလိတ်ကားလမ်းကို လမ်းဦးစီးဌာနက တာဝန်ယူပြီးနောက် အရင်လောက်သွားလာရ မဆိုး ဘူးဆိုပေမဲ့ မိုးရွာရင် လမ်းကချော်ပြီး အချို့နေရာတွေမှာ ချိုင့်ခွက်တွေက ရှောင်လို့ကို မလွတ်ဘူး။ တစ်လှိမ့်ချင်း မောင်းနေရလို့ မိုင် (၆၀) ကျော်ရုံလေးရှိတဲ့လမ်းကို (၅) နာရီခွဲလောက် မောင်းနေရတယ်။ အခုလို မိုးရာသီမှာ သွားလာရခက်ခဲတဲ့လမ်းပိုင်းတွေကို ကွန်ကရစ်ခင်းပေးပြီး ရာသီမရွေးသွားလာနိုင်အောင် ပြုပြင်ပေးမယ်ဆိုတော့ ဝမ်းသာတာပေါ့ဗျာ။ အမြန်ဆုံးပြုပေးပါလို့လည်း တောင်းဆိုပါတယ်”ဟု  တာချီလိတ် - မိုင်းဆတ်လမ်း ပြေးဆွဲမေင်းနှင်နေသည့် ယာဉ်မောင်းတစ်ဦးက ပြောသည်။

အဆိုပါလမ်းကို "ဝ"အထူးဒေသ(၂)မှ ၁၉၉၈ ခုနှစ်တွင် ဖောက်လုပ်ခဲ့ကာ လမ်းအသုံးပြုခ ကောက်ခံနေခဲ့ခြင်းဖြစ်ပြီး လမ်းမှာဆိုးရွားစွာပျက်စီးလာသဖြင့် ဒေသခံများက အမြန်ဆုံးပြင်ပေးရန် လိုလားလျှက်ရှိရာ ၂၀၁၈ ခုနှစ်၊ နိုဝင်ဘာလ(၃၀)ရက်နေ့တွင် "ဝ"အထူးဒေသ(၂)က ဒေသခံပြည်သူများအတွက် လက်ဆောင်အဖြစ် နိုင်ငံတော်သို့ လွှဲပြောင်းပေးအပ်ခဲ့ခြင်းဖြစ်သည်။

သတင်း၊ဓါတ်ပုံ #သန်းဇော်(မိုင်းဆတ်)