~~~~~~~~⊰❂ Unicode Version ❂⊱~~~~~~~~

“ချစ်ကြည်ရေးတံတား (၁) မှာ ယာဉ်ကြောပိတ်ဆို့မှုကို ဖြေရှင်းနိုင်ရန်အတွက် ယခု ချစ်ကြည်ရေးတံတား (၂)မှာ ကျောင်းကြိုပို့ယာဉ်များနဲ့ လူနာတင်ယာဉ်များ ဖြတ်သန်းခွင့်ပြုနိုင်ခြင်းဟာ နှစ်နိုင်ငံ TBC ဆွေးနွေးပွဲများက ဆွေးနွေးမှုရလဒ်များဖြစ်ပါတယ်။ ဒီအတွက်လည်း တာဝန်ရှိသူများကို ကျေးဇူးတင်ပါတယ်”ဟု ဖွင့်ပွဲအခမ်းအနား တက်ရောက်သည့် ချင်းရိုင်းခရိုင် ဒုခရိုင်အုပ်ချုပ်ရေးမှူး နိုင်ဖာ့စကော်(န်) ဘွန်ယလတ်က ဖွင့်ပွဲအခမ်းအနားတွင် ပြောကြားသည်။

ဖွင့်ပွဲအခမ်းအနားကို မြန်မာစံတော်ချိန် နံနက်(၅)နာရီခွဲက ချစ်ကြည်ရေးတံတားအမှတ်(၂)တွင် ကျင်းပရာ မြန်မာနိုင်ငံဘက်မှ တာချီလိတ်ခရိုင် ဒုအုပ်ချုပ်ရေးမှူးဦးဆောင်သည့် သက်ဆိုင်ရာတာဝန်ရှိသူများပါဝင်သည့် အဖွဲ့နှင့် ထိုင်းနိုင်ငံဘက်မှ ချင်းရိုင်းခရိုင် ဒုအုပ်ချုပ်ရေးမှူးဦးဆောင်သည့် တာဝန်ရှိသူများအဖွဲ့တို့ တက်ရောက်ကြခြင်းဖြစ်သည်။

“ချစ်ကြည်ရေးတံတား(၁)မှာ ယာဉ်ကြောပိတ်ဆို့မှုကြောင့် နှစ်နိုင်ငံကျောင်းကြိုပို့ယာဉ်နဲ့ လူနာတင်ယာဉ်တွေဟာ အချိန်မီရောက်ဖို့ အခက်အခဲဖြစ်ခဲ့တာ ကြာပါပြီ။ ဒီအတွက် နှစ်နိုင်ငံ ပြည်သူလူထု ဆန္ဒကြောင့် သက်ဆိုင်ရာ တာဝန်ရှိသူများ ဆွေးနွေးမှုအဆင့်ဆင့် လုပ်ခဲ့ပြီးတဲ့နောက် ဒီနေ့ရလဒ် ရလာတာဖြစ်ပါတယ်။ ဒီနေ့ဖွင့်လှစ်ထားတဲ့ ရလဒ်ကိုကြည့်ပြီး မှတ်တမ်းတင်ထားရမှာလည်း ဖြစ်ပါတယ်။ နှစ်နိုင်ငံ ကုန်တင်ပို့ယာဉ်များလည်းရှိတဲ့အတွက် လူနာတင်ယာဉ်၊ ကျောင်းကြိုပို့ယာဉ်များ မလိုလားအပ်တဲ့ ပြဿနာများမဖြစ်အောင် နှစ်နိုင်ငံတာဝန်ရှိသူများက ကြပ်မတ်ဖို့လိုပါတယ်”ဟု တာချီလိတ် ဒုတိယခရိုင်အုပ်ချုပ်ရေးမှူး ဦးဇော်ဝင်းဌေးက ဖွင့်ပွဲတွင် ပြောကြားသည်။

အဆိုပါ ဖွင့်ပွဲ အခမ်းအနားစတင်ချိန်တွင် မြန်မာနိုင်ငံဘက်မှ တာဝန်ရှိသူများနှင့် ယဉ်ကျေးမှုအကအဖွဲ့များက ချစ်ကြည်ရေးတံတား (၂) မြန်မာဘက်ခြမ်းမှ စောင့်ဆိုင်းနေရာသို့ ထိုင်းနိုင်ငံဘက်မှ တာဝန်ရှိသူများနှင့် ထိုင်းကျောင်းသားများ ဘင်ခရာအဖွဲ့က လာရောက်ကြပြီး နှစ်နိုင်ငံနယ်စပ်တွင် တာဝန်ရှိသူများက ဖွင့်လှစ်ကြောင်းကြေညာခြင်း၊ နှစ်နိုင်ငံမှ ကျောင်းကြိုပို့ယာဉ်များနှင့် လူနာတင်ယာဉ်များ စတင်ဖြတ်သန်းခြင်း၊ ထိုင်းနိုင်ငံဘက်ခြမ်းသို့ မြန်မာအဖွဲ့အား ဖိတ်ခေါ်၍ နံနက်စာဖြင့် ကျွေးမွေးဧည့်ခံခြင်း၊ နှစ်နိုင်ငံ လက်ဆောင်ပစ္စည်းများ အပြန်အလှန်လဲလှယ်ခြင်း၊ ထိုင်းနို်င်ငံမှဘင်ခရာအဖွဲ့နှင့် မြန်မာဘက်မှ ရှမ်းရိုးရာယဉ်ကျေးမှုအကများ တင်ဆက်ခြင်းနှင့် တာချီလိတ်ခရိုင် ဒုခရိုင်အုပ်ချုပ်ရေးမှူး ဦးဇော်ဝင်းဌေးက မယ်ဆိုင်မြို့မှ ဆန်ဆို်င်းကျောင်းသို့ အလှူငွေပေးအပ်ခြင်းတို့ ဆောင်ရွက်ကြသည်။

ယခုလို ခွင့်ပြုလိုက်ခြင်းသည် ပထမအဆင့်ဖြစ်ကြောင်းနှင့် ပထမအဆင့် အဆင်ပြေချောမွေ့သွားပါက ဒုတိယအဆင့်အနဖြေင့် အခြားယာဉ်များကိုလည်း စိစစ်ခွင့်ပြုသွားရန် အစီအစဉ်ရှိကြောင်း သိရသည်။

"ဒုတိယအဆင့် မှာတော့ ဒီတံတား(၁)ပေါ်မှာ တကယ် ယာဉ်ကြောကြပ်တည်းမှုမှာ အခက်အခဲဖြစ်နေတဲ့ ယာဉ်တွေကို ကျွန်တော်တို့က စိစစ်ရွေးထုတ်ပြီးတော့ ဘယ်လို ယာဉ်အမျိုးအစားကို တံတား(၂)ကနေ ပေးသင့်သလဲဆိုတာကို ဒုတိယအဆင့်မှာတော့ ဆက်လက်ပြီး ဆောင်ရွက်ဖို့ နိုင်ငံတော်က လူကြီးတွေကို တင်ပြထားပြီး ဖြစ်ပါတယ်၊ ပထမအဆင့် အောင်မြင်သွားတယ်၊ ချောချောမွေ့မွေ့နဲ့ဖြစ်တယ်ဆိုရင် ဒုတိယအဆင့်ကို ဆက်လက်ပြီးတော့ ဆောင်ရွက်မှာ ဖြစ်ပါတယ်"ဟု တာချီလိတ်ခရိုင်အုပ်ချုပ်ရေးမှူး ဦးမြင့်နိုင်က တာချီလိတ်သတင်းအေဂျင်စီသို့ သြဂုတ်လ(၈)ရက်နေ့က ပြောသည်။

မြန်မာ - ထိုင်းနှစ်နိုင်ငံကြား ဖြတ်သန်းသွားလာခြင်းအတွက် ချစ်ကြည်ရေးတံတား အမှတ်(၁)ကိုသာ အသုံးပြုနေရာမှ ယာဉ်ကြောပိတ်ဆို့မှု အချိန်ကြာမြင့်စွာဖြစ်ပွားနေသည့်အတွက် ကုန်သွယ်ရေးအတွက်သာ သီးသန့် အသုံးပြုနေသည့် ချစ်ကြည်ရေးတံတား အမှတ် (၂)မှ နှစ်နိုင်ငံကျောင်းကြိုပို့ယာဉ်များနှင့် လူနာတင်ယာဉ်များကို ပထမဆင့်အနဖြေင့် ဖြတ်သန်းခွင့်ပြုရန် နှစ်နိုင်ငံ သဘောတူထားခြင်းဖြစ်သည်။

Tachileik News Agency
ဓာတ်ပုံ - ချယ်ရီထိုက်၊ ကျော်ဇင်ဟိန်း