“အဲဒီပစ္စည်းတွေက (၈)လကျော်နေပြီ။ ဒါပေမဲ့ အအေးခန်းကွန်တိန်နာဖြစ်လို့ ပျက်စီးမှုတော့ မရှိသေးဘူးပေါ့။ ဖိတဲ့အခြေအနေကြောင့် အောက်ခြေက နည်းနည်းညိုမည်းနေတဲ့ အခြေအနေတွေပဲရှိတယ်။ ပစ္စည်းကတော့ ကောင်းမွန်တဲ့အနေအထားမို့ ကျွန်တော်တို့က လေလံတင်ဖို့ ဆုံးဖြတ်ခဲ့တာ။ အောက်တိုဘာလ (၁)ရက်နေ့က လေလံတင်လိုက်တယ်။ လေလံမအောင်ဘူး။ ဒီတော့ (၂)ရက်နေ့မှာ ဖွင့်ဖေါက် စစ်လိုက်တယ်။ နောက်ထပ် လေလံတင်ဖို့အချိန်ထိ ထားလို့မရဘဲ ဖျက်ဆီးပစ်ရမယ့် အခြေအနေတွေ့လို့ အခုလို ဆုံးဖြတ်လိုက်တာပါ”ဟု ရန်ကုန်တိုင်းဒေသကြီး စားသုံးသူရေးရာဦးစီးဌာန ဒုတိယညွှန်ကြားရေးမှူး ဦးဇေယျာဆွေက အောက်တိုဘာလ (၃)ရက်နေ့တွင် တာချီလိတ်သတင်းအေဂျင်စီသို့ ပြောသည်။

အဆိုပါ အအေးခန်းကွန်တိန်နာ (၈)လုံးဖြင့် သယ်လာသည့် မုန်လာဥနီများကို လုပ်ငန်းရှင်တစ်ဦးက မြန်မာနိုင်ငံမှ တရားဝင်တင်သွင်းခွင့်မရမီ တရုတ်နိုင်ငံမှ သင်္ဘောဖြင့်သယ်လာခဲ့ခြင်းဖြစ်ကြောင်း သိရသည်။

 “ ပြောမယ်ဆိုရင်တော့ သက်ဆိုင်ရာဌာနက အရေးယူလို့ရတယ်။ တင်သွင်းခွင့်မရှိဘဲ နိုင်ငံအတွင်း တင်သွင်းလာတယ်ဆိုရင် အကောက်ခွန်ဥပဒေတို့ ကုန်သွယ်ဥပဒေတို့အရ အရေးယူလို့ရတယ်။ သို့သော် ကျွန်တော်တို့ စားသုံးသူရေးရာဦးစီးဌာနကတော့ စားသုံးသူတွေအတွက် ဘေးအန္တရာယ် ကင်းလား၊ မကင်းလားကို ကျွန်တော်တို့က ကြည့်ပါတယ်။ ဘေးအန္တရာယ်ဖြစ်စေတဲ့အခြေအနေ မတွေ့ရလို့ တင်သွင်းလာတဲ့ ကုန်ပစ္စည်းတွေ မပျက်စီးအောင် လေလံတင်ထုခွဲရောင်းချတဲ့ လုပ်ငန်းစဉ်ကို လုပ်ခဲ့တာပါ”ဟု ရန်ကုန်တိုင်းဒေသကြီး စားသုံးသူရေးရာဦးစီးဌာန ဒုတိယညွှန်ကြားရေးမှူး ဦးဇေယျာဆွေက ပြောသည်။

စိုက်ပျိုးရေးထွက်ကုန်များအား ပြည်တွင်းတင်သွင်းခွင့်ပြုရာ၌ ပြည်တွင်း၌ စိုက်ပျိုးထုတ်လုပ်နေသည့် တောင်သူများ အခွင့်အရေး ကာကွယ်ရေးနှင့် မရှိမဖြစ် ကုန်စည်ဟုတ်၊ မဟုတ်ကို စိစစ်ခွင့်ပြုလေ့ရှိခြင်းဖြစ်ကြောင်း သိရသည်။

သတင်း #ချယ်ရီထိုက်
ဓါတ်ပုံ - စားသုံးသူရေးရာ