ရှမ်းပြည်နယ် (အရှေ့ပိုင်း) တာချီလိတ်မြို့ မဟာမြတ်မုနိဘုရားကြီးကျောင်းတိုက်ဝင်းတွင် အသည်းရောင်ဘီပိုး၊ စီပိုး စစ်ဆေးခြင်းနှင့် ကာကွယ်ဆေးထိုးနှံပေးခြင်းကို ၂၀၁၉ ခုနှစ်၊ အောက်တိုဘာလ (၂၁)ရက်နှင့် (၂၂)ရက်နေ့များတွင် နေ့စဉ် နံနက် (၈)နာရီခွဲမှစ၍ ဆောင်ရွက်ပေးမည်ဖြစ်သည်။

အသည်းရောင်ဘီပိုး၊ စီပိုးစစ်ဆေးမှုနှင့် ကာကွယ်ဆေးထိုးနှံပေးမှုများကို နံနက် (၈) နာရီခွဲမှစတင်ပြီး တစ်ရက်လျှင် လူ (၂၅၀) ဦးနှုန်းဖြင့် ဆောင်ရွက်ပေးသွားမည်ဖြစ်ရာ မည်သူမဆို လာရောက်စစ်ဆေးနိုင်ကြမည် ဖြစ်သော်လည်း စစ်ဆေးမှုခံယူရာတွင် စနစ်တကျဖြစ်စေရန်  နေ့စဉ် နံနက် (၈)နာရီမှစ၍ တိုကင်နံပါတ်များ ပေးခြင်းကို လာရောက်ယူဆောင်ထားရန် လိုအပ်မည်ဖြစ်သည်။

တာချီလိတ်မြို့ မဟာမြတ်မုနိဘုရားကြီးကျောင်းတိုက် ပဓာနနာယကဆရာတော်၏ အန္တိမအဂ္ဂိဈာပနကို ပူဇော်သည့်အနေဖြင့် ရန်ကုန်မြို့အခြေစိုက် အစာအိမ်၊ အူလမ်းကြောင်းနှင့် အသည်းရောဂါ ဖောင်ဒေးရှင်း(မြန်မာ) က အသည်းရောင် ဘီပိုး၊ စီပိုးစစ်ဆေးခြင်းနှင့် ကာကွယ်ဆေး ထိုးနှံပေးခြင်းကို လူဦးရေ (၅၀၀)အတွက် အခမဲ့လာရောက်ဆောင်ရွက်ပေးခြင်းဖြစ်သည်။

ကာကွယ်ဆေးထိုးနှံပေးခြင်းနှင့်အတူ အသည်းရောင် အသားဝါ B ပိုး၊ C ပိုးနှင့်ပတ်သက်သည့် ဟောပြောပွဲကိုလည်း အောက်တိုဘာလ (၂၁) ရက်နေ့ နေ့လယ် (၁)နာရီတွင် အောင်မြတ်ခန်းမ၌ ကျင်းပသွားမည်ဖြစ်၍ မည်သူမဆိုတက်ရောက်နိုင်မည်ဖြစ်သည်။

Tachileik News Agency