“ခါတိုင်းက ပွိုင့်တစ်ပွိုင့်ကို နှစ်ယောက်ပဲ တာဝန်ယူရတယ်။ ဒီနေ့ကတော့ (၃)ယောက်တာဝန်ယူပြီး ရှင်းပေးနေရတယ်”ဟု မြန်မာ - ထိုင်းချစ်ကြည်ရေးတံတားထိပ်တွင် ယာဉ်ကြောပိတ်ဆို့မှုအား ရှင်းလင်းပေးနေသည့်  ယာဉ်ထိန်းတပ်ဖွဲ့ဝင်တစ်ဦးက တာချီလိတ်သတင်းအေဂျင်စီသို့ ပြောသည်။

တာချီလိတ်ဘက်မှ ထိုင်းနိုင်ငံ မယ်ဆိုင်ဘက်သို့ သွားသည့် မော်တော်ယာဉ်များမှာ မယ်ဆိုင်ဘက် စစ်ဆေးရေးဂိတ်ဘက်မှနေ၍ တံတားထိပ်သို့ သွားသည့် ဗိုလ်ချုပ်လမ်းမကြီးတလျှောက်အထိ ပိတ်ဆို့နေသဖြင့် အဝိုင်းထိပ်မှစတင်ပြီး တံတားပေါ် မြန်မာအထွက် တံဆိပ်တုံးထုရာနေရာအထိ ယာဉ်ကြောနှစ်ထပ် ဖြစ်နေသည်ကို တွေ့ရသည်။

“ပုံမှန်အားဖြင့် ကား၊ဆိုင်ကယ်အပါအဝင် မော်တော်ယာဉ်က အစီးရေ (၁၆၀)၊ (၁၇၀)လောက် ဖြတ်ကြတာ။ ဒီနေ့လို အသွားအလာများတဲ့နေ့ဆိုရင် အစီးရေ (၂၀၀)ကျော်မယ်”ဟု အမှတ်(၁)ချစ်ကြည်ရေးတံတားရှိ ကုန်းလမ်းပို့ဆောင်ရေးညွှန်ကြားမှုဦးစီးဌာနမှ တာဝန်ကျဝန်ထမ်းက တာချီလိတ်သတင်းအေဂျင်စီသို့ ပြောသည်။

ယာဉ်ကြောပိတ်ဆို့နေသည့်အတွက် လဝကမှ အထွက်တုံးထုသည့်နေရာတွင် အချိန်မကြန့်ကြာစေရန် ဝန်ထမ်းများက ကားပေါ်ပါသူများကို အောက်မဆင်းစေဘဲ စာရွက်စာတမ်းများ ကိုယ်တိုင်ယူဆောင်ကာ တံဆိပ်တုံးထုပေးနေပြီး အဝိုင်းပတ်နေရာတွင်လည်း ယာဉ်ထိန်းရဲတပ်ဖွဲ့ဝင် (၃) ဦးက ယာဉ်ကြော ရှင်းလင်းပေး နေသော်လည်း တံတားပေါ်တွင် ပိတ်ဆို့နေသည့် ယာဉ်ကြောအား ဖြတ်ကျော်တက်ရန် ကြိုးစားသည့် မော်တော်ယာဉ်အချို့ကိုလည်း တွေ့ရသည်။

မြန်မာ - ထိုင်း ချစ်ကြည်ရေးတံတား(၁)မှ အိမ်စီးကားများ၊ ဆိုင်ကယ်များ၊ တစ်ပိုင်တစ်နိုင်ကုန်စည်တင်သည့် မော်တော်ယာဉ်များ ဖြတ်သန်းခွင့်ပြုထားခြင်းဖြစ်ပြီး ချစ်ကြည်ရေးတံတား (၂)တွင် ကုန်စည်ပို့ဆောင်ရေးနှင့် ကျောင်းကြိုပို့ယာဉ်များကိုသာ ဖြတ်သန်းခွင့်ပြုထားခြင်းဖြစ်သည်။

သတင်း၊ဓါတ်ပုံ #ဟန်စိုးထိုက်