~~~~~~~~⊰❂ Unicode Version ❂⊱~~~~~~~~

သိန်းနီ ရေပူစစ်ဆေးရေးစခန်းအား ပစ်ခတ်ခံရ၍ ဂိတ်လုံခြုံရေး တစ်ဦးကျဆုံး၊ တစ်ဦး ဒဏ်ရာရ
************
ရှမ်းပြည်နယ်( မြောက်ပိုင်း ) သိန်းနီမြို့၊ ပြည်ထောင်စုလမ်းမကြီးပေါ်ရှိ ရေပူအမြဲတမ်း စစ်ဆေးရေးဂိတ် အနီးတွင် ၂၀၁၉ ခုနှစ်၊ သြဂုတ်လ (၂၄) ရက်နေ့ နံနက်အစောပိုင်းက ပစ်ခတ်တိုက်ခိုက်မှုဖြစ်ပွားခဲ့သဖြင့် ဂိတ်လုံခြုံရေး ယူထားသည့် ပိန်းဆာပြည်သူ့စစ်အဖွ့ဲဝင်တစ်ဦး ကျဆံုံးကာ၊ တစ်ဦးဒဏ်ရာ ရသွားကြောင်း သိရသည်။

ရေပူစစ်ဆေးရေးဂိတ်အား သြဂုတ်လ (၂၄) ရက်နေ့ နံနက် (၃) နာရီ မိနစ်(၂၀)ဝန်းကျင်က လက်နက်ကြီးများဖြင့် စတင်ပစ်ခတ်ခံရပြီး နံနက် (၅) နာရီ (၁၅) ခန့်တွင် လက်နက်ငယ်များဖြင့် ထပ်မံပစ်ခတ်လာသဖြင့် ရေပူဂိတ်လုံခြုံရေးတပ်ဖွဲ့နှင့် အပြန်အလှန်ပစ်ခတ်မှုများ ဖြစ်ပွားခဲ့ခြင်းဖြစ်ကြောင်း သိရသည်။

နယ်မြေခံစစ်တပ်က နံနက် (၅) နာရီ မိနစ် (၂၀)ခန့်တွင် လိုက်လံရှင်းလင်းခဲ့ကြောင်း သိရသည်။
ရေပူစစ်ဆေးရေးဂိတ်တွင် တာဝန်ထမ်းဆောင်နေသည့် စစ်ဆေးရေးအဖွဲ့စုံမှ ဝန်ထမ်းများသည် သြဂုတ်လ (၁၆) ရက်နေ့ကစတင်၍ အဆိုပါဂိတ်၌ တာဝန်ထမ်းဆောင်ခြင်းကို ရပ်နားထားသဖြင့် အခြားဝန်ထမ်းများ ထိခိုက်ဒဏ်ရာရရှိမှု မရှိခဲ့ကြောင်း သိရသည်။

ရှမ်းပြည်နယ်မြောက်ပိုင်းဒေသရှိ ပြည်ထောင်စုလမ်းမကြီးတလျှောက်တွင် သြဂုတ်လ (၁၅)ရက်နေ့မှစ၍ TNLA၊ AA နှင့် MNDAA အဖွဲ့များ၏ ပစ်ခတ်တိုက်ခိုက်မှုများရှိနေ၍ နမ့်ခမ်းမြို့၊ ကွတ်ခိုင်မြို့၊ ( သိန်းနီ- ကွမ်းလုံ လမ်းပိုင်းမှ ) နမ့်စလပ် ကျေးရွာနှင့် လားရှိုးမြို့တို့တွင် စစ်ဘေးတိမ်းရှောင်နေသူများရှိနေခြင်းဖြစ်သည်။

သတင်း #နေဖြိုးမြင့်
ဓါတ်ပုံ [ပစ်ခတ်မှုများမဖြစ်ပွားမီက ရေပူစစ်ဆေးရေးစခန်းဖြစ်သည်။]