ဂုတ်တွင်းတံတားမိုင်းခွဲခံရ၍ ပိတ်မိနေသည့် အရပ်ဖက်မော်တော်ယာဉ်များ ထွက်လာနိုင်ရန် အစားထိုးတံတား အမြန်တည်ဆောက်ပေးမည်
**********
ရှမ်းပြည်နယ်(မြောက်ပိုင်း) နောင်ချိုမြို့နယ်တွင်သြဂုတ်လ ၁၅ ရက် နံနက်ပိုင်းက TNLA  လက်နက်ကိုင်တပ်ဖွဲ့နှင့် တပ်မတော်တို့ ထိတွေ့တိုက်ခိုက်မှုအတွင်း မိုင်းခွဲတိုက်ခိုက်ခံရသည့် ဂုတ်တွင်းလမ်းရှိတံတားမှာ ဖြတ်သန်းသွားလာရန် မဖြစ်နိုင်တော့သည့်အတွက် အစားထိုးတံတား အလျင်အမြန်တည်ဆောက်ပေးနိုင်ရန် ဆောင်ရွက်နေကြောင်း အဆိုပါ လမ်းပိုင်းအား တာဝန်ယူထားသည့် Oreintal Highway Co.ltd တာဝန်ရှိသူထံက သိရသည်။

"ပြည်သူ့ဆောက်လုပ်ရေးလုပ်ငန်းက တံတားဦးစီးအဖွဲ့တွေ အခု အဲဒီနေရာကို လာနေကြပါပြီ။ တံတားက ဖြတ်သန်းသွားလာလို့မရတော့တဲ့အတွက် ဒေသအခြေအနေတည်ငြိမ်သွားတာနဲ့ အစားထိုးတံတားတစ်ခု အမြန်ဆုံးဆောက်လုပ်ပေးသွားမှာပါ။  လောလောဆယ် အဲဒီအနီးတစ်ဝိုက်ပိတ်မိနေတဲ့ ယာဉ်တွေအားလုံး သွားနိုင်အောင် တံတားတစ်ခုအမြန်ဆုံးဆောင်ရွက်ပေးမှာပါ။ အခုတော့ အခြေအနေ ကောင်းနေပါတယ်။ ပစ်ခတ်တာမရှိတော့့ဘူးဆိုရင် ယာဉ်တွေဖြတ်သွားလို့ ရအောင် ချက်ချင်းစီစဉ်ပေးသွားမှာပါ" ဟု ဂုတ်တွင်းလမ်းပိုင်းအား တာဝန်ယူထားသည့် Oreintal Highway Co.ltd မှ တာဝန်ရှိသူ တစ်ဦးက တာချီလိတ်သတင်းအေဂျင်စီသို့ ပြောသည်။

နံနက်ပိုင်းက ဖြစ်ပွားခဲ့သည့် တိုက်ပွဲများကြောင့် ဂုတ်တွင်းလမ်းပိုင်းမှ ဖြတ်သန်းခွင့်တားမြစ်ထားပြီး နောင်ချို မြို့ဘက်တွင်  ကျောက်ကြမ်းကျေးရွာအနီး၊ ကျောက်မဲမြို့ဘက်တွင် သီပေါနှင့် ကျောက်မဲတိုးဂိတ်များ၌ ကုန်တင်ယာဉ်များ၊ ခရီးသည်တင်ယာဉ်များကို ရပ်နားထားစေခဲ့ခြင်းဖြစ်သည်။

ထိတွေ့ပစ်ခတ်မှုဖြစ်ပွားခဲ့သည့်နေရာများတွင် မွန်းလွဲ (၁ )နာရီဝန်းကျင်၌ ပစ်ခတ်မှုများ ရပ်သွားသည့်အတွက် နောင်ချိုမြို့နှင့် ကျောက်မဲမြို့ဘက်မှ လူမှုကူညီရေးယာဉ်များ အစုအဖွဲ့ဖြင့်သွားရောက်ကာ တိုက်ပွဲအတွင်း သေဆုံးသူများကို သယ်ယူပေးရန် သွားရောက်နေကြသည်။

"တစ်နာရီခွဲလောက်မှာ ကျောက်မဲဘက်အခြမ်းက လူမှုကူညီရေးအသင်းအချို့စုပြီးတော့ ဂုတ်တွင်းကို ဆင်းလာ ကြတာ။ A မိုင်းကွင်းနားမရောက်ခင် အသံတွေမရပ်သေးလို့ နားနေရသေးတယ်။ အခုတော့ Dead Body တွေ ဆင်းကောက်နေတယ်။ အားလုံးဘယ်လောက်ဆိုတာ အတိအကျမသိရသေးဘူး" ဟု ကျောက်မဲဘက်ရှိ နောင်ပိန်ကျေးရွာမှ ကမ်းလင့်လက်များလူမှုကူညီရေး အသင်းက အသင်းသားတစ်ဦးက တာချီလိတ်သတင်း အေဂျင်စီသို့ ပြောသည်။

တအာင်းအဖွဲ့(TNLA)၊ ရခိုင်အဖွဲ့(AA)နှင့် ကိုးကန့်အဖွဲ့(MNDAA) တို့ပူးပေါင်းအဖွဲ့က သြဂုတ်လ (၁၅) ရက်နေ့ နံနက်ပိုင်းတွင် ပြင်ဦးလွင်မြို့ရှိ တပ်မတော်နည်းပညာတက္ကသိုလ်ကျောင်းအား လက်နက်ကြီးဖြင့် ပစ်ခတ်ခြင်း၊ နောင်ချိုမြို့ရှိ မူးယစ်ဆေးဝါးစစ်ဆေးရေးဂိတ်နှင့် ဂုတ်တွင်းလမ်းပိုင်းရှိ ရဲကင်းတို့အား တိုက်ခိုက်ခဲ့သဖြင့် တပ်မတော်နှင့် တိုက်ပွဲများဖြစ်ပွားနေခြင်းဖြစ်သည်။

သတင်း #နေဖြိုးမြင့်
ဓါတ်ပုံ - မျိုးသန်​့​အောင်​