~~~~~~~~⊰❂ Unicode Version ❂⊱~~~~~~~~

မြေနုကျွန်းအငြင်းပွားမှုဖြင့် လူအစုအပြုံလိုက်သေဆုံးမှုကို ဆေးစာပြန်ကြားချက် စောင့်ဆိုင်းနေစဉ် သေမှုသေခင်းဖွင့်လှစ်စစ်ဆေးနေ
***********
မကွေးတိုင်းဒေသကြီး၊ ရေနံချောင်းမြို့နယ်အတွင်း မြေနုကျွန်းပိုင်ဆိုင်မှု အငြင်းပွား ခိုက်ရန်ဖြစ်ပွားမှုကြောင့် လူအများအပြားသေဆုံးခဲ့ရသည့်ကိစ္စကို ဆေးစာပြန်ကြားချက် စောင့်ဆိုင်းနေစဉ် သေမှုသေခင်းဖွင့်လှစ်ထားပြီး အပြန်အလှန်တိုင်ကြားမှုများကိုလည်း အမှုဖွင့်ထားကြောင်း သိရသည်။

ဖြစ်စဉ်နှင့်ပတ်သက်၍ လတ်တလောသေမှုသေခင်းဖွင့်လှစ်ဆောင်ရွက်လျှက်ရှိကာ ပြင်ပ ပယောဂ ဒဏ်ရာဒဏ်ချက်ကြောင့် သေဆုံးသည်ဟု ဆေးစာပြန်ကြားချက်ရရှိပါက လူသတ်မှုသို့ ပြောင်းလဲဖွင့်လှစ်ဆောင်ရွက်မည်ဖြစ်ပြီး နှစ်ဖက်ကျူးလွန်မှုများကိုလည်း တိုင်တန်းချက်များအပေါ် အပြန်အလှန် အမှုဖွင့်ခြင်းများ ဆောင်ရွက်ထားကြောင်း ၂၀၁၉ ခုနှစ်၊ ဇူလိုင်လ(၂၆)ရက်နေ့တွင် ပြုလုပ်သည့် သတင်းစာရှင်းလင်းပွဲတွင် တိုင်းဒေသကြီးရဲတပ်ဖွဲ့မှူးက ပြောကြားသည်။

ရေနံချောင်းမြို့နယ်၊ မာန်မြေကျေးရွာအုပ်စု၊ ဖရဲကျွန်းကျေးရွာမှ ရွာသူရွာသားများနှင့် ကျမ်းကိုင်ကျေးရွာ အုပ်စု၊ ကံသာကျေးရွာမှ ရွာသူရွာသားများအကြား မြေနုကျွန်းနယ်နိမိတ်အငြင်းပွားလျှက်ရှိနေကြရာမှ ဇူလိုင်လ(၂၃)ရက်နေ့တွင် ဖြစ်ပွားခဲ့သည့် လူအုပ်စုချင်း ခိုက်ရန်ဖြစ်ပွား၍ လူအမြောက်အများသေဆုံး ရခြင်း၏အကြောင်းရင်းမှာ စက်လှေမှောက်ရေနစ်၍သာမဟုတ်ဘဲ တုတ်၊ ဓား၊ လက်နက်တို့ဖြင့် ရိုက်ပုတ် ထိုးခုတ်၍ သေဆုံးရခြင်းဖြစ်ကြောင်း ဖရဲကျွန်းကျေးရွာသားများက ဇူလိုင်လ(၂၆)ရက်နေ့တွင် မီဒီယာများ သို့ ပြောသည်။

 “ကျူးကျော်ဆောက်လုပ်ထားတဲ့ အိမ်(၂)လုံးကို ဖယ်ရှားပေးပါမယ်ပြောပြီး ဖယ်မပေးတာကြောင့် သွား ဖျက်ကြရတာပါ။ ဖျက်ပြီးအပြန်မှာ ကျွန်တော်တို့ရွာဘက်က သန်းဇော်ကို ဖရဲကျွန်းရွာသား လေး၊ ငါးယောက်က ကျွန်တော်တို့မျက်စိရှေ့မှာတင် ဝိုင်းသတ်လိုက်ကြတယ်။ အဲဒီလိုအသတ်ခံရသူရဲ့ ရုပ်အလောင်းကို ခုထိပြန်မရကြသေးပါဘူး။ အဲဒီနောက် လူအင်အားနဲ့  ညာသံပေးဝိုင်းလာကြတာကြောင့် ပြေးပေါက်မရှိတော့တဲ့ ကျွန်တော်တို့ဟာ ရပ်ထားတဲ့ စက်လှေပေါ်ကိုပဲ ပြေးတက်ပြီး အကာအကွယ် ယူကြရပါတယ်။ အဲဒီမှာ စက်မမောင်းဘဲရပ်ထားတဲ့မော်တော်က တစ်ဘက်ကိုစောင်းသွားတာပါ။ ကျွန်တော်တို့တွေဟာ ဧရာဝတီမြစ်ကြီးနဲ့ ဖက်တွယ်ကြီးပြင်းလာကြရသူတွေဖြစ်လို့ ကမ်းနားမှာမှောက်တဲ့ စက်လှေကြောင့်တော့ လူအယောက် (၃၀)လောက် ရေနစ်သေဆုံးဖို့ အကြောင်းမရှိပါဘူး။ သူတို့က ကမ်း ပေါ်ကနေ လှံတွေ၊ လေးခွတွေနဲ့ ပစ်ကြတော့ အကာအကွယ်ယူကြရင်း စက်လှေတိမ်းစောင်းသွားတာပါ။ ကံသာရွာဘက်ကမ်းကို ကူးခတ်သွားကြသူတွေမှာ ကမ်းပေါ်ကနေ တုတ်၊ ဓား၊ လက်နက်တွေနဲ့ ရိုက်ခုတ်ချလို့သာ  ရေထဲပြန်ကျ သေဆုံးကြရတာပါ။ ဆယ်ယူရရှိတဲ့အလောင်းတွေမှာ ဒဏ်ရာ ဒဏ်ချက်တွေပါရှိနေတာက သက်သေပါ ပဲ” ဟု အခင်းဖြစ်စဉ်တွင် ဧရာဝတီမြစ်ထဲမှ ပြန်လည်လွတ်မြောက်လာသူ ဖရဲကျွန်းကျေးရွာသား ဦးသန်း ဦးက ပြောသည်။

ဖရဲကျွန်းကျေးရွာမှ စက်လှေဖြင့်လာရောက်ကြသည့် လူအင်အား(၁၅၀)ကျော်ခန့်က နေအိမ်များအား လာ ရောက်ဖျက်ဆီးကြသည်ကို တားဆီးရန်ကြိုးစားခဲ့သည့် ကံသာကျေးရွာသား ကုလားလေးအား ဖရဲကျွန်း ကျေးရွာသားများက ရိုက်ပုတ် ထိုးခုတ်နေကြသည်ကို တွေ့မြင်ကြရ၍ လူအင်အားဖြင့်ဝိုင်းဝန်းကြသဖြင့် စက်လှေပေါ်သို့ အလုအယက်တက်ပြေးကြရာမှ စက်လှေမှောက်ကာ ရေနစ်သေဆုံးကြရခြင်းဖြစ်ကြောင်း ကံသာကျေးရွာသားများက ပြောသည်။

“လူအင်အားနဲ့ အိမ်တွေလာဖျက်တာကို ကျွန်တော်တို့မှာ ကြည့်ပဲနေရတာပါ။ အခုဖြစ်စဉ်မှာ သေဆုံးသွားတဲ့ ကုလားလေးက သွားတောင်းပန်တာမှာ သူတို့ဘက်က ဝိုင်းပြီး ထိုးကြ၊ ခုတ်ကြတာကိုတွေ့ကြရလို့ ရွာကလူတွေ အင်အားနဲ့ဝိုင်းထွက်လာကြပြီး နှစ်ဖက်ပစ်ကြခတ်ကြတော့ စက်လှေပေါ်ကို အလုအယက်တက်ကြတာမှာ စက်လှေမှောက်၊ ရေနစ်ပြီးသေကြရတာပါ။ ကမ်းပေါ်ပြန်တက်လာနိုင်သူတစ်ချို့ကို ဝါးလုံးတွေနဲ့ ရိုက်တယ်လို့တော့ ပြောသံကြားပေမဲ့ ကိုယ်တိုင်တော့ မြင်ရတာမဟုတ်ပါဘူး။ ဒါပေမဲ့ ကမ်းပေါ်ပြန် တက်လာနိုင်တဲ့ လူ(၆၀)လောက်ရှိပါတယ်။ အဲဒီထဲမှာ အဝတ်အစားတောင်မပါတော့လို့ ကျွန်တော်တို့ဘက်က အဝတ်အစားပေးရတာတောင် ရှိပါတယ်။ တကယ်တမ်းသာ သတ်ချင်တယ်ဆိုရင် အဲဒီလူတွေ အသက်ရှင်ဖို့အကြောင်းမရှိပါဘူး” ဟု နေအိမ်အဖျက်ခံလိုက်ရသူ ဦးမောင်ဝင်းက ပြောသည်။

မကွေးတိုင်းဒေသကြီးအစိုးရအဖွဲ့အနေဖြင့် ဇူလိုင်လ(၂၃)ရက်နေ့က ဖြစ်ပွားခဲ့သည့် ဖြစ်စဉ်များနှင့်ပတ် သက်၍ စုံစမ်းစစ်ဆေးရေးအဖွဲ့ ကို ဇူလိုင်လ (၂၆)ရက်နေ့က ဖွဲ့စည်းဆောင်ရွက်နေပြီဖြစ်သည်။

သတင်း၊ဓာတ်ပုံ #ဖီးနစ်