~~~~~~~~⊰❂ Unicode Version ❂⊱~~~~~~~~

မိုင်းလားဒေသခံများအား အိမ်ထောင်စုစာရင်းနှင့် နိုင်ငံသားစိစစ်ရေးကတ်များ ကွင်းဆင်းထုတ်ပေးနိုင်ရေး အထူးဒေသ - ၄ နှင့် ညှိနှိုင်းရန်စီစဉ်နေ
*********************
ရှမ်းပြည်နယ်အရှေ့ပိုင်းရှိ မိုင်းလားဒေသခံများအား အိမ်ထောင်စုစာရင်းနှင့် နိုင်ငံသားစိစစ်ရေးကတ်များ ထုတ်ပေးနိုင်ခြင်းမရှိသေးသဖြင့် ကွင်းဆင်းလုပ်ဆောင်ပေးနိုင်ရေး အထူးဒေသ-၄ မိုင်းလားနှင့် ညှိနှိုင်းရန် စီစဉ်နေကြောင်း သိရသည်။

မိုင်းလားဒေသမှ ပြည်သူလူထုအား အိမ်ထောင်စုစာရင်းနှင့် နိုင်ငံသားစိစစ်ရေးကတ်များ ထုတ်ပေးနိုင်ရေးအတွက် အဆိုပါဒေသကိုကွပ်ကဲနေသည့် အထူးဒေသ-၄ (မိုင်းလား)မှ တာဝန်ရှိသူများက ခေါ်ယူပေးရန်လိုအပ်သဖြင့် သက်ဆိုင်ရာအထူးဒေသနှင့် ဒေသအာဏာပိုင်များဖြစ်သည့် ရှမ်းပြည်နယ်အစိုးရအဖွဲ့အပါအဝင် တာဝန်ရှိပုဂ္ဂိုလ်များ ညှိနှိုင်းပြီး လုပ်ထုံးလုပ်နည်းများနှင့်အညီ၊ ဥပဒေနှင့်အညီ ဆောင်ရွက်ပေးမည်ဖြစ်ကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန ပြည်ထောင်စုဝန်ကြီး ဦးသိန်းဆွေက ပြည်သူ့လွှတ်တော်တွင် ဖြေကြားခဲ့ခြင်းဖြစ်သည်။

ဒုတိယအကြိမ် ပြည်သူ့လွှတ်တော် (၁၃)ကြိမ်မြောက် ပုံမှန်အစည်းအဝေး ပဥ္စမနေ့ဖြစ်သည့် ၂၀၁၉ ခုနှစ်၊ ဇူလိုင်လ (၂၉)ရက်နေ့တွင် ကျိုင်းတုံမဲဆန္ဒနယ်မှ ဦးစတီဖန်က မိုင်းလားမြို့နယ်၊ ဝမ်နောင်လုံအုပ်စုအတွင်းရှိ ဝမ်နောင်လေးကျေးရွာ၊ ဝမ်လောက်ဖျားကျေးရွာနှင့် အနီးအနားရှိကျေးရွာများကို မိုင်းခတ်မြို့နယ်အတွင်း ပြန်လည်ထည့်သွင်း ဖွဲ့စည်းပေးနိုင်ရန်နှင့် ၎င်းကျေးရွာသူ၊ ကျေးရွာသားများအတွက် အိမ်ထောင်စုစာရင်းများ၊ နိုင်ငံသားစိစစ်ရေးကတ်ပြားများ ပြုလုပ်ပေးရန် အစီအစဉ် ရှိ၊ မရှိ မေးမြန်းခဲ့ခြင်းဖြစ်သည်။

 ဝမ်နောင်လုံကျေးရွာအုပ်စုအတွင်းရှိသည့် ဝမ်နောင်လေးကျေးရွာ၊ ဝမ်လောက်ဖျားကျေးရွာနှင့် အနီးနားရှိ ကျေးရွာများကို ဝမ်နောင်လုံကျေးရွာအုပ်စုမှ ခွဲထုတ်ပြီး မိုင်းခတ်ကျေးရွာ အုပ်စုအတွင်းသို့ ထည့်သွင်းဖွဲ့စည်းရန်ကိစ္စမှာ နယ်မြေကွပ်ကဲမှု ရယူထားရသည့် အထူးဒေသ-၄ အဖွဲ့အစည်းနှင့် မူဝါဒပိုင်းဆိုင်ရာ၊ နယ်မြေအုပ်ချုပ်ရေးပိုင်းဆိုင်ရာကို ညှိနှိုင်းပြီး တွေ့ဆုံဆွေးနွေးသွားရန် လိုအပ်သည်ဟု ဝန်ကြီးက လွှတ်တော်တွင် ဖြေကြားသွားသည်။

Tachileik News Agency