~~~~~~~~⊰❂ Unicode Version ❂⊱~~~~~~~~

တာချီလိတ်မြို့ ဝမ်ကောင်းရပ်ကွက်တွင် စည်းကမ်းမဲ့အမှိုက်စွန့်ပစ်ခြင်းများအား စောင့်ကြည့်သတင်းပေး ဒဏ်ကြေးဆောင်သည့်စနစ် ကျင့်သုံးရန် စီစဉ်နေ
*********
မြို့သာယာလှပရေးအတွက် အပတ်စဉ် စနေနေ့တိုင်း စုပေါင်းအမှိုက်ကောက်အစီအစဉ်ဖြင့် ဆောင်ရွက်နေသည့် ရှမ်းပြည်နယ်အရှေ့ပိုင်း၊ တာချီလိတ်မြို့ရှိ ဝမ်ကောင်းရပ်ကွက်တွင် စည်းကမ်းမဲ့အမှိုက်စွန့်ပစ်မှုများရှိနေဆဲဖြစ်သဖြင့်  စောင့်ကြည့်သတင်းပေး ဒဏ်ကြေးဆောင်စေသည့် စနစ်ကျင့်သုံးရန် စီစဉ်နေကြောင်း ရပ်ကွက်အုပ်ချုပ်ရေးအဖွဲ့ထံမှ သိရသည်။

 “ရပ်ကွက်ထဲမှာ မင်္ဂလာကုန်းဘက်ကအိမ်တွေက အမှိုက်သိမ်းဆည်းခက စျေးကြီးတယ် မပေးနိုင်ဘူးဆိုလိုလို့ အမှိုက်သိမ်းဆည်းခလျှော့ပေးဖို့ ကုမ္ပဏီနဲ့ ညှိပေးထားပါတယ်။ မင်္ဂလာကုန်းက ဆင်းတဲ့လမ်းနှစ်ခုထိပ်မှာ အမှိုက်ကားကို နာရီဝက်ရပ်ထားပြီး အမှိုက်သိမ်းကားဝန်ထမ်းက လမ်းတလျှောက် ခေါင်းလောင်းတီးပြီး အသိပေးတယ်။ မင်္ဂလာကုန်းဘက်က အိမ်တွေ အမှိုက်ဆင်းလာပစ်နိုင်ဖို့ လမ်းထိပ်နှစ်ခုမှာ အမှိုက်ကားရပ်ထားပြီး စောင့်ပေးဖို့  ညှိနှိုင်းပေးထားပါတယ်။ အမှိုက်သိမ်းတဲ့သူတွေက လုပ်ပေးတယ်။ ရပ်ကွက်ကလူတွေ တစ်ချို့က လကုန်တော့ အမှိုက်သိမ်းခ မပေးကြဘူး။ တစ်ချို့ကတော့ပေးကြပါတယ်။ အမှိုက်သိမ်းတဲ့ကုမ္ပဏီဘက်က (၂)လလောက်အထိ သိမ်းပေးပေမဲ့ အမှိုက်သိမ်းခမပေးကြတော့ အဲဒီအပိုင်းမှာ လိုက်သိမ်းမပေးတော့ဘူး။ ဒါပေမဲ့ အမှိုက်ပုံတဲ့နေရာမှာရှိရင်တော့ သူတို့ သိမ်းသွားပေးတယ်။ ဒါကိုလည်း အမှိုက်ကားလာသိမ်းပြီးနောက်ပိုင်းမှ လာပစ်ကြတယ်။ ဒီတော့ ရပ်ကွက်ထဲမှာ အမှိုက်ပုံဖြစ်နေတယ်။ ဒါကိုဖြေရှင်းဖို့က စောင့်ကြည့်သတင်းပေး ဒဏ်ကြေးဆောင်ခိုင်းတဲ့နည်းကို လုပ်ဖို့တော့ စီစဉ်နေပါတယ်”ဟု ဝမ်ကောင်းရပ်ကွက် အုပ်ချုပ်ရေးမှူး ဦးထွန်းထွန်းဝင်းက တာချီလိတ်သတင်းအေဂျင်စီသို့ ပြောသည်။

ဝမ်ကောင်းရပ်ကွက်ရှိ အချို့နေအိမ်များက အမှိုက်ကားလာသိမ်းချိန်တွင် မပစ်ဘဲ စည်းကမ်းမဲ့အမှိုက်စွန့်ပစ်မှုများကြောင့် အနှောင့်အယှက်ဖြစ်ရသည့် အနီးဝန်းကျင်နေအိမ်များက စည်ပင်သာယာရေးဌာနထံ တိုင်ကြားခဲ့သဖြင့် ဌာနက ညှိနှိုင်းဖြေရှင်းပေးခဲ့သော်လည်း စည်းကမ်းမဲ့အမှိုက်ပစ်ခြင်းများ ဆက်လက်ရှိနေခြင်းဖြစ်ကြောင်း သိရသည်။

တာချီလိတ်မြို့ပေါ်ရပ်ကွက်များတွင် အမှိုက်သိမ်းဆည်းရေးအတွက် စည်ပင်သာယာရေးဌာနထံမှ လုပ်ကိုင်ခွင့်ရရှိထားသည့် ပုဂ္ဂလိက ကုမ္ပဏီ UBL က အမှိုက်သိမ်းဆည်းခအဖြစ် တစ်အိမ်လျှင် တစ်လ ဘတ်(၅၀)မှ (၁၀၀)အထိ ကောက်ခံနေခြင်းဖြစ်သော်လည်း ဝမ်ကောင်းရပ်ကွက်ရှိ မင်္ဂလာကုန်းတွင် တစ်လ ဘတ်(၂၀)နှုန်းအထိ လျှော့ချကောက်ခံပေးရန် ကုမ္ပဏီဘက်က သဘောတူညီထားခြင်းဖြစ်ကြောင်း သိရသည်။

နယ်စပ်မြို့ဖြစ်သည့် တာချီလိတ်တွင် အမှိုက်သိမ်းဆည်းခြင်းကို ကုမ္ပဏီ၏အမှိုက်သိမ်းကားဖြင့် လိုက်လံသိမ်းဆည်းပေးနေသည့်အပြင် ရပ်ကွက်အတွင်းနှင့် ရေမြောင်းများ၊ချောင်းများအတွင်း စည်းကမ်းမဲ့အမှိုက်စွန့်ပစ်မှုများရှိနေသဖြင့် အပတ်စဉ် စနေနေ့တိုင်း စုပေါင်းအမှိုက်ကောက်သည့်အစီအစဉ်ကို ၂၀၁၉ ခုနှစ် မတ်လ (၉) ရက်နေ့မှစတင်ခဲ့ပြီး ပထမ (၃) လပတ်ကို ပညာပေးကာလ၊ ဒုတိယ(၃)လပတ်တွင် အမှိုက်ပုံးဖြန့်ဝေပေးခြင်း၊ စည်းကမ်းမဲ့အမှိုက်စွ့န်ပစ်သူများကို ဒဏ်ငွေပေးဆောင်စေခြင်းတို့ကို အစီအစဉ်အတိုင်း လုပ်နေခြင်းဖြစ်သည်။

Tachileik News Agency
ဓါတ်ပုံ - TTW