~~~~~~~~⊰❂ Unicode Version ❂⊱~~~~~~~~

တာချီလိတ်မြို့ ပုံလို့(မြို့မ)သုသာန်သစ်သွားရာ လမ်းမကြီးတစ်လျှောက်နှင့် အဆောက်အဦးတစ်ဝိုက်တွင် သစ်ပင်ပေါင်း (၆၀၀၀) ကျော်စိုက်ပျိုးသွားမည်
********************
ရှမ်းပြည်နယ်အရှေ့ပိုင်း၊ တာချီလိတ်မြို့ ပုံလို့(မြို့မ)သုသာန်သစ်သွားရာ အရှည် (၁) မိုင်ခွဲခန့်ရှိ လမ်းမကြီးတစ်လျှောက်နှင့် တောင်ပေါ်ရှိ သုသာန်မြေ အဆောက်အဦးပတ်ဝန်းကျင်တွင် သစ်ပင်ပေါင်း (၆၀၀၀) ကျော်ခန့်ကို မိုးတွင်းကာလအတွင်း စိုက်ပျိုးသွားမည်ဖြစ်ကြောင်း သိရသည်။

"တက်လာတဲ့ လမ်းဘေးဝဲယာမှာလည်း မြေသားရှိတဲ့နေရာတွေမှာ အပင်ပေါင်း (၆၀၀၀) လောက်စိုက်ဖို့ရှိတယ်။ ဗမာတိုင်းရင်းသားယဉ်ကျေးမှုအဖွဲ့၊ မဇ္ဇိမလူမှုကူညီရေးအသင်းနဲ့ သစ်တောဌာနကလည်း လာကြည့်ထားပါတယ်။ သူတို့ကလည်း စိုက်မယ်။ ကျွန်တော်တို့က ဒီပေါ်မှာ စိမ်းလန်းစိုပြေဖို့အတွက် ပန်းဥယျာဉ်တွေလည်းပါအောင် လုပ်ထားတဲ့အတွက် ကော်မတီကလည်း စိန်ပန်းပျိုးပင် အပင် (၂၀၀) ကိုနွေရာသီကတည်းကဝယ်ပြီး ပျိုးဥယျာဉ်မှာ စုဆောင်းထားရှိပါတယ်။ ဒီအပေါ်မှာ အခြားအခြားသော ပန်းပင်တွေ အရိပ်ရပင်တွေထပ်ပြီးစိုက်မယ်။ အပင်သေးလေးတွေစိုက်မယ်ဆိုရင် နှစ်နည်းနည်းကြာမှာဖြစ်တဲ့အတွက် အဆောက်အဦးတွေရှေ့မှာ လူတစ်ရပ်ကျော်ကျော်ရှိတဲ့ ပျိုးပင်တွေဝယ်စိုက်မယ်"ဟု ပုံ့လို့(မြို့မ)သုသာန်တည်ဆောက်ရေးအဖွဲ့ ဥက္ကဌဖြစ်သူ ဒုရဲမှူး စံသိန်းက တာချီလိတ်သတင်းအေဂျင်စီသို့ပြောသည်။

ပုံလို့(မြို့မ)သုသာန်သစ်ကို ပုံလို့ဆရာတော်မှ စွန့်ကြဲလှူဒါန်းထားသည့် တောင်ပေါ်မြေ (၁၆)ဧကကျော်တွင် တောင်ထိပ်အမြင့်(၁၅) ပေခန့်အား တူးကာမြေညှိဆောင်ရွက်နေခြင်းဖြစ်ပြီး မတ်လကုန်က မိုးရွာသွန်းချိန်တွင် မြေပြိုမှုများဖြစ်ပေါ်သဖြင့် ပြုပြင်မှုများလုပ်ဆောင်နေရခြင်းဖြစ်သည်။

လူမျိုးမရွေး မီးသဂြိုလ်ပြီး အရိုးအိုးမြုပ်နှံနိုင်မည့် သုဿာန်သစ် တည်ဆောက်ရေးအတွက် တာချီလိတ်မြို့မှ လုပ်ငန်းရှင် ဦးအားဖာက မတည်ငွေလှူဒါန်းငွေဖြင့်စတင်ပြီး မြို့လူထုက ပူးပေါင်းလှူဒါန်းငွေများ ထည့်ဝင်လာရာ လက်ရှိတွင် စုစုပေါင်း လှူဒါန်းငွေ ဘတ်သိန်း (၁၄၀)ကျော်ဖြင့် ကော်မတီက လုပ်ငန်းများဆောင်ရွက်နေခြင်းဖြစ်သည်။

သတင်း #ဟန်စိုးထိုက်
ဓါတ်ပုံ #ကျော်ဇင်ဟိန်း