~~~~~~~~⊰❂ Unicode Version ❂⊱~~~~~~~~

တောင်ကြီးမြို့ လေးလောင်းပြိုင်လူသတ်မှုကျူးလွန်သူအား နှစ်ရက်အတွင်းဖမ်းမိ
************
ရှမ်းပြည်နယ်တောင်ပိုင်း၊ တောင်ကြီးမြို့၊ ကန်သာယာရပ်ကွက်ရှိ မြင်းဖြူနှစ်ကောင်ဆေးတိုက်မှ လေးလောင်းပြိုင်လူသတ်မှု ကျူးလွန်သူ ဆေးတိုက်ပိုင်ရှင်၏ မောင်နှမဝမ်းကွဲတော်စပ်သူအား ၂၀၁၉ ခုနှစ်၊ ဧပြီလ (၂၉)ရက်နေ့ နံနက် (၇)နာရီတွင် ကျောက်မဲမြို့၊ အထက်မြင်းကွင်းကျေးရွာနေအိမ်၌ ဖမ်းဆီးရမိထားကြောင်းသိရသည်။

ဆေးတိုက်ပိုင်ရှင်ဒေါ်အေးရွှေ၏ မောင်နှမဝမ်းကွဲတော်စပ်သူ တင်အုန်း(ခ)အိုက်အုံးအား အစစ်ခံဖော်ထုတ် ချက်အရ အမှုမှ သက်သေခံ ရွှေထည်ပစ္စည်းမျိုးစုံ (၁)ပိဿာနီးပါးခန့်နှင့် ငွေ(၇)သိန်း(၂)သောင်းကျပ်တို့ကို ၎င်း၏ နေအိမ်မှ ၂၀၁၉ ခုနှစ် မေလ (၁)ရက်နေ့တွင် အထူးအမှုစစ်အဖွဲ့မှ ရှာဖွေဖော်ထုတ်သိမ်းဆည်း နိုင်ခဲ့ကြောင်း သိရသည်။

ကနဦးစစ်ကြောချက်အရ မြင်းဖြူနှစ်ကောင်တိုင်းရင်းဆေးတိုက်ပိုင်ရှင် ဒေါ်အေးရွှေနှင့် မောင်နှမဝမ်းကွဲတော်စပ်သူ တင်အုန်း(ခ)အိုက်အုံးသည် မူးယစ်ဆေးဝါးစွဲနေသူတစ်ဦးဖြစ်ပြီး ဒေါ်အေးရွှေနှင့် အမွေခွဲမည်ဆိုပါက တင်အုန်း(ခ)အိုက်အုံး၏သား စိုင်းဝင်းမောင်နှင့် ယခုသေဆုံးသူ ဒေါ်အေးရွှေ၏ မွေးစားသမီး မနန်းခမ်းလှိုင်တို့ အတူခွဲဝေယူရမည်ဖြစ်သော်လည်း မနန်းခမ်းလှိုင်မှာ မွေးစားမိခင်နှင့်အနေနီးသဖြင့် သားဖြစ်သူ အမွေရနည်းမည်ကို စိုးရိမ်ခြင်းနှင့် ၎င်းကိုယ်တိုင်ငွေလိုနေခြင်းတို့ကြောင့် ကျူးလွန်ခြင်းဖြစ်သည်ဟု ထွက်ဆိုထားကြောင်း သိရသည်။

လူသတ်မှုကျူးလွန်ရန် ၎င်းမှ အဓိကစီမံဦးဆောင်ပြီး ကျန်လူများအကူအညီဖြင့် သတ်ခဲ့ခြင်းဖြစ်ကြောင်း သိရသဖြင့် ကျန်တရားခံအား ဆက်လက်ဖမ်းဆီးရမိရေးနှင့် ကျန်ရှိသက်သေခံ ပစ္စည်းများထပ်မံသိမ်းဆည်းရရှိရေး ဆောင်ရွက်လျက်ရှိကြောင်း သိရသည်။

တောင်ကြီးမြို့တွင် ဧပြီလ (၂၈)ရက်နေ့က ဒေါ်အေးရွှေ၏သားမက်ဖြစ်သူ စိုင်းဆေမွန်(ခ)ဆေမွန်၊ သမီးဖြစ်သူ မနန်းခမ်းလှိုင်နှင့် မြေးဖြစ်သူ စိုင်းဖဖတို့အပြင် အိမ်အကူ မအေးမိုးတို့အား အသတ်ခံရပြီး နေအိမ်ရှိ ရွှေထည်ပစ္စည်းမျိုးစုံ (၁၅)မျိုး၊ ငွေကျပ်သိန်း (၄၀)အပါအဝင် စုစုပေါင်းတန်ဖိုး ကျပ်(၁၅၅၇) သိန်းခန့် ပျောက်ဆုံးသွားခဲ့ခြင်းဖြစ်သည်။

အဆိုပါလူသတ်မှုအား တောင်ကြီးမြို့မရဲစခန်းတွင် (ပ)၇၉၃/၂၀၁၉၊ ရာဇသတ်ကြီးပုဒ်မ ၃၀၂/၃၉၄ ဖြင့် အမှုဖွင့်စစ်ဆေးနေခြင်းဖြစ်သည်။

Tachileik News Agency