~~~~~~~~⊰❂ Unicode Version ❂⊱~~~~~~~~

ကယားပြည်နယ်စိုးရနှင့် KNPP တို့ကြား (၇)လကြာရပ်ဆိုင်းနေသည့် ပြည်နယ်အဆင့် လစဉ်အစည်းအဝေး ပြန်လည်ကျင်းပတော့မည်
************
ကယားပြည်နယ်အစိုးရနှင့် KNPP တို့ကြား  (၇)လကြာရပ်ဆိုင်းခဲ့သည့် ပြည်နယ်အဆင့် လစဉ်ပုံမှန် အစည်းအဝေးကို ပြန်လည်လုပ်ဆောင်သွားတော့မည်ဖြစ်ကြောင်း သိရသည်။

ပြည်ထောင်စုငြိမ်းချမ်းရေးကော်မရှင်၊ ကယားပြည်နယ်အစိုးရနှင့် KNPP တို့  ၂၀၁၉ ခုနှစ်၊ မေလ (၆)ရက်နေ့က လွိုင်ကော်မြို့ Famous hotel တွင် တွေ့ဆုံဆွေးနွေးပြီးနောက် ၂၀၁၈ ခုနှစ်၊ အောက်တိုဘာလမှစ၍ ရပ်ဆိုင်းထားခဲ့သည့် ပုံမှန်အစည်းအဝေးကို ပြန်လည်ကျင်းပရန် သဘောတူညီခဲ့ကြခြင်း ဖြစ်ကြောင်း သိရသည်။

" ဒီနေ့အဓိက ရခဲ့တဲ့သဘောတူညီချက်က အဲဒီလစဉ်ပုံမှန်အစည်းအဝေးနဲ့ပက်သက်တဲ့ သဘောတူညီချက်ပဲ။ လစဉ်ပုံမှန်အစည်းအဝေးကို ပြန်ပြီးတော့ကျင်းပမယ်။ ကျင်းပတဲ့အခါလည်း ပိုပြီးတော့ အစည်းအဝေးပုံစံကျအောင် အစည်းအဝေးနဲ့ပတ်သက်တဲ့ လုပ်ငန်းလမ်းညွှန်လေးကိုလည်း ရေဆွဲပြီးသဘောတူညီနိုင်ခဲ့တယ်။ အရင်က လစဉ်ပုံမှန်အစည်းဝေးရှိခဲ့တယ်။ သဘောတူညီချက်အရ တရားဝင်ပုံစံဖြစ်ရမယ်ပေါ့။ သို့သော် ဆွေးနွေးတဲ့ပုံစံတွေက တစ်ခါတစ်လေ အလွတ်သဘောပိုဆန်သွားတာတွေ ဖြစ်တယ်။ ဒါတွေကြောင့် အစည်း အဝေးပုံစံလေး ပိုကျသွားအောင် ဆွေးနွေးတယ်။ ဆွေးနွေးကူဖို့အတွက် NRPC ကိုပါ ပါဝင်ဖို့ပြောထားတယ်။ ဒါလေးတွေ အဓိကသဘောတူခဲ့တာပါ " ဟု  KNPP (ကရင်နီအမျိုးသားတိုးတက်ရေးပါတီ)၏ ငြိမ်းချမ်းရေး ဖော်ဆောင်ရေးကော်မတီ ပြောရေးဆိုခွင့်ရှိသူ နဲ့နယ်ပလိုက ပြောသည်။

ယခုဆွေးနွေးပွဲမျာ ၂၀၁၈ ခုနှစ်၊ ဧပြီလအတွင်းက NRPC ၊ ပြည်နယ်အစိုးရနှင့် KNPP တို့ တွေ့ဆုံဆွေးနွေးမှုမှ  သဘောတူညီခဲ့သည့် ကိစ္စရပ်များအား တစ်နှစ်ပြည့်၍ ပြန်လည်သုံးသပ်ဆွေးနွေးခဲ့ခြင်းဖြစ်ပြီး အောက်ခြေတွင် နှစ်ဖက်အဖွဲ့များအနေဖြင့် ပိုမိုပူးပေါင်းဆောက်ရွက်ရန်သဘောတူညီမှုများ ရရှိခဲ့ပြီး KNPP နှင့်လည်းဆက်၍ တွေ့ဆုံသွားမည်ဖြစ်ကြောင်း နိုင်ငံတော်အတိုင်ပင်ခံရုံးဝန်ကြီးဌာန ညွှန်ကြားရေးမှူးချုပ် ဦးဇော်ဌေးထံမှ သိရသည်။

" မကြာခင်မှာ KNPP နဲ့ ကျွန်တော်တို့ NRPC နဲ့တွေ့ပါမယ်။ ပြီးရင်တပ်မတော်နဲ့တွေ့ပါမယ်။ တွေ့ပြီးရင်နောက်တစ်ဆင့်ကတော့ ကျွန်တော်တို့ NCA ရေးထိုးရေးပါပဲ။ အဲဒီအပေါ်မှာ အကြမ်းဖျင်း NCA ထိုးဖို့ဘယ်လိုသွားမယ် ဆိုတာထိလည်း ကျေကျေလည်လည် ဆွေးနွေးနိုင်တယ်။ ကျွန်တော်တို့ အစိုးရဖက်ကတော့ မေလထဲမှာတွေ့ဖို့ အဆိုပြုတယ်။ သို့သော် KNPP ဖက်ကတော့ သူတို့ဗဟိုကော်မတီမှာ ပြန်ဆွေးနွေးရအုံးမှာဖြစ်လို့ ပြန်အကြောင်းကြားမယ်လို့ ပြောပါတယ် " ဟု နိုင်ငံတော်အတိုင်ပင်ခံရုံးဝန်ကြီးဌာန ညွှန်ကြားရေးမှူးချုပ် ဦးဇော်ဌေးက ပြောသည်။

NRPC ၊ ပြည်နယ်အစိုးရ နှင့် KNPP တို့၏ တွေ့ဆုံဆွေးနွေးပွဲတွင် ပြည်နယ်အဆင့် အစိုးရ ၊တပ်မတော်ကိုယ်စာလှယ်များနှင့် KNPP ကိုယ်စားလှယ်များ လစဉ်ပုံမှန်အစည်းအဝေး ဆက်၍ ပြုလုပ်သွားရန် လုပ်ငန်းလမ်းညွှန်များရေးဆွဲ သဘောတူညီနိုင်ခဲ့ပြီး ပညာရေး ၊ ကျန်းမာရေး ၊ ဒေသဖွံ့ဖြိုးရေး ကဏ္ဍများအား ဆွေးနွေးခဲ့ကြကြောင်း သိရသည်။

KNPP အနေဖြင့် ၂၀၁၂ ခုနှစ်မှစ၍ အပစ်အခတ်ရပ်စဲရေိးကို ပြည်ထောင်စုအဆင့်သဘောတူညီစာချုပ် လက်မှတ်ရေးထိုးထားခြင်းဖြစ်သည်။

သတင်း၊ဓါတ်ပုံ #ဆန်းဖြိုးထွန်း