~~~~~~~~⊰❂ Unicode Version ❂⊱~~~~~~~~

အကောက်ခွန်လှုပ်ရှားစစ်ဆေးရေးအဖွဲ့က (၁၄)လအတွင်း ကျပ်သိန်းပေါင်း (၇၉၈၂၃)ကျော် တန်ဖိုးရှိ အကောက်ခွန်မဲ့နှင့် တရားမဝင်ပစ္စည်းများ ဖမ်းမိ
************
ရှမ်းပြည်နယ်မြောက်ပိုင်း၊ သိန်နီမြို့နယ် ရေပူစစ်ဆေးရေးစခန်းအပါအဝင် နယ်စပ်ကုန်သွယ်ရေး လမ်းကြောင်းများနှင့် လေကြောင်းတို့မှ အကောက်ခွန်မဲ့၊ တရားမဝင်ပစ္စည်းဖမ်းဆီးရမိမှုမှာ ၂၀၁၈ ခုနှစ်၊ ဇန်နဝါရီလ (၁၅)ရက်နေ့မှ ၂၀၁၉ ခုနှစ်၊ မေလ (၃)ရက်နေ့အတွင်း စုစုပေါင်းတန်ဖိုး ကျပ်သိန်း (၇၉၈၂၃)ကျော်ရှိကြောင်း သိရသည်။

အကောက်ခွန်မဲ့တင်သွင်း၊ တင်ပို့သည့်ပစ္စည်းများကို အကောက်ခွန်လှုပ်ရှားစစ်ဆေးရေးအဖွဲ့က စိစစ်ဖမ်းဆီးခြင်းလုပ်ဆောင်ရာ အဆိုပါကာလအတွင်း အများဆုံးဖမ်းဆီးရမိသည့်ပစ္စည်းအများစုမှာ ပြည်တွင်းသို့ တရားမဝင်၊ အကောက်ခွန်မဲ့တင်သွင်းလာသည့် ဆိုဒီယမ်ဆိုင်ယာနိုဒ်နှင့် အမိုနီယမ်နိုက်ထရိတ်ကဲ့သို့ ဓါတုပစ္စည်းများ၊ လူသုံးကုန်၊ စားသောက်ကုန်များ၊ မော်တော်ယာဉ်အပိုပစ္စည်းများပါဝင်ပြီး ပြည်ပသို့ တရားမဝင်တင်ပို့သည့် ကျောက်စိမ်းတို့ဖြစ်ကြောင်း သိရသည်။

ယင်းကဲ့သို့ ဖမ်းဆီးရမိသည့်ပစ္စည်းများကို ပင်လယ်ရေကြောင်းအကောက်ခွန်အက်ဥပဒေအရ ရွေးဒဏ်၊ လေလံ နှင့် ဖျက်ဆီးခြင်းများ လုပ်ဆောင်နေပြီး အကောက်ခွန်ဦးစီးဌာနက ချမှတ်သောအမိန့် (သို့မဟုတ်) ဆုံးဖြတ်ချက်အပေါ် နစ်နာသည်ဟုထင်မြင်ယူဆပါက အယူခံတင်ပြနိုင်ကြောင်း သိရသည်။

အကောက်ခွန်လှုပ်ရှားစစ်ဆေးရေးအဖွဲ့ကို ၂၀၁၈ ခုနှစ်၊ ဇန်နဝါရီလ (၁၅)ရက်နေ့တွင် စတင်ဖွဲ့စည်းပြီး မူဆယ် - လားရှိုး - မန္တလေး ပြည်ထောင်စုလမ်းမကြီး၊ ရန်ကုန်ဘူတာကြီးနှင့် လမ်းဘူတာများ၊ ရန်ကုန်အပြည်ပြည်ဆိုင်ရာလေဆိပ်တို့တွင် စစ်ဆေးဖမ်းဆီးခြင်းများကို လုပ်ဆောင်နေခြင်းဖြစ်သည်။

Tachileik News Agency
Photo: Custom