~~~~~~~~⊰❂ Unicode Version ❂⊱~~~~~~~~

မိုင်းပျဉ်းတွင် နေအိမ်၌ဘထ္ထရီအားသွင်းရာမှ အပူလွန်ကဲပြီး နေအိမ် (၄)လုံး မီးလောင်ဆုံးရှုံး
***********
ရှမ်းပြည်နယ်အရှေ့ပိုင်း၊ မိုင်းပျဉ်းမြို့တွင် ၂၀၁၉ ခုနှစ်၊ မေလ (၂၃)ရက်နေ့က နေအိမ်တွင် ဘထ္ထရီအားသွင်းထားခဲ့ရာမှ အပူလွန်ကဲပြီး မီးလောင်မှုဖြစ်ပွားရာ နေအိမ်(၄)လုံး မီးလောင်ဆုံးရှုံးသွားကြောင်း သိရသည်။

မိုင်းပျဉ်းမြို့၊ ပိန်းဆန်းရပ်ကွက်၊ ဝမ်မိုင်ကျေးရွာတွင် မီးလောင်မှုဖြစ်ပွားကြောင်းသတင်းအရ ညနေ (၄)နာရီအချိန်တွင် မိုင်းပျဉ်းမြို့မရဲတပ်ဖွဲ့က သက်သေများနှင့်အတူ သွားရောက်စစ်ဆေးရာ ဦးဟဲနာလီက တောင်ယာသွားနေစဉ် အိမ်၌ ဘက်ထရီအားသွင်းထားခဲ့ရာမှ အပူလွန်ပြီး မြေစိုက်ထရံကာနေအိမ်မှာ မီးစတင်လောင်ကျွမ်းခဲ့ခြင်းဖြစ်သည်ကို စစ်ဆေးတွေ့ရှိရကြောင်း သိရသည်။

ယင်းနောက် ပတ်ဝန်းကျင်နေအိမ်(၃)လုံးကိုပါ ကူးစက်လောင်ကျွမ်းခဲ့ရာ စုစုပေါင်း နေအိမ် (၄)လုံး မီးလောင်ဆုံးရှုံးပြီး ညနေ(၄)နာရီ (၁၅)မိနစ်အချိန်တွင် မီးငြိမ်းသွားခဲ့ခြင်းဖြစ်ကြောင်း သိရသည်။
အဆိုပါမီးလောင်မှုနှင့်ပတ်သက်၍ မီးစတင်လောင်ကျွမ်းသည့်နေအိမ်မှ ဦးဟဲနာလီအား မိုင်းပျဉ်းမြို့မရဲစခန်းတွင် (ပ)၁၀/၂၀၁၉၊ ရာဇသတ်ကြီးပုဒ်မ ၂၈၅ ဖြင့်အမှုဖွင့်ထားကြောင်း သိရသည်။

သတင်း #ငြိမ်းချမ်း(ပြည်)
ဓါတ်ပုံ - ရဲတပ်ဖွဲ့