~~~~~~~~⊰❂ Unicode Version ❂⊱~~~~~~~~

အရည်အသွေးမပြည့်မီသည့်ဆီများ ဆက်လက်မရောင်းရန် လားရှှိုးရှိ စက်သုံးဆီဆိုင် (၃)ဆိုင် စားသုံးသူရေးရာဦးစီးဌာနထံ ခံဝန်ကတိလက်မှတ်ရေးထိုး
***************
ရှမ်းပြည်နယ်မြောက်ပိုင်း၊ လားရှိုးမြို့တွင် စက်သုံးဆီအရောင်းဆိုင်ကြီး (၃) ဆိုင်မှ တာဝန်ရှိသူများအား အရည်အသွေးမပြည့်မီသည့်ဆီများ ဆက်လက်ရောင်းချပါက စားသုံးသူဥပဒေအရအရေးယူခံရမည် ကိုသိရှိကြောင်း ၂၀၁၉ ခုနှစ်၊ ဧပြီလ (၂၉) ရက်တွင် စားသုံးသူရေးရာဦးစီးဌာနက ခံဝန်ကတိလက်မှတ်ရေးထိုးထားစေကြောင်း သိရသည်။

"မြန်မာ့ရေနံထွက်ပစ္စည်းရောင်းဝယ်ရေးဌာနကနေ အရည်အသွေးစစ်ဆေးမယ့် သက်ဆိုင်ရာဌာနကို ပေးပို့ စစ်ဆေးချက်အရ အဖွဲ့စုံနဲ့စစ်ဆေးခဲ့တဲ့ ဆိုင်ကြီး (၅) ဆိုင်ထဲက ဆိုင် (၃) ဆိုင် မှာရောင်းချနေတဲ့ ဓါတ်ဆီ 95 RON နဲ့ ပရီမီယမ် ဒီဇယ်ဆီတွေမှာ အရည် အသွေး မပြည့်မီတဲ့အတွက် ပထမဦးဆုံးအဖြစ် ဒဏ်ငွေရိုက် သတိပေး လိုက်တယ်။ အဲဒီဆီတွေကို ဆက်လက် ရောင်းချနေရင် ပြည်သူကိုလိမ်လည်ရောင်းချသလို ဖြစ် နေမယ်။ ဒါကြောင့် အရည်အသွေးမပြည့်မီတဲ့ဆီတွေကို ဆက်ပြီးရောင်းချရင် စားသုံးသူကာကွယ်ရေးဥပဒေ အရ အရေးယူခံရမယ်ဆိုတာကို သိရှိကြောင်း အဲဒီဆိုင် (၃) ခု က တာဝန်ရှိသူတွေကို ဝန်ခံကတိလက်မှတ်ထိုး စေတာ ဖြစ်ပါတယ်။ အရည်အသွေးမပြည့်မီတဲ့ဆီတွေကို ဆက်မရောင်းဘဲနဲ့ တစ်ခြားတစ်နေရာ ကနေပြန််ယူပြီး အရည်အသွေးပြည့်မှီတဲ့ဆီတွေကို ဆက်ရောင်းမယ်ဆိုရင်တော့ ရောင်းလို့ရပါတယ်" ဟု စားသုံးသူရေးရာဦးစီးဌာန ဒုတိယ ပြည်နယ်ဦးစီးမှူးရုံး (လားရှိုး) မှ ဒုတိယပြည်နယ် ဦးစီးမှူး ဦးဇော်မင်းသန်းက တာချီလိတ်သတင်းအေဂျင််စီသို့ ပြောသည်။

လားရှိုးမြို့ရှိ စက်သုံးဆီအရောင်းဆိုင်ကြီး ၅ ဆိုင်အား မြန်မာ့ရေနံထွက် ပစ္စည်းရောင်းဝယ်ရေးဌာန အပါအဝင် ဌာန (၆) ခုပါဝင်သည့်ပူးပေါင်းအဖွဲ့က ၂၀၁၉ ခုနှစ် ဖေဖေါ်ဝါရီလ (၁) ရက်နေ့က သွားရောက်စစ်ဆေးခဲ့ရာ အရည်အသွေးမပြည့်မီသည့်ဆီများရောင်းချနေသည့် lucky 7 ၊ ဝင်းချယ်ရီ ( ၁ )နှင် ရတနာမိုးစက်သုံးဆီ အရောင်းဆိုင်များကို စစ်ဆေးတွေ့ရှိခဲ့ခြင်းဖြစ်သည်။

လားရှိုးမြို့နှင့် လားရှိုးမြို့နယ်အတွင်းရှိ စက်သုံးဆီအရောင်းဆိုင်များတွင် အချိန်အတွယ် ပြည့်မီမှု ရှိမရှိနှင့် အရည်အသွေး ပြည့်ဝမှုရှိမရှိတို့ကို မြန်မာ့ရေနံထွက်ပစ္စည်းရောင်းဝယ်ရေးဌာန ပါဝင်သည့် ပူးပေါင်းအဖွဲ့နှင့် ထပ်မံစစ်ဆေးသွားရန်ရှိကြောင်း စားသုံးသူရေးရာဦးစီးဌာန ဒုတိယပြည်နယ်ဦးစီးမှူးရုံး ( လားရှိုး ) ၏ တာဝန်ရှိသူထံက  သိရသည်။

သတင်း #နေဖြိုးမြင့်