~~~~~~~~⊰❂ Unicode Version ❂⊱~~~~~~~~

ရှမ်းပြည်နယ်အရှေ့ပိုင်း၏ အလှမောင်၊ အလှမယ်နှင့် အိမ်ထောင်ရှင်အလှမယ်ပြိုင်ပွဲအတွက် လျှောက်လွှာပိတ်ရက် ထပ်တိုးပေးထား
***********
ရှမ်းပြည်နယ် အရှေ့ပိုင်း၊ တာချီလိတ်မြို့တွင်ကျင်းပမည့် ရှမ်းပြည်အရှေ့ပိုင်းကိုယ်စားပြု Mister Global၊ Miss & Mrs Queen of the World Tachileik အတွက် လူတွေ့စစ်ဆေးခြင်းကို ၂၀၁၉ ခုနှစ်၊ ဖေဖေါ်ဝါရီလ (၇)ရက်နေ့၌ ဂိုးလ်ဒင်းချယ်ရီဟိုတယ်တွင် ကျင်းပမည်ဖြစ်ပြီး လျှောက်လွှာများကို လူတွေ့စစ်ဆေးခြင်း မတိုင်မီအထိ လက်ခံပေးနေကြောင်း သိရသည်။

“လက်ရှိပြိုင်ပွဲဝင်ဖို့ လျှောက်ထားသူတွေအပြင် ထပ်ပြီးစုံစမ်းသူတွေလည်းရှိနေတဲ့အတွက် လျှောက်လွှာပိတ်ရက်ကို ထပ်တိုးပေးထားပါတယ်။ လျှောက်လွှာတွေကို အခမဲ့ရယူလျှောက်ထားနိုင်ပါတယ်”ဟု အဆိုပါပြိုင်ပွဲကို ဦးစီးကျင်းပသည့် MMPA ၏ Regional Director ဦးစောစိုးမင်းအောင်က တာချီလိတ်သတင်းအေဂျင်စီသို့ ပြောသည်။

လက်ရှိအချိန်ထိ လျှောက်လွှာတင်ထားသည့် Mister  (၄၀) ဦး၊ Miss (၄၈) ဦးနှင့် Mrs (၇၅) ဦးရှိနေပြီဖြစ်ပြီး စုံစမ်းသူများလည်းရှိနေဆဲဖြစ်သဖြင့် လျှောက်လွှာပိတ်ရက်ကို ထပ်တိုးပေးထားခြင်းဖြစ်ကြောင်း သိရသည်။
အဆိုပါပြိုင်ပွဲမှာ အိမ်ထောင်မရှိသည့် အမျိုးသားနှင့် အမျိုးသမီးလူငယ်များအတွက် Mister နှင့် Miss ရွေးချယ်ပွဲအပြင် အိမ်ထောင်ရှင်အမျိုးသမီးများအတွက် Mrs ပြိုင်ပွဲကိုပါထည့်သွင်းကျင်းပခြင်းဖြစ်ပြီး ပြိုင်ပွဲကို ကမ္ဘာ့အဆင့်မီပြိုင်ပွဲများအတိုင်း ကျင်းပမည်ဟု MMPA ၏တာဝန်ရှိသူက ဆိုသည်။

“ကျွန်မတို့ ဒီပွဲရဲ့ထူးခြားချက်က ဘာလဲဆိုတော့ ဒေသတွင်းမှာ ကျင်းပတယ်ဆိုပေမဲ့ ကမ္ဘာ့အဆင့်မီပွဲတစ်ခုလိုပဲ ကျင်းပသွားမှာပါ။ ပြိုင်ပွဲဝင်တွေကို လေ့ကျင့်တာ၊ ပြိုင်ပွဲအမှတ်ပေးစနစ်ကအစ ကမ္ဘာ့အဆင့်မီပွဲလိုပဲ လုပ်ဆောင်သွားမှာပါ။ နောက်တစ်ခုက အိမ်ထောင်ရှင်အလှမယ်ရွေးပွဲကို ဒီဒေသမှာ မကျင်းပသေးတဲ့အတွက် တစ်ခါတည်း ထည့်သွင်းကျင်းပတာပါ။ အမျိုးသမီးတွေဟာ အိမ်ထောင်ကျသွားပြီဆိုတာနဲ့ သူတို့အရည်အချင်းတွေ ပြသခွင့်မရှိတော့တာမဟုတ်ဘူးဆိုတာ သိစေချင်လို့ပါ”ဟု MMPA ၏ နာယကဖြစ်သူ Mrs.Queen of the World International 2018 ဆုရ အလှမယ် မျိုးမမက ပြိုင်ပွဲနှင့်ပတ်သက်၍ ရှင်းလင်းသည်။

ပြိုင်ပွဲကို ၂၀၁၉ ခုနှစ်၊ ဖေဖေါ်ဝါရီလ (၁၁) ရက်နေ့ ညနေ (၆)နာရီတွင် တာချီလိတ်မြို့ ရန်အောင်မြေရပ်ကွက်၊ ပါလျှံတရုတ်(တာ့ဟွား)ဘုံကျောင်းတွင် ကျင်းပသွားမည်ဖြစ်ပြီး အဆိုတော်ဖိုးပြည့်နှင့်အဖွဲ့ ဖျော်ဖြေမည်ဖြစ်ကြောင်း သိရသည်။

 Mister Global၊ Miss & Mrs Queen of the World Tachileik ကို ဦးစီးကျင်းပသည့် MMPA သည် တရားဝင်မှတ်ပုံတင်ထားသည့် အဖွဲ့အစည်းတစ်ခုဖြစ်ပြီး နိုင်ငံတကာအဆင့် အလှမယ်၊ အလှမောင်နှင့် အိမ်ထောင်ရှင်အလှမယ် ရွေးချယ်ပွဲများကို စီစဉ်ကျင်းပနေသည့်အဖွဲ့အစည်းတစ်ခုဖြစ်ကြောင်း သိရသည်။
လျှောက်လွှာများကို တာချီလိတ်မြို့တွင် ဇူလီယန် အမှတ် (၅) ပါလျံ (၃)၊ BT ဆီပန့်နှင့် မျက်နှာချင်းဆိုင်၊ ဘုရင့်နောင်ဈေးရုံးခန်း၊ ဂိုးလ်ဒင်းချယ်ရီဟိုတယ်၊လွိုင်နမ့်ခုံးခရီးသည်ပို့ဆောင်ရေးအဆင့်မြင့်ယာဉ်လိုင်း၊ ကျိုင်းတုံမြို့တွင် စိုင်းဟိန်းမာန် Royal Art ဆက်သွယ်ရေးရုံး၊ သစ်တစ်ပင်တောင် နှင့် မိုင်းဆတ်မြို့တွင် အိမ်အမှတ် (၁၁၂)၊ မယ်ဆွမ်တောင် (နောင်ဟီး)ရပ်တို့၌ အခမဲ့ရယူနိုင်မည်ဖြစ်ကြောင်း သိရသည်။

ပြိုင်ပွဲနှင့်ပတ်သက်၍ အသေးစိတ်သိရှိလိုပါက ဖုန်း 09 428231070နှင့် 09 250478077 တို့သို့ ဆက်သွယ်မေးမြန်းနိုင်ကြောင်း သိရသည်။

Tachileik News Agency