~~~~~~~⊰❂ unicode ❂⊱~~~~~~~~
************
Samsung Tech Institute ၏ Mobile Application Training 2018 တွင် ပြည်ကွန်ပျူတာတက္ကသိုလ်မှ အဖွဲ့က ပထမ၊ ရန်ကုန်ကွန်ပျူတာတက္ကသိုလ်မှ အဖွဲ့က ဒုတိယနှင့် သထုံကွန်ပျူတာတက္ကသိုလ်မှ အဖွဲ့က တတိယအသီးသီးရသွားကြောင်း သိရသည်။
"ညီမတို့ App က Chatting Game ပုံစံမျိုးပါ။ ဒီ Game ကို တစ်ယောက်တည်းလည်း ဆော့လို့ရတယ်။ နှစ်ယောက်လည်း ဆော့လို့ရပါတယ်။ တစ်တန်းကနေ ရှစ်တန်းအထိ ကျောင်းသားတွေက Meaning စာအုပ်တွေနဲ့ Meaning စစ်စရာမလိုဘဲ ဒီကနေပဲစစ်လို့ရပါတယ်"ဟု ပထမဆုရရှိခဲ့သည့် ကွန်ပျူတာတက္ကသိုလ်(ပြည်)ကိုယ်စားပြုအသင်းမှ မအိကေခိုင်က တာချီလိတ်သတင်းအေဂျင်စီသို့ပြောသည်။
အဆိုပါ Mobile Applicationကို ကလေးများ မြန်မာစာနှင့် အင်္ဂလိပ်စာ စာလုံးပေါင်းသတ်ပုံနှင့် စွမ်းရည်များ တိုးတက်လာစေရန် ရည်ရွယ်၍ ရေးသားထားခြင်းဖြစ်ပြီး Application တွင် တခြားသူရေးသားလိုက်သော စကားလုံး၏ အဆုံးသတ် အက္ခရာဖြင့် မိမိ၏ စကားလုံးကို ပြန်စရမည့် ပုံစံဖြင့် ကစားသွားရမည်ဖြစ်ကာ စကားလုံးများ၏ အသံထွက်ကိုလည်း ထည့်သွင်းပေးထားသလို မူလတန်းကလေးများအတွက် ရည်ရွယ်၍ ထည့်သွင်းထားသည့် Kid Puzzle ကိုလည်း ထည့်သွင်းထားကြောင်း သိရသည်။
"ဒီ Application ရေးဖို့က ဒါမျိုးပုံစံကစားနည်းကို ကျွန်တော်ငယ်ငယ်ကတည်းက ကျွန်တော့အဖေတို့ အမတို့နဲ့ ဆော့ခဲ့ဖူးပါတယ်။ ဒါမျိုးပုံစံ Mobile Application တွေက မရှိသေးပါဘူး။ ကျွန်တော် ရှာကြည့်ပါသေးတယ်။ ဒါကြောင့် ကျွန်တော်တို့က ဒါကို Develop လုပ်ပြီး ဒီApplicationဖြစ်အောင် ရေးလိုက်တာပါ။ ဒီAppကို အများသုံးနိုင်ဖို့အတွက်လည်း နောက် နှစ်ပတ်၊ သုံးပတ်ထဲမှာ Play Storeပေါ် တင်နိုင်အောင် လုပ်သွားပါမယ်"ဟု ပထမဆုရရှိခဲ့သည့် ကွန်ပျူတာတက္ကသိုလ်(ပြည်)ကိုယ်စားပြုအသင်းမှ ကိုဝေယံထွန်းက တာချီလိတ်သတင်းအေဂျင်စီသို့ပြောသည်။
မြန်မာတစ်နိုင်ငံလုံးရှိ ကွန်ပျူတာတက္ကသိုလ်(၂၇)ခုမှ အဖွဲ့များဝင်ရောက်ယှဉ်ပြိုင်နေသည့် အဆိုပါ သင်တန်းတွင် War of Words ကိုဖန်တီးသည့် ကွန်ပျူတာတက္ကသိုလ်(ပြည်)မှ အဖွဲ့ကို ပထမဆုအဖြစ် ကျပ်(၂၁)သိန်းကို ည်းကောင်း၊ Smart Payကို ဖန်တီးသည့် ရန်ကုန်ကွန်ပျူတာတက္ကသိုလ်မှအဖွဲ့ကို ဒုတိယဆု ကျပ်(၁၅)သိန်းကိုလည်းကောင်း၊ ရေဗျို့ရေ ကိုဖန်တီးသည့် ကွန်ပျူတာတက္ကသိုလ်(သထုံ)မှအဖွဲ့ကို တတိယဆု ကျပ်(၉)သိန်းကိုလည်းကောင်း အသီးသီးရွေးချယ်ချီးမြှင့်ခဲ့ပြီး နှစ်သိမ့်ဆု-၁ နှင့် The Best Performance ဆုကို Waste To Moneyကို ဖန်တီးသည့် ကွန်ပျူတာတက္ကသိုလ်(မန္တလေး) မှအဖွဲ့ကို လည်းကောင်း၊ နှစ်သိမ့်ဆု(၂)ကို Speaking Partners ကို ဖန်တီးသည့် ရန်ကုန်ကွန်ပျူတာတက္ကသိုလ်မှ အဖွဲ့ကိုလည်းကောင်း အသီးသီးရွေးချယ်ချီးမြှင့်လိုက်ကြောင်း သိရသည်။
Samsung Tech Instituteမှ ဖွင့်လှစ်ခဲ့သည့် Mobile Application Training 2018 သင်တန်း၏ သင်တန်းဆင်းပွဲနှင့် ဆုပေးပွဲကို ၂၀၁၈ ခုနှစ်၊ နိုဝင်ဘာလ(၁၃)ရက်နေ့ နံနက်ပိုင်းက ရန်ကုန်မြို့ရှိ IBC ခန်းမ၌ ကျင်းပခဲ့ခြင်းဖြစ်သည်။
အဆိုပါ သင်တန်းကို မြန်မာတစ်နိုင်ငံလုံးရှိ ကွန်ပျူတာတက္ကသိုလ်(၂၇)ကျောင်းမှ ကျောင်းသား၊ ကျောင်းသူ (၉၀)ဦးက ၂၀၁၈ ခုနှစ်၊ အောက်တိုဘာလ (၈)ရက်နေ့မှ နိုဝင်ဘာလ(၁၃)ရက်နေ့အထိ တက်ရောက်ခဲ့ကြပြီး တစ်ဖွဲ့လျှင် (၃)ဦးပါသည့် အဖွဲ့ပေါင်း (၃၀)က Mobile Application များ ရေးသားယှဉ်ပြိုင်ခဲ့ကြခြင်း ဖြစ်ကြောင်း သိရသည်။
အဆိုပါ သင်တန်းတွင် Mobile Applicationရေးသား ဖန်တီးရန်အတွက် လိုအပ်သော အခြေခံ ဘာသာရပ်များကို အဓိကထား သင်ကြားပေးခဲ့ ခြင်းဖြစ်ပြီး Samsung Tech Institute မှ မြန်မာတစ်နိုင်ငံလုံးရှိ ကွန်ပျူတာတက္ကသိုလ်များတွင် နှစ်စဉ်ဝင်ခွင့်စာမေးပွဲများ ကျင်းပပေးကာ သင်တန်းသားများကို ခေါ်ယူနေခြင်း ဖြစ်သည်။
သတင်း #ဇွဲမြတ်
~~~~~~~~~~~~~~~~~~ ေၾကာ္ျငာ ~~~~~~~~~~~~~~~~~~~~ 
