~~~~~~~~⊰❂ unicode ❂⊱~~~~~~~~

“ဒီဟာတွေ လုပ်မယ်ဆိုတာ ကျွန်တော်တို့ဘက်ကို အကြောင်းကြားတာတွေလည်း မရှိဘူး။ ဒါ ကျွန်တော်တို့ ကျေးရွာအုပ်ချုပ်ရေးဘက်က တင်လို့သာ သိရတာဆိုတော့ သူတို့ကို ကန့်ကွက်စာထောက်လိုက်တော့ သူတို့ ဖြေရှင်းချက်ပေးရမှာပေါ့။ လောလောဆယ်တော့ တရုတ်ဘက်က ဖြေရှင်းချက်တော့ ရောက်မလာသေးပါဘူး။ ကျွန်တော်တို့က နှစ်နိုင်ငံကလည်း ကပ်နေတော့ ကျွန်တော်တို့ဘက်က ရွာသူရွာသားတွေက နယ်စပ်မျဉ်း (၁၀)မီတာထဲ ရောက်နေတယ်ထင်ရင် သူတို့က ကန့်ကွက်၊ ကျွန်တော်တို့ကလည်း သူတို့ဘက်ကနေ နယ်စပ်မျဉ်းထဲ ရောက်နေတယ်ထင်ရင် လှမ်းကန့်ကွက်ပေါ့။ ဒီလိုပဲ နှစ်နိုင်ငံညှိနှိုင်းဆောင်ရွက်ကြရတာပါ”ဟု မူဆယ် ဒုတိယခရိုင်အုပ်ချုပ်ရေးမှူး ဦးဥက္ကာက တာချီလိတ်သတင်းအေဂျင်စီသို့ ပြောသည်။

မြန်မာ - တရုတ် နှစ်နိုင်ငံနယ်စပ် မူဆယ်ခရိုင်အတွင်း ဖိုင်ကောင်းရွာသည် နယ်နမိတ်မျဉ်းအနီးတွင် တည်ရှိနခြေင်းဖြစ်ပြီး တရုတ်နိုင်ငံသားများက မြေတူးစက်များဖြင့် မြောင်းတူးခြင်းကို စက်တင်ဘာလ (၁၉)ရက်နေ့တွင် လာရောက်လုပ်ဆောင်နေကြောင်း ဖိုင်ကောင်းကျေးရွာအုပ်ချုပ်ရေးမှူးမှ သတင်းပေးပို့ချက် အရ မြို့အုပ်ချုပ်ရေးနှင့် တာဝန်ရှိသူများပါဝင်သည့် အဖွဲ့က ယင်းနေ့မှာပင် သွားရောက် တားမြစ်ခဲ့ခြင်း ဖြစ်ကြောင်း သိရသည်။

“မနေ့က သူတို့ကို ချက်ချင်းပဲ မြို့အုပ်ချုပ်ရေးအဖွဲ့တွေ၊ တာဝန်ရှိသူတွေက သွားရောက်တားမြစ် ဆောင်ရွက်တဲ့ အတွက်ကြောင့်ရယ် မြို့နယ် နယ်စပ်အာဏာပိုင်အဖွဲ့၊ ခရိုင်အထွေထွေ အုပ်ချုပ်ရေးဦးစီးဌာနကနေ တရုတ်ဘက်ကို ကန့်ကွက်စာပေးပို့ခဲ့တာတွေကြောင့် မနေ့ညနေက သူတို့ပစ္စည်းတွဖြေုတ်ပြီး သိမ်းသွားတယ်ဆိုတာ သတင်းပို့လာပါတယ်။ ဓာတ်ပုံမှတ်တမ်းမှာလည်း သူတို့ဖြုတ်ပြီး သိမ်းသွားတာ တွေ့ရပါတယ်”ဟု မူဆယ်ခရိုင် ဒုတိယအုပ်ချုပ်ရေးမှူး ဦးဥက္ကာက ပြောသည်။

တရုတ်နိုင်ငံဘက်မှ တာဝန်ရှိသူများထံ မြန်မာနိုင်ငံဘက်မှ တာဝန်ရှိသူများက စက်တင်ဘာလ (၁၉)ရက်နေ့တွင် ကန့်ကွက်စာပေးပို့ထားပြီး မြေတူးဖော်ထားသည့်နေရာကို နှစ်နိုင်ငံ ပူးပေါင်းစစ်ဆေးရေး အဖွဲ့ဖြင့် စစ်ဆေးသွားမည်ဖြစ်ကြောင်း သိရသည်။

မြန်မာ - တရုတ်နှစ်နိုင်ငံနယ်စပ်မျဉ်း၏ တစ်ဖက်တစ်ချက် (၁၀)မီတာ ( ၃၂ ပေကျော်)အတွင်း နှစ်နိုင်ငံလုံးမှ တည်ဆောက်ခြင်း၊ တူးဖော်ခြင်းအပါအဝင် မည်သည့်ဆောင်ရွက်မှုကိုမှ ဝင်ရောက်လုပ်ကိုင်ခွင့်မရှိကြောင်း သိရသည်။

Tachileik News Agency
ဓာတ်ပုံ - Kachin News Group