တာချီလိတ်မြို့ ၀မ်လုံးကျေးရွာအုပ်စု၊ ဟွေခိုက်ကျေးရွာရှိ ဘုန်းကြီးကျောင်းကွေ့တွင် ယနေ့ သြဂုတ်လ(၂၂)ရက် နံနက်(၃)နာရီဝန်းကျင်က မော်တော်ယာဉ်တစ်စီးမှာ အရှိန်မထိန်းနိုင်ဘဲ ကျွန်းပင်အား ၀င်ရောက် တိုက်မိရာမှ အမည်မသိ အမျိုးသားတစ်ဦး လက်ပြတ်ကာ ဒဏ်ရာများဖြင့် ပွဲချင်းပြီး သေဆုံးသွားပြီး ထွက်ပြေးသွားသည့် ယာဉ်မောင်းအား စုံစမ်းနေဆဲဖြစ်ကြောင်း တာချီလိတ်ယာဉ်ထိန်းရဲတပ်ဖွဲ့မှ သိရသည်။
သေဆုံးသွားသူအား မည်သူမည်ဝါ ဆိုသည်ကို မသိရှိရသေးသည့်အပြင် ၎င်း၏ မိသားစုများမှ သိရှိပါက လာရောက်ကြည့်နိုင်ရန်အတွက် ရုပ်အလောင်းအား မဟာမြတ်မုနိဘုရားကြီးကျောင်းတိုက်တွင် ယနေ့ သြဂုတ်လ(၂၂)ရက်နေ့မှစ၍ (၃)ရက်တိတိထားကာ စောင့်ပေးသွားမှာဖြစ်ကြောင်း တာချီလိတ်နာရေးကူညီမှုအသင်းမှ သိရသည်။
ဖြစ်စဉ်များနှင့် ပတ်သက်၍ ယာဉ်အားမဆင်မခြင်မောင်းနှင်ခဲ့သူအပေါ် ဥပဒေအရ အရေးယူ စုံစမ်းဖော်ထုတ်နိုင်ရန်အတွက် တာချီလိတ်မြို့မရဲစခန်းတွင် ယာဉ်(ပ) ၃၇/၂၀၁၅၊ ပြစ်မှုပုဒ်မ ၃၀၄-ကအရ အမှုဖွင့်ထားရှိပြီး တိမ်းရှောင်နေသူအား ဖမ်းဆီးရမိရန် စုံစမ်းနေလျက်ရှိကြောင်း တာချီလိတ်ယာဉ်ထိန်းရဲတပ်ဖွဲ့မှ သိရှိရသည်။
ဓါတ်ပုံ။ ။ တာချီလိတ်နာရေးကူညီမှုအသင်း
