" သားသတ်လုပ်ငန်းကို စနစ်တကျစစ်ဆေးမှုတွေ လုပ်သွားနိုင်ဖို့ မွေးကုက လုပ်ငန်းရှင်တွေနဲ့ အဓိက ဆွေးနွေးတာပါ။ အခြေအနေက အများကြီးကောင်းလာတယ်။ ကျွန်တော်တို့ (၈) လပိုင်းတုန်းက ကင်းလွတ်ခွင့်ပေးခဲ့ရတာတွေ ရှိတယ်။ (၉) လပိုင်းတုန်းက တစ်ရက်ကို (၅) ကောင်၊ (၇) ကောင်လောက်ပဲရှိတာ။ အခုဆို အကောင် (၂၀) လောက်ရှိလာပြီ။ ကျိုင်းတုံမှာ ဝက်သားစားသုံးမှုက နည်းနည်းလေးတိုးလာတယ်လို့ ပြောလို့ရတယ်။ "ဟု ကျိုင်းတုံမြို့နယ်စည်ပင်သာယာရေးဌာနမှ အမှုဆောင်အရာရှိ ဦးကျော်မင်းထိုက်က တာချီလိတ်သတင်းအေဂျင်စီသို့ ပြောသည်။
ဈေးကွက်အတွင်း သန့်ရှင်းသောအသားများ ထုတ်လုပ်ဖြန့်ဖြူးနိုင်ရေးအတွက် ကျိုင်းတုံမြို့နယ် စည်ပင်သာယာရေးဌာန၊ မွေးမြူရေးနှင့် ကုသရေးဦးစီးဌာနတို့က သားသတ်လုပ်ငန်းများကို စနစ်တကျ စစ်ဆေးနိုင်ရေးအတွက် ၂၀၁၉ ခုနှစ် အောက်တိုဘာ (၂) ရက်နေ့က တွေ့ဆုံဆွေးနွေးထားကြခြင်းဖြစ်သည်။
ကျိုင်းတုံမြို့နယ်အတွင်း ၂၀၁၉-၂၀၂၀ ဘဏ္ဍာရေးနှစ်အတွက် သားသတ်လုပ်ငန်းလိုင်စင်ရယူထားသူများတွင် ဝက်လုပ်ငန်းလုပ်ကိုင်သူ (၄၀) ဦး၊ အမဲလုပ်ငန်း လုပ်ကိုင်သူ (၃) ဦးနှင့် ဆိတ်လုပ်ငန်းလုပ်ကိုင်သူ (၁) ဦးတို့ ပါဝင်ခြင်းဖြစ်သည်။
သတင်း #ဟန်စိုးထိုက်
