မဲခေါင်မြစ်ဝှမ်း (၅) နိုင်ငံမှ သံဃာတော်များ၏ ဓမ္မခရီးစဉ်အဖြစ် ရှမ်းပြည်နယ် (အရှေ့ပိုင်း) တာချီလိတ်နှင့် ကျိုင်းတုံမြို့များ၌ ကြွရောက်ရာတွင် အခမ်းအနားများကျင်းပရန်အတွက် မြန်မာကိုယ်စားပြုဆရာတော်များ ၂၀၁၉ ခုနှစ်၊ အောက်တိုဘာလ (၁၄) ရက်နေ့၌ တာချီလိတ်မြို့သို့ ကြွရောက်လာပြီဖြစ်သည်။

မြန်မာ၊ ထိုင်း၊ ကမ္ဘောဒီးယား၊ လာအိုနှင့် ဗီယက်နမ်နိုင်ငံများမှ သံဃာတော်များသည် အောက်တိုဘာလ (၁၄) ရက်နေ့မှ အောက်တိုဘာလ (၃၁) ရက်နေ့အထိ (၅) နိုင်ငံ ဓမ္မခရီးကြွရောက်ရာတွင် ရှမ်းပြည်နယ် (အရှေ့ပိုင်း) တာချီလိတ်မြို့နှင့် ကျိုင်းတုံမြို့များသို့ အောက်တိုဘာလ (၁၆)ရက်နေ့မှ (၁၈)ရက်နေ့အထိ ကြွရောက်ကြမည် ဖြစ်သည်။

တာချီလိတ်နှင့် ကျိုင်းတုံမြို့များသို့ ကြွရောက်စဉ် ဆရာတော်၊ သံဃာတော်များက ပရိတ်တရားတော်များ ရွတ်ဖတ်ပူဇော်ခြင်း၊ ဗုဒ္ဓဂါယာမှ ယူဆောင်လာသော မဟာဗောဓိညောင်ပင်များ စိုက်ပျိုးခြင်းစသော အခမ်းအနားများကျင်းပရန် မြန်မာကိုယ်စားပြု ဆရာတော်များဖြစ်သည့် နိုင်ငံတော်သံဃမဟာနာယက အကျိုးတော်ဆောင်ဆရာတော် ၊ နိုင်ငံတော်ပရိယတ္တိတက္ကသိုလ် ပါမောက္ခချုပ်ဆရာတော်၊ တိပိဋက (၁၁) ပါးမြောက် ဆရာတော်၊ ကျိုက်ထီးဆောင်းဆရာတော်နှင့် သံဃာတော်များနှင့် အဆိုပါဓမ္မခရီးစဉ်ကို စီစဉ်သည့် သာသနာနုဂ္ဂဟအသင်း (ဗဟို)ဥက္ကဌ ဝဏ္ဏကျော်ထင် ဒေါက်တာခင်ရွှေပါဝင်သည့် အဖွဲ့သည် တာချီလိတ်မြို့သို့ ရောက်ရှိလာခြင်းဖြစ်သည်။

ဒုတိယအကြိမ် မဲခေါင်မြစ်ဝှမ်းဓမ္မခရီးစဉ်အဖြစ် မြန်မာနိုင်ငံလုံးဆိုင်ရာ ထေရဝါဒဗုဒ္ဓဘာသာအဖွဲ့ချုပ်နှင့် နယ်စပ်တောင်တန်းဒေသ သာသနာနုဂ္ဂဟအသင်းနှင့် ထိုင်းနိုင်ငံ ဗောဓိဂယာဝိဇ္ဇာလျ ၉၈၀ အဖွဲ့ချုပ်တို့ ပူးပေါင်း၍ စီစဉ်ခြင်းဖြစ်သည်။

Tachileik News Agency