ရှမ်းပြည်နယ်(မြောက်ပိုင်း) ကျောက်မဲမြို့တွင် လမ်းဧရိယာအထိ ပစ္စည်းများ ခင်းကျင်းနေသည့် ဆိုင်ကယ် အရောင်းဆိုင်များကြောင့် အများပြည်သူ အနှောင့်အယှက်ဖြစ်စေသည့်အတွက် လမ်းဧရိယာတွင် ကျူးကျော် ခင်းကျင်းခြင်းမပြုရန် သတိပေးထားပြီး မလိုက်နာပါက အရေးယူမှုများ ဆက်လက်လုပ်ဆောင်မည်ဟု သိရသည်။

"'ဒီရက်ပိုင်းမှာက အခါကြီးရက်ကြီးလည်းဖြစ်နေတော့ သူတို့ရောင်းရတဲ့ရက်တွေလည်း ဖြစ်ကောင်းဖြစ်နိုင်တဲ့ အတွက် ချက်ချင်းကြီးတော့ နေရာမရွှေ့ခိုင်းထားသေးပါဘူး။ ဒါပေမဲ့ စည်ပင်သာယာရေးဥပဒေအရ တိတိကျကျဆိုရင် အများပြည်သူပိုင်လမ်းနယ်နိမိတ်ပေါ်မှာ ဆိုင်ကယ်တွေတန်းစီရပ်ပြီး ရောင်းချတာရော၊ ဈေးဆိုင်တွေခင်းတာရော အရေးယူလို့ရတယ။ ပထမဆုံးအနေနဲ့က ဆိုင်ကယ်ဆိုင် ဆိုင်ရှင်တွေကို ခေါ်ယူသတိပေးထားတယ်။ နေရာရွှေ့ပြောင်းရောင်းချဖို့အတွက်လည်း လအနည်းငယ် အချိန်ပေးထားတယ်" ဟု ကျောက်မဲမြို့နယ်စည်ပင်သာယာရေးဌာနမှ အမှုဆောင်အရာရှိ ဦးစိုးနိုင်ဦးက တာချီလိတ်သတင်းအေဂျင်စီ သို့ အောက်တိုဘာလ (၁၆) ရက်နေ့တွင် ပြောသည်။

ကျောက်မဲမြို့တွင်း လမ်းပေါ်အထိ ဆိုင်ကယ်များ ခင်းကျင်းရောင်းချနေသည့် ဆိုင်ကယ်အရောင်းဆိုင်များကို အောက်တိုဘာလ ပထမပတ်အတွင်းက မြို့နယ်စည်ပင်သာယာရေးဌာနသို့ ခေါ်ယူဆွေးနွေးပြီး ကိုယ်ပိုင်နေရာ၊ ခြံဝန်းများအတွင်း ရွှေ့ပြောင်းရောင်းချကြရန် သတိပေးထားကြောင်း သိရသည်။

ဈေးဆိုင်ဖွင့်လှစ်ရောင်းချခွင့်မရှိသည့် လမ်းအချိုးအကွေ့ထောင့်များ၌ ဖွင့်လှစ်ထားသည့် ဈေးဆိုင်များ၊ လူသွားလမ်းများအပေါ် နေရာကျူးလွန်ရယူ၍ ရောင်းချနေသော ဈေးဆိုင်များနှင့် လမ်းနယ်နိမိတ်အထိ အဖီဆွဲ၍ ဖွင့်လှစ်ထားသောဈေးဆိုင်များကိုလည်း လိုက်လံစစ်ဆေးကြပ်မတ်မှုများ လုပ်ဆောင်သွားမည်ဟု သိရသည်။

သတင်း၊ဓါတ်ပုံ #နေဖြိုးမြင့်